16-04-2023 – ఆదివారం రెండవ ఆరాధన

ఆరాధన వర్తమానము

ఎప్పుడైతే మనము దేవుని సన్నిధిలో ఉన్నప్పుడు ఏమి జరుగుతుంది అని ఆలోచిస్తే, మన ఆత్మ బలపరచబడుతుంది. ఉదాహరణకు మనము భోజనము చేస్తున్నాము. ఆ భోజనము లోపలకి వెళ్ళినతరువాత ఏమి జరుగుతుందో నీకు తెలియదు కానీ దాని ప్రభావమును నీ జీవితములో ఖచ్చితముగా చూస్తావు. శ్రేష్టమైన ఆహారము తీసుకునేవారు శరీర సంబంధమైన జీవితములో బలమైన కార్యములు చేయగలుగుతారు. మరి మనము వాక్యము అనే ఆత్మీయ ఆహారము తీసుకుంటున్నాము. ఆ ఆత్మీయ ఆహారము నీ లోపలకు వెళుతుంది. అలా వెళ్ళిన ఆహారము ఏమవుతుందో నీకు తెలియదు కానీ, నీ ఆత్మ బలము పొందుకుంటుంది. ఎప్పుడైతే నీ ఆత్మ బలపడుతుందో, అప్పుడు ఆ ఆత్మ ద్వారా కూడా మనము కార్యములు చేసేవారిగా ఉంటాము. వాక్యము వినుట వలన విశ్వాసము కలుగుతుంది. ఆ విశ్వాసమును బట్టే మనము కార్యములు చేయుటకు సిద్ధపడగలుగుతాము. ఈ వాక్యము మనలోనికి వెళ్ళకపోతే మనము విశ్వాసము లేనివారమై ఏ కార్యములూ చెయ్యలేము. అంతే కాక, వాక్యములో కట్టబడినప్పుడు మాత్రమే మనము స్థిరముగా నిలబడి ఉండగలుగుతారు.

కాబట్టి యీ నా మాటలు విని వాటిచొప్పునచేయు ప్రతివాడును బండమీద తన యిల్లు కట్టుకొనిన బుద్ధి మంతుని పోలియుండును. వాన కురిసెను, వరదలు వచ్చెను, గాలి విసిరి ఆ యింటిమీద కొట్టెను గాని దాని పునాది బండమీద వేయబడెను గనుక అది పడలేదు. -మత్తయి 7:24-25

ఎప్పుడైతే వాక్యములో కట్టబడి నిలబడతావో, అప్పుడు భూసంబంధమైనది గానీ, వాయుమండల సంబంధమైనది కానీ ఏది నీ దగ్గరకు వచ్చినాసరే, నీవు కదలక నిత్యముండు సీయోను కొండవలే ఉందువు.

శరీరసంబంధమైన ఆహారముతో ఎలా అయితే శక్తి వస్తుందో, అలాగే ఆత్మీయ ఆహారముతో కూడా శక్తి వస్తుంది. అయితే ఈ శక్తి దేవునినుండి వస్తుంది. దేవుని శక్తి ముందు నిలువగలిగింది ఏమీ లేదు. గనుక నీకు వాక్యమే ఆధారము అయి ఉండాలి. అప్పుడు నీవు స్థిరుడవు.

ఆరాధించువారు ఆత్మతోను సత్యముతోను ఆయనను ఆరాధించవలెను.

యెహోవాకు కృతజ్ఞతాస్తుతులు చెల్లించుడి ఆయన నామమును ప్రకటన చేయుడి జనములలో ఆయన కార్యములను తెలియచేయుడి. ఆయననుగూర్చి పాడుడి ఆయనను కీర్తించుడి ఆయన ఆశ్చర్య కార్యములన్నిటినిగూర్చి సంభాషణ చేయుడి -కీర్తనలు 105:1-2

దేవుని గూర్చి నీవు పాడాలి అంటే, ఆయన ఏమి చేసాడో మనము ఎరిగి ఉండాలి. అలాకాకపోతే మనము సరిగా ఆరాధించలేము. రెండు విధాలుగా ఉండే గుంపులు ఉంటారు ఒకటి సత్యము ఎరిగి ఆరాధించేవారు రెండవది సత్యము ఎరిగినవారిని అనుకరించి ఆరాధించిట. మనము మొదటి గుంపులో ఉండాలి అనేది దేవుని ఆశ. సత్యము ఎరిగి ఆరాధించువారు ఆరాధించుచుండగానే వారు దేవుని కృపను పొందుకుంటారు. ఏ సత్యమును నమ్మావో, ఆ సత్యము నెరవేరుటకు కృప తోడవుతుంది. ఇది ఆత్మీయ నియమము. దేవుని గూర్చి చెప్పాలి అంటే మన జీవిత కాలము సరిపోదు. అయితే ప్రతీ వారము పరిశుద్ధాత్మ దేవుడు ఒక్కో సత్యమును నేర్పుతున్నారు. ఈరోజు కూడా ఒక సత్యమును చూద్దాము.

తాను సెలవిచ్చిన మాటను వెయ్యి తరములవరకు అబ్రాహాముతో తాను చేసిన నిబంధనను ఇస్సాకుతో తాను చేసిన ప్రమాణమును– నిత్యము ఆయన జ్ఞాపకము చేసికొనును. -కీర్తనలు 105:8-9

నిబంధన అంటే దేవుడు ఖచ్చితముగా జరిగించును అని ఇచ్చిన మాట. ఆయన మాట ముందు విడుదలచేసి ఆ మాట ప్రకారము కార్యము జరిగించేవాడు. అందుకే దేవుని సన్నిధిలోనికి వచ్చినప్పుడు ఏమి మాట విడుదల అవుతుంది అని జాగ్రత్తగా కనిపెట్టుకోవాలి.

అయితే “తరతరములు జ్ఞాపకము చేసుకుంటాడు” అంటే, అబ్రహాము, ఇస్సాకు, యాకోబు తరములన్నిటిలో దేవుడు తన మాటను జ్ఞాపకము చేసుకున్నాడు. అబ్రహాము దేవుని యందు విధేయత కలిగి వెంబడించాడు గనుక దేవుడు తన వాగ్దానము ఇచ్చాడు. ఎప్పుడైతే ఇస్సాకు కష్టములో ఉన్నాడో, అప్పుడు తన మాటను జ్ఞాపకము చేసుకున్నాడు. అలాగే మన జీవితములో చూస్తే, ఒక తరము అనగా ఒక పిరియడ్ అనగా సమయము. మంచి సమయములు ఉన్నాయి, చెడు సమయములు ఉన్నాయి. ఎటువంటి సమయములోనైనా దేవుడు తన మాటను జ్ఞాపకము చేసుకుంటాడు అని అర్థము చేసుకోవచ్చు.

మరి అబ్రహాము జీవితములో శ్రమలు రాలేదా? ఖచ్చితముగా వచ్చాయి అలాగే మన జీవితములో కూడా శ్రమలు ఖచ్చితముగా వస్తాయి. అయితే ఎటువంటి పరిస్థితులలోనైనా సరే దేవుడు తన మాటను జ్ఞాపకము చేసుకునే వాడుగా ఉన్నాడు. ఈ సత్యము ఎరిగినవారమై మనము ఉండాలి. అప్పుడు లోకములో మనము వెర్రివారము గా ఉన్నప్పటికీ, మనకు మాత్రము దేవుని శక్తి అయి ఉన్నది.

అందుకే మనము దేవుడి మనకు ఇచ్చిన మాటను బట్టి కనిపెట్టుకుని ఉండాలి. ఆయ్నా ఇచ్చిన మాట నెరవేర్చేవరకు ఆయన విశ్రమించడు.

వారి సంఖ్య కొద్దిగా నుండగను ఆ కొద్ది మంది ఆ దేశమందు పరదేశులై యుండగను –కొలవబడిన స్వాస్థ్యముగా కనానుదేశమును మీకిచ్చెదనని ఆయన సెలవిచ్చెను -కీర్తనలు 105:10-11

ఇశ్రాయేలీయుల జీవితములో దేవుడు అబ్రహాముతో చేసిన నిబంధనను గూర్చి ఆలోచిస్తే, వారు ఐగుప్తులో కొద్దిమందిగా ఉన్నప్పుడే కానాను దేశములో కొలవబడిన స్వాస్థ్యము వారికి నిర్ణయించి నడిపించాడు. వారి పరిస్థితి ఎలా ఉంది అంటే, “కొద్దివారిగా ఉన్నారు” అనగా వారికి స్వతంత్రించుకునే బలము తక్కువగా ఉంది. “పరదేశులుగా ఉన్నారు” అంటే వారికి స్వతంత్రించుకునే అనుకూలత లేదు, అయినప్పటికీ “కొలవబడిన” అనగా నిర్ణయించబడిన స్వాస్థ్యము ఇవ్వబడింది. “కానాను” దేశము గూర్చి చూస్తే, “పాలు తేనెలు ప్రవహించే దేశము” అని వ్రాయబడింది. ఐగుప్తులో ఉన్నప్పుడు వారి శ్రమలో వారికి సరైన ఆహారము గానీ, నివసించుటకు సౌకర్యము గానీ, స్వాతంత్ర్యము గానీ లేదు. అయితే కనానులో ఐగుప్తులో లేనిది వారికి సమృద్ధిగా ఇవ్వబడింది.

తరము వెంబడి తరము అంటే దినము వెంబడి దినము అనేవిధముగా కూడా చూడవచ్చు. మనము ఎలా స్వీకరిస్తామో అదే విధముగా దేవుడు క్రియ జరిగిస్తాడు. ఆశ కలిగిన ప్రాణమును ఖచ్చితముగా తృప్తిపరుస్తాడు.

అనేక పర్యాయములు ఆయన వారిని విడిపించెను అయినను వారు తమ ఆలోచనను అనుసరించి తిరుగు బాటు చేయుచువచ్చిరి. తమ దోషముచేత హీనదశనొందిరి. అయినను వారిరోదనము తనకు వినబడగావారికి కలిగినశ్రమను ఆయన చూచెను. వారిని తలంచుకొని ఆయన తన నిబంధనను జ్ఞాపకము చేసికొనెను తన కృపాబాహుళ్యమునుబట్టి వారిని కరుణించెను. వారిని చెరగొనిపోయిన వారికందరికివారియెడల కనికరము పుట్టించెను. -కీర్తనలు 106:43-46

ఇది ఇశ్రాయేలీయుల జీవితము కాదు కానీ, నీ యొక్క నా యొక్క జీవితమే. మన జీవితములో కూడా దేవుడు చేసిన వాగ్దానము తాను జ్ఞాపకము చేసుకుంటున్నాడు. మనము తిరుగుబాటు చేసినప్పటికీ ఆయన తన మాటను జ్ఞాపకము చేసుకుంటున్నాడు. దాని కారణము చేతనే, అపవాదికి దొరకకుండా నేను తప్పించుకునేవారముగా ఉంటున్నాము. ఈ సత్యమును గ్రహించి ఆయనను ఆత్మతో ఆరాధిద్దాము.

ఆరాధన గీతము

నీ మాట జీవముగలదయ్యా యేసయ్యా
నీ మాట సత్యముగలదయ్యా
నీ మాట మార్పు లేనిదయ్యా యేసయ్యా
నీ మాట మరిచిపోనిదయ్యా{2}
ఏది మారినా నీ మాట మారదయ్యా
ఏది ఆగినా నీ మాట జరుగునయ్యా{2}
{నీ మాట}

1. నశించుచున్న వారిని బ్రతికించును నీ మాట
బంధించబడిన వారిని విడిపించును నీ మాట{2}
త్రోవ తప్పిన వారిని సరిచేయును నీ మాట
కృంగిపోయిన వారిని లేవనెత్తును నీ మాట{2}
ఏది మారినా నీ మాట మారదయ్యా
ఏది ఆగినా నీ మాట జరుగునయ్యా{2}
{నీ మాట}

2. సింహాల బోనులో నుండి విడిపించును నీమాట
అగ్నిగుండముల నుండి రక్షించును నీ మాట{2}
మారా బ్రతుకును కూడ మధురం చేయును నీ మాట
ఆరిపోయిన బ్రతుకును వెలిగించును నీ మాట{2}
ఏది మారినా నీ మాట మారదయ్యా
ఏది ఆగినా నీ మాట జరుగునయ్యా{2}
{నీ మాట}