17-03-2024 – ఆదివారం రెండవ ఆరాధన – మరణంలో నుండి జీవము

ఆరాధన వర్తమానము

దేవుని సన్నిధిలో గడుపుట మహాభాగ్యముతో కూడినది. ఎందుకు అని ఆలోచిస్తే,

అంజూరపు చెట్లు పూయకుండినను ద్రాక్షచెట్లు ఫలింపకపోయినను ఒలీవచెట్లు కాపులేకయుండినను చేనిలోని పైరు పంటకు రాకపోయినను గొఱ్ఱెలు దొడ్డిలో లేకపోయినను సాలలో పశువులు లేకపోయినను నేను యెహోవాయందు ఆనందించెదను నా రక్షణకర్తయైన నా దేవునియందు నేను సంతోషించెదను. ప్రభువగు యెహోవాయే నాకు బలము ఆయన నా కాళ్లను లేడికాళ్లవలె చేయును ఉన్నతస్థలములమీద ఆయన నన్ను నడవచేయును. -హబక్కూకు 3:17-19

దేవుని సన్నిధి పరిశుద్ధులు నివాసముండే స్థలము. దేవుని సన్నిధి ధన్యకరమైనది. లోకములో కూడా అనేకమైన సన్నిధిలున్నాయి కానీ అవి వ్యర్థమైనవి.

నేనే ద్వారమును; నా ద్వారా ఎవడైన లోపల ప్రవేశించినయెడల వాడు రక్షింపబడినవాడై, లోపలికి పోవుచు బయటికి వచ్చుచు మేత మేయుచునుండును.౹ -యోహాను 10:9

మన మధ్యన మన దేవుడు ఉన్నాడు కాబట్టి, ఈ స్థలమంతా ఆయన బలము, ప్రభావముతో నిండి ఉన్నది. ఆయన ఎక్కడ ఉన్నాడో అక్కడ ఆయన మహిమ, బలము ప్రత్యక్షపరచబడుతుంది. ఈ స్థలములో అడుగుపెట్టిన ప్రతివాడూ రక్షించబడినవాడుగా ఉంటున్నాడు. అనగా ఇక్కడ అడుగుపెట్టిన ప్రతీవారి జీవితములో ఒక రక్షణ కార్యము జరుగుతుంది. ఆ కార్యము ఆత్మీయమైనది అయినా సరే, శరీరసంబంధమైనదైనా సరే రక్షణ కార్యము మాత్రము జరుగుతుంది.

దేవుని సన్నిధిలో నెగటివ్ సంగతులే లేవు. ఒకవేళ నీవు మరణకరమైన సంగతులతో గనుక దేవుని సన్నిధిలో ప్రవేశిస్తే, నీ స్థితి జీవమునకు మార్చబడుతుంది. దేవుడు ప్రతివారి కొరకు ఆహారము సిద్ధపరచి తన సన్నిధిలో ఉంచారు.

దినదినము మనము ఆత్మీయముగా లోతైన అనుభవము కలిగి ఉండులాగున మన నడక ఉండాలి. ఒక కట్టడము కట్టేసమయములో పునాది వేసి పిల్లర్స్ లేపిన తరువాత నీటి చేత తడుపుతాము. ఆ సమయములో గమనిస్తే, ఎక్కడెక్కడ గుంటలు ఉన్నాయో అక్కడికే ఆ నీరు వెళుతుంది కదా! అలాగే మన జీవితములో ఆశ గనుక ఉంటే, మనము వినే వాక్యము ఆ ఆశను తీరుస్తుంది.

ఒకప్పుడు దేవుని సన్నిధికి వస్తూ, క్రమముగా ఎదుగుతూ ఆరాధించే స్థితికి గనుక చేరుకుంటే, ఇంకా ముందుకు మనము ఎదగాలి. దేవుని సన్నిధిలో ఉన్న ఆయన లక్షణములు, నా లేమి స్థితిని నింపాలి అనే ఆశ కలిగి ఉండేలా మనము ఎదగాలి.

యెహోవా రాజ్యము చేయుచున్నాడు లోకము కదలకుండ స్థిరపరచబడియున్నది న్యాయమునుబట్టి ఆయన జనములను పరిపాలన చేయును. ఈ వార్తను అన్యజనులలో ప్రకటించుడి -కీర్తనలు 96:10

మన దేవుడు పరిపాలన చేస్తున్నాడు కాబట్టే ఈ లోకము స్థిరముగా ఉన్నది అని వాక్యము చెప్పుచున్నది. ఇప్పుడు మనము ఆయన సన్నిధిలో ఉన్నాము. ఆయన సన్నిధిలో మనపై ఆయన రాజ్యము చేస్తున్నాడు గనుక మనకు కూడా కదలకుండా స్థిరపరచబడినవారముగా ఉన్నాము.

ఆయన న్యాయమును బట్టి, పరిపాలన చేసేవాడుగా ఉన్నాడు. దేవుని విషయములను మన జ్ఞానము చొప్పున సరిచూడాలి అంటే అది కష్టమైన పని. పరిపాలన చేయుట అంటే ఏమి జరుగుతుంది? ఎవరికి అన్యాయము జరిగిందో, వారికి న్యాయమైన తీర్పులు తీర్చబడతాయి. కాబట్టి మన జీవితములో జరిగిన నష్టమును బట్టి కుమిలిపోయే అవసరము లేదు.

ఈ సత్యము ఎరిగినవాడు తన నష్ట పరిస్థితిలో అయినా సరే, ఇలా చెప్పగలుగుతాడు – “నేను యెహోవాయందు ఆనందించెదను నా రక్షణకర్తయైన నా దేవునియందు నేను సంతోషించెదను. ప్రభువగు యెహోవాయే నాకు బలము ఆయన నా కాళ్లను లేడికాళ్లవలె చేయును ఉన్నతస్థలములమీద ఆయన నన్ను నడవచేయును”. ఇదే మన విశ్వాసమును కనపరచుట. అలా విశ్వాసమును కనపరచిన తరువాత ఆశీర్వాదము కలుగుతుంది.

మీకు కలుగు ఆ కృపనుగూర్చి ప్రవచించిన ప్రవక్తలు ఈ రక్షణనుగూర్చి పరిశీలించుచు, తమయందున్న క్రీస్తు ఆత్మ క్రీస్తు విషయమైనశ్రమలనుగూర్చియు, వాటి తరువాత కలుగబోవు మహిమలనుగూర్చియు ముందుగా సాక్ష్యమిచ్చునపుడు, ఆ ఆత్మ, యే కాలమును ఎట్టి కాలమును సూచించుచువచ్చెనో దానిని విచారించి పరిశోధించిరి.౹ -1 పేతురు 1:10

“దానిని విచారించి పరిశోధించిరి” ఎప్పుడు? ఏమి పరిశోధించారు? శ్రమలవెనుక మహిమ దాచబడి ఉన్నది అని పరిశోధించి తెలుసుకున్నారు. అందుకే ఈ దినము నీవు శ్రమలో ఉంటే, దాని వెనుక ఉన్న మహిమను, సంతోషమును కూడా జ్ఞాపకము చేసుకో!

యెహోవామీద క్రొత్త కీర్తన పాడుడి సర్వభూజనులారా, యెహోవామీద పాడుడి యెహోవామీద పాడుడి, ఆయన నామమును స్తుతించుడి అనుదినము ఆయన రక్షణసువార్తను ప్రకటించుడి. -కీర్తనలు 96:1-2

రక్షణసువార్త ప్రకటించాలి అనే మాట చూస్తే, అనుదినము ఏ విధముగా లోపల వెలుపల ఆహారము ఉంటుందో, దానిని ప్రకటన చేయాలి. ఎలా? ఈరోజు నా పరిస్థితిలో దేవుని కృప నాకు ఇలా తోడుగా ఉంది అనే ప్రకటనే! ఇటువంటి సాక్ష్యముతో కూడిన ప్రకటన, మరొక ఆత్మను సంపాదించగలుగుతుంది.

ఇందునుగూర్చి దేవుడు తన్ను ప్రేమించువారికొరకు ఏవి సిద్ధపరచెనో అవి కంటికి కనబడలేదు, చెవికి వినబడలేదు, మనుష్య హృదయమునకు గోచరముకాలేదు అని వ్రాయబడియున్నది.౹ మనకైతే దేవుడు వాటిని తన ఆత్మ వలన బయలుపరచియున్నాడు -1 కొరింథీయులకు 2:9-10

వేరేవారికి కంటికి కనబడలేదు గానీ, మనము ఆరాధనలో ఆయనతో ఐక్యమై ఉండగా మనకొరకు ఆయన సిద్ధపరచినది మనకు కనపరచబడుతుంది. మన కొరకు సిద్ధపరచబడినదాని గూర్చి దేవుడు చెప్పే సంగతులు మనకు వినబడతాయి. అలాగే మన కొరకు సిద్ధపరచబడినదాని గూర్చి దేవుడు చెప్పే సంగతులు మన హృదయమునకు అర్థమయ్యేలా తెలియచేస్తాడు. ఈ స్థాయికి మనము అందరము ఎదగాలి.

దేవునిని నిజముగా ఆరాధించే మనకు ఆయన తెలియచేసే కార్యములు కనబడతాయి, వినబడతాయి, మన హృదయమునకు అర్థముకూడా అవుతాయి.

ఆయన నామమును కలిగి ఉన్న మన జీవితములో ఏ శత్రువు ఉన్నా సరే, ఆ శత్రువు మోకాలు వంగవలసినదే. ప్రతీ అసాధ్యమైన పరిస్థితి సాధ్యమయ్యేలా అది లోబడవలసినదే! మనము జాగ్రత్తగా సరిచూసుకోవలసినది ఏమిటి అంటే, మనము ఆయనను కలిగిఉన్నామా లేదా, అనేదే!

దేవుడు మాట పలుకగా ఆ ప్రకారము జరుగవలసినదే. ఈ సత్యము ఎరిగి ఆత్మీయముగా దేవుని వైపు చూస్తూ నడిచినప్పుడు మన జీవితములో అద్భుతములు జరుగుతాయి. అయితే ఎప్పుడైతే లోకమువైపు దృష్టి మరలిందో, అప్పుడు అద్భుతము పోగొట్టుకొనేవారముగా అయిపోతాము.

అదాము హవ్వలు తినవద్దు అని చెప్పిన పండు తిన్న సమయములో. హవ్వ తిన్న వెంటనే ఏమీ కాలేదు గానీ, ఆదాము తిన్న వెంటనే మహిమను కోల్పోయారు. మన జీవితములో కూడా మన దృష్టి మరలించబడుతున్నపుడు ఆ మరలింపుకు లోబడిపోతే, మనము దేవుడిచ్చే మహిమను పోగొట్టుకొనేవారిగా అయిపోతాము.

నాలో ఉన్న వాని బట్టి నాకు సమస్తము సాధ్యమే అని పౌలు చెప్పగలుగుతున్నాడు. ఆయన క్రీస్తును పోలి నడుచుకున్నాడు కాబట్టి అలా చెప్పగలిగాడు. మనము కూడా క్రీస్తునుపోలి నడుచుకున్నప్పుడు, మనము కూడా అలాగే చెప్పగలుగుతాము.

ఆరాధన గీతము

ఏ నామములో సృష్టి అంతా సృజింపబడెనో
ఆ నామమునే స్తుతింతును
ఏ నామములో పాపమంతా క్షమించబడెనో
ఆ నామమునే పూజింతును
ఏ నామములో దావీదు గోలియాతును ఎదురించెనో
ఆ నామమునే నమ్మెదను
ఏ నామములో ఈ లోకమంతటికి రక్షణ కలుగునో
ఆ నామమునే స్మరింతును

నీ నామమునే ధ్వజముగ పైకెత్తెదను
నీ నామమే ఆధారము
నీ నామమునే ధ్వజముగ పైకెత్తెదను
నీ నామమే నా జయము

రోగము తలవంచును నీ నామము ఎదుట
శాపము తల వంగును నీ నామము ఎదుట (2)
సాటిలేని నామము – స్వస్థపరచే నామము (2)
||నీ నామమునే||

ప్రతి మోకాలొంగును నీ నామము ఎదుట
ప్రతి నాలుక పలుకును ప్రభు యేసుకే ఘనత (2)
శ్రేష్టమైన నామము – శక్తిగలిగిన నామము (2)
||నీ నామమునే||

హెచ్చింపబడును గాక నీ నామము యేసయ్యా
కీర్తింపబడును గాక నీ నామము యేసయ్యా
కొనియాడబడును గాక నీ నామము యేసయ్యా
అన్ని నామములకు పై నామముగా (2)
అన్ని నామములకు పై నామముగా – (3)
||నీ నామమునే||