16-04-2023 – ఆదివారం మొదటి ఆరాధన

మెయిన్ మెసేజ్

శ్రమ అనుభవించుట వాస్తవము, నీతో ఉన్నవాడు ఆ శ్రమను చూస్తున్నాడు. చూసే వాడు ఖచ్చితముగా కార్యము జరిగిస్తాడు. గనుక నీ “నిశ్చయతతో కూడిన ప్రకటన” ఎంతో అవసరము.

ఆయనను వెంబడించుము అనే విషయము గూర్చి మనము తెలుసుకుందాము.

నా గొఱ్ఱెలు నా స్వరము వినును, నేను వాటి నెరుగుదును, అవి నన్ను వెంబడించును.౹ -యోహాను 10:27

ఇది దేవుడు చేసిన ప్రకటన. ఇది ఒక నియమము లాగా కూడా కనబడుతుంది. అయితే ఈ ప్రకటనలో దేవుని ఉద్దేశ్యము గూర్చి ధ్యానము చేస్తే, “నా గొర్రెలు” అనే మాట ద్వారా మన జీవితాన్ని వెతుకుకుందాము.

“నా గొర్రెలు” అనే గుంపులో నీవు నేను ఉన్నామా? ఇది మొదట మనము పరీక్షించుకోవలసినది.

మరియు ఎవరిని ముందుగా నిర్ణయించెనో వారిని పిలిచెను; ఎవరిని పిలిచెనో వారిని నీతిమంతులుగా తీర్చెను; ఎవరిని నీతిమంతులుగా తీర్చెనో వారిని మహిమ పరచెను. -రోమా 8:30

“ఎవరిని ముందుగా నిర్ణయించెనో వారిని పిలిచెను” అనగా దేవుడు ఆయన గొర్రెలను పిలుచుచున్నాడు. ఎవరు ఆయన గొర్రెలు అంటే, ఎవరిని ముందుగా నిర్ణయించాడో వారు ఆయన గొర్రెలు.

అటుపిమ్మట ఆయన బయలుదేరి, లేవియను ఒక సుంకరి, సుంకపు మెట్టునొద్ద కూర్చుండియుండుట చూచి –నన్ను వెంబడించుమని అతనితో చెప్పగా అతడు సమస్తమును విడిచిపెట్టి, లేచి, ఆయనను వెంబడించెను. -లూకా 5:27-28

ఇక్కడ ఈ లేవి కూడా ముందుగా నిర్ణయించబడినవాడు. అందుకే యేసయ్య పిలిచినప్పుడు ఆయ్న స్వరము విని సమస్తము విడిచిపెట్టి యేసయ్యను వెంబడించినాడు. మనము కూడా ముందుగా నిర్ణయించబడినవారము. అయితే అసలు ఎందుకు వెంబడించమన్నాడు? అనే సత్యము గ్రహిస్తే మనము యదార్థముగా వెంబడించగలుగుతాము. దీనిని తెలుసుకొనుట కొరకు, పేతురు ఎలా వెంబడించాడో చూద్దాము.

సీమోను పేతురు అది చూచి, యేసు మోకాళ్లయెదుట సాగిలపడి ప్రభువా, నన్ను విడిచిపొమ్ము, నేను పాపాత్ముడనని చెప్పెను. -లూకా 5:8

అక్కడ ఒక అద్భుతము జరిగింది, ఆ అద్భుతము చూడగానే, పేతురు యేసయ్య పరిశుద్ధుడు అని గ్రహించి, పాపాత్ముడనని ఒప్పుకొని యేసయ్య పిలిచినప్పుడు వెంటనే వెంబడించాడు.

దేవుని యొక్క ఉద్దేశ్యము ఏమిటి అంటే, నీ జీవితమును మార్చి ఆయన పనికొరకు వాడుకుంటాడు. అనగా నీ స్వభావము మారకుండా దేవుని పనిలో నీవు వాడబడలేవు.
లేవు కూడా ఒక సుంకరి కనుక ప్రజలను అన్యాయముగా పీడించే పరిస్థితిలో ఉన్నాడు.

జక్కయ్య నిలువబడి–ఇదిగో ప్రభువా, నా ఆస్తిలో సగము బీదలకిచ్చుచున్నాను; నేనెవనియొద్దనైనను అన్యాయముగా దేనినైనను తీసికొనినయెడల అతనికి నాలుగంతలు మరల చెల్లింతునని ప్రభువుతో చెప్పెను. -లూకా 19:8

ఇప్పుడు ఆ పాపపు జీవితములో ఉన్న లేవిని పిలిచి నీతిమంతునిగా మార్చడానికి వెంబడించమని చెప్పుచున్నాడు. మనలను కూడా మనము చేసే అసహ్యకరమైన క్రియలను బట్టి మనమే సిగ్గుపడే పరిస్థితులలో, మన జీవితమును మార్చడానికి, మన జీవితము సాక్ష్యమును మార్చడానికి ఆయన వెంబడించమని చెప్పుచున్నాడు. మన జీవితము మార్చబడకుండా దేవుని పనికొరకు వాడబడలేము.

ప్రాముఖ్యమైన మాట: మన జీవితము మార్చబడకుండా దేవుని పనికొరకు వాడబడలేము.

ఆయన గొర్రెలు ఆయన స్వరము వినును. ఈరోజు నన్ను వెంబడించుము అనే స్వరము వినిపిస్తున్నాడు. వెంబడించినవారి జీవిత సాక్ష్యము మార్చడానికి ఆ పిలుపు ఇవ్వబడింది. లేవిని పిలిచినప్పుడు మొదటిగా వదిలేసింది “తనలో ఉన్న పాపము” ఆ తరువాత సంపూర్ణ సేవకు తనను ప్రభువు వాడుకున్నాడు. అదేవిధముగా మనము కూడా మనలో ఉన్న “పాపము” వదిలివేసి వెంబడించాలి.

“నేను వాటిని ఎరుగుదును” అని అంటున్నాడు. అనగా వారి స్థితి అనగా పాపపు స్థితి, వారి మనసు సమస్తము ఎరిగినవాడు. యోహానులో నతనయేలు విషయములో ధ్యానిస్తే,

యేసు నతనయేలు తన యొద్దకు వచ్చుట చూచి–ఇదిగో యితడు నిజముగా ఇశ్రాయేలీయుడు, ఇతనియందు ఏ కపటమును లేదని అతనిగూర్చి చెప్పెను.౹ –నన్ను నీవు ఏలాగు ఎరుగుదువని నతనయేలు ఆయనను అడుగగా యేసు–ఫిలిప్పు నిన్ను పిలువకమునుపే, నీవు ఆ అంజూరపు చెట్టు క్రింద ఉన్న ప్పుడే నిన్ను చూచితినని అతనితో చెప్పెను.౹ -యోహాను 1:43-48

నతనయేలు ఎటువంటి స్థితిలో ఉన్నాడో ఎరిగినవాడు, మత్తయిని ఎటువంటి స్థితిలో ఉన్నాడో ఎరిగినవాడు, అలాగే నీవు నేను ఎటువంటి స్థితిలో ఉన్నామో కూడా ఎరిగినవాడు. అందుకే నీ, నా జీవిత సాక్ష్యము మార్చి దేవుని చిత్తము నీ నా జీవితములో నెరవేర్చడానికి మనలను పిలిచాడు.

మత్తయి “సమస్తము” విడిచిపెట్టి యేసయ్యను వెంబడించాడు. అయితే యేసయ్య ఎవరో గ్రహించకుండా సమస్తము విడిచిపెడతాడా? మరొక సందర్భము చూస్తే, పాపములో పట్టబడ్డ స్త్రీని రాళ్ళతో కొట్టి చంపడానికి తీసుకువచ్చినప్పుడు, యేసయ్య నేలమీద ఎదో వ్రాస్తున్నాడు. అందరూ రాళ్ళు తీసుకుని వచ్చారు గానీ, ఎప్పుడైతే యేసయ్య “పాపము లేని వారు మొదటి రాయి వెయ్యమని” చెప్పగా ఎవరూ వెయ్యలేకపోయారు. ఎందుకనగా సమస్తము ఎరిగిన యేసయ్య నేల మీద ఎదో వ్రాస్తున్నాడు. అలాగే సమరయ స్త్రీతో కూడా, “నీతో మాట్లాడేవాడు ఎవరు అని గ్రహిస్తే” అని చెప్పుచున్నాడు అంతే కాక, తాను గ్రహించునట్లుగా ఆమెకు వెల్లడిపరిచాడు. అలాగే మత్తయికి కూడా తాను గ్రహించునట్లుగా వెల్లడిపరిచాడు. ఏమని వెల్లడిపరచాడు అని చూస్తే, మారుమనసు కొరకైన సువార్తను మహత్కార్యములతో ప్రకటించినపుడు, యేసయ్య ఎవరో గ్రహించినవాడుగా మారి వెంబడించాడు. తనలో ఉన్న సమస్త పాపమును విడిచిపెట్టి మత్తయి పరిశుద్ధమైన జీవితమును వెంబడించాడు.

ఆయన నా వెంబడి రండి, నేను మిమ్మును మనుష్యులను పట్టు జాలరులనుగా చేతునని వారితో చెప్పెను; వెంటనే వారు తమ వలలు విడిచిపెట్టి ఆయనను వెంబడించిరి. -మత్తయి 4:19

ఎటువంటి స్థితిలో వారికి పిలిచాడు అని ఆలోచిస్తే, “యేసు గలిలయ సముద్రతీరమున నడుచుచుండగా, పేతురనబడిన సీమోను అతని సహోదరుడైన అంద్రెయ అను ఇద్దరు సహోదరులు సముద్రములో వలవేయుట చూచెను; వారు జాలరులు… ఆయన అక్కడనుండి వెళ్లి జెబెదయి కుమారుడైన యాకోబు, అతని సహోదరుడైన యోహాను అను మరి యిద్దరు సహోదరులు తమ తండ్రి యైన జెబెదయి యొద్ద దోనెలో తమ వలలు బాగుచేసికొనుచుండగా చూచి వారిని పిలిచెను. వెంటనే వారు తమ దోనెను తమ తండ్రిని విడిచిపెట్టి ఆయనను వెంబడించిరి -మత్తయి 4:18,21,22”.

యేసయ్య వారిని పిలిచినప్పుడు వారు జాలరులు గనుక వలలు కడుక్కొంటున్నారు. వారి శరీర సంబంధమైన వృత్తిలో ఉన్నారు, ఆ స్థితిలో ఉన్నవారిని ఇప్పుడు యేసయ్య పిలుస్తున్నారు. అనగా వారి శరీర వృత్తిలోనుండి ఆత్మ సంబంధమైన వృత్తిలోనికి పిలుస్తున్నాడు. “మనుష్యులు” అనగా రక్షణకొరకైన ఆత్మలుగా మనము చూడగలము. మనుష్యులను పట్టే జాలరులుగా అంటే, ఆత్మాల్ను రక్షించువారిగా అనే అర్థము.

ఈరోజు మనలను కూడా శరీర సంబంధమైన విషయములను విడిచి ఆత్మీయ సంబంధమైన ప్రతీ విషయమును స్వతంత్రించుకొనుటకు వెంబడించమని పిలుస్తున్నాడు.

ప్రియుడా, నీ ఆత్మ వర్ధిల్లుచున్న ప్రకారము నీవు అన్ని విషయములలోను వర్ధిల్లుచు సౌఖ్యముగా ఉండ వలెనని ప్రార్థించుచున్నాను.౹ -3 యోహాను 1:2

దేవుని మాట ప్రకారము నీవు వెంబడిస్తున్న ప్రతి సారీ, నీవు ఆత్మలో వర్థిల్లేవాడవుగా ఉంటావు. పేతురు మరియు శిష్యులు వేరు వేరు ప్రదేశాలలో వారు పరిచర్యచేసారు. మనము కూడా అరోగ్యము, ఐశ్వర్యము వంటి అనేకమైన పరిస్థితులలో దేవుని వాక్యము ప్రకారము చేయుటయే మనము ఆయనను వెంబడించుట. అయన అనగా ఆయన వాక్యమే. ఆయనను వాక్యము ప్రకారము ఏ విషయములు మార్చుకొమ్మని నీతో చెప్పుచున్నాడో ఆ విషయములు మార్చుకోవాలి. అసలు ఆయన స్వరము నీ దగ్గరకు వస్తుంది అంటేనే నీ స్థితిని మార్చుటకు.

ఈరోజు మనము నేర్చుకున్న విషయాలు.

1. దేవుడు నిన్ను పిలిచినప్పుడు ఆయన ఉద్దేశ్యము నీ జీవిత సాక్ష్యము మార్చడానికి
2. పాపపు స్థితిని విడిచి పరిశుద్ధమైన జీవితమును వెంబడించుటకు పిలిచారు.
3. శరీర సంబంధమైన వాటిని విడిచి ఆత్మ సంబంధమైన విషయాలు వెంబడించాలి అని పిలిచారు.