15-10-2023 – ఆదివారం మొదటి ఆరాధన – ఆయనకు అనుకూలముగా నడచుకొనుడి

వారము కొరకైన వాక్యము

మన ప్రభువు నమ్మదగినవాడు. ఆయన నమ్మకత్వాన్ని మన శ్రమలో గుర్తించగలుగుతాము. మనము మార్గము తప్పినప్పుడు కూడా ఆయన నమ్మకత్వమును మన యెడల కనపరచేవాడు. దేవుని వాక్యము హెచ్చరికగా వచ్చింది అంటే దేవుడు ఎవరినో ప్రేమిస్తూ గద్దిస్తున్నాడు, నిందా రహితునిగా నిలబెట్టుటకు అతనిని సంధిస్తున్నాడు అని అర్థము. ఆ సమయములో మన హృదయములను కఠినపరచుకోకూడదు గానీ, మనము మన స్థితిని ఒప్పుకొని, మరొకసారి అటువంటి మహిమకరము కాని విషయాలవైపు, మార్గములవైపు వెళ్ళను అనే తీర్మానము చేసుకొని తిరిగి నిలబడదాము.

అందుచేత సమస్త కల్మషమును, విఱ్ఱవీగుచున్న దుష్టత్వమును మాని, లోపల నాటబడి మీ ఆత్మలను రక్షించుటకు శక్తిగల వాక్యమును సాత్వికముతో అంగీకరించుడి.౹ మీరు వినువారు మాత్రమైయుండి మిమ్మును మీరు మోసపుచ్చుకొనకుండ, వాక్యప్రకారము ప్రవర్తించువారునై యుండుడి.౹ ఎవ డైనను వాక్యమును వినువాడైయుండి దానిప్రకారము ప్రవర్తింపనివాడైతే, వాడు అద్దములో తన సహజముఖమును చూచుకొను మనుష్యుని పోలియున్నాడు.౹ వాడు తన్ను చూచుకొని అవతలికి పోయి తానెట్టివాడో వెంటనే మరచిపోవునుగదా౹ -యాకోబు 1:21-24

అద్దములో మన సహజ ముఖము ఎలా అయితే కనబడుతుందో, వాక్యము కూడా మన జీవితమును కనపరుస్తుంది. అద్దము ముందు వున్నంతసేపు మనం ముఖము కనబడుతుంది, సరిచేసుకోనే అవకాశము ఉంటుంది. అలాగే వాక్యము విన్నప్పుడు ఆ వాక్యము కూడా మన జీవితములను స్పష్టముగా కనపరుస్తుంది. దానిని బట్టి, ఆ లోపములను సరిచేసుకోగలిగే అవకాశము ఉంటుంది.

ఆసా తన దేవుడైన యెహోవా దృష్టికి అనుకూలముగాను యథార్థముగాను నడచినవాడై -2 దినవృత్తాంతములు 14:2

మన ముందు ఆసా జీవితము ఒక సాక్ష్యముగా ఉంది. ఆసా యెహోవా దృష్టికి అనుకూలముగా మరియు యదార్థముగా నడిచినవాడై ఉన్నాడు. అనుకూలముగా నడచుకొనుట అంటే ఏమిటి? ఇద్దరు స్నేహితులు ఉన్నట్టయితే ఒకరి మాట ప్రకారము మరొకరు ఉండేవారుగా ఉంటారు. వ్యతిరేకముగా ఇంక ఉండదు. అయితే ఆసా దేవుని దృష్టికి అనుకూలముగా ఉన్నాడు అని వ్రాయబడింది అంటే ఎలా ఉన్నాడు? దేవుడు ఏమి ఆలోచన కలిగి ఉన్నాడో, దేవుని చిత్తము ఏమై ఉందో అదే ప్రకారముగా ఆసా చేసినవాడుగా ఉంటున్నాడు.

దేవునికి ఇష్టము లేనిది ఏమిటి అని ఆలోచిస్తే, అపవాదికి సంబంధించినది మనలో ఉండుట అనేది ఆయనకు ఇష్టములేనిది. ఆశా ఈ విషయములో ఏమి చేస్తున్నాడు అని చూస్తే –

అన్యదేవతల బలిపీఠములను పడగొట్టి ఉన్నతస్థలములను పాడుచేసి ప్రతిమలను పగుల గొట్టి దేవతాస్తంభములను కొట్టివేయించి -2 దినవృత్తాంతములు 14:3

ఆసా రాజ్యము ఏలు సమయమునకు అన్యదేవత బలిపీఠములు, ఉన్నత స్థలములు, ప్రతిమలు కట్టబడి ఉన్నాయి. బలిపీఠము అనగా అర్పణలు అర్పించే స్థలముగా చూడవచ్చు. దేవునికి ఇష్టము కాని విషయములలో మనము అర్పించినవి ఏమైనా ఉన్నాయా? అని పరీక్షించుకోవాలి. ఒకవేళ మద్యపానము అనేది మనకు బాగా ఇష్టమైన కార్యముగా ఆలోచిస్తే, అది దేవునికి ఇష్టము లేని కార్యము అయినప్పటికీ, మనకు ఒక విగ్రహముగా మారిపోతుంది. ఇలా మనలను అపవాది ప్రేరేపిస్తాడు.

మీరు వాటినిచేయుచు, వాయు మండల సంబంధమైన అధిపతిని, అనగా అవిధేయులైన వారిని ఇప్పుడు ప్రేరేపించు శక్తికి అధిపతిని అనుసరించి, యీ ప్రపంచ ధర్మముచొప్పున మునుపు నడుచుకొంటిరి.౹ -ఎఫెసీయులకు 2:2

త్రాగుడు అనేది ఒక ఉదాహరణ మాత్రమే. అయితే అనేకమైన వ్యసనములు, కార్యములు దేవునికి వ్ర్యతిరేకమైన కార్యముల ద్వారా అపవాది ప్రేరేపించినపుడు దానికి లోబడిపోకుండా మనము ఉండగలుగినప్పుడు, ఆసా వలే మనము కూడా దేవునికి అనుకూలముగా జీవించేవారిగా ఉంటాము.

మన హృదయము దేవునిని, దేవునికి సంబంధించిన విషయాలను కోరుకోవాలి అయితే ఈ లోకములో ఉన్నవాటిని కోరుకొంటే గనుక అనగా లోకములో ఉన్న పద్ధతులు, రీతులు ప్రకారము మనము వెళ్ళినట్టయితే మనము వాటిని ప్రతిమగా ప్రతిష్టించుకున్నట్టే. మనము కలిగిన బలహీనత మనలను జయించి మనలను దానికి తగినట్టుగా మనము చేయునట్టుగా ప్రేరేపించి అపవాదికి సంబంధించిన బలిపీఠములు కట్టునట్టుగా మార్చివేస్తుంది. ప్రభువు వద్దు అన్నా సరే ఆ మాటలు తృణీకరించి అయినా సరే మనము ఆ కార్యము కొరకు వెళ్ళిపోయేవారముగా అయిపోతాము. అయితే ఆసా వలే ఇంతకుముందు కట్టబడిన ఈ ప్రతిమలు, బలిపీఠములు మనము నాశనము చేయవలసిన వారముగా ఉండాలి.

ఆసా రాజ్యము మన జీవితములను సూచిస్తుంది. ఎలా అయితే దేవునికి సంబంధించినది కాని దానిని ఎలా అయితే ఆశ కలిగి నిర్మూలించాడో మనము కూడా అలాగే మన జీవితములో ఉన్న సమస్తమైన కల్మషమును తొలగించుకోవలసినవారముగా ఉండాలి.

మరియు తన తల్లియైన మయకా అసహ్యమైన యొక దేవతాస్తంభమును నిలిపినందున ఆమె యిక పట్టపుదేవియై యుండకుండ రాజైన ఆసా ఆమెను త్రోసివేసి, ఆమె నిలిపిన విగ్రహమును పడగొట్టి ఛిన్నాభిన్నము చేసి కిద్రోను వాగుదగ్గర దాని కాల్చివేసెను.౹ -2 దినవృత్తాంతములు 15:16

ఇక్కడ ఆసా తల్లి ఒక దేవతా స్తంభమును నిలబెట్టింది. అంటే మన జీవితములో మన ప్రమేయము లేకుండా మన జీవితములో మనకు సంబంధించిన వారిద్వారా ప్రేరేపించబడే పరిస్థితులు అని అర్థము చేసుకోవచ్చు. మనకు ఎంత దగ్గరివారైనా సరే, ఒకవేళ దేవునికి మహిమకరము కానిది చేయుటకు ప్రేరేపిస్తే, ఖచ్చితముగా మనము వ్యతిరేకించాల్సిందే! ఆసా కన్న తల్లి అయినా సరే ఆలోచించకుండా పట్టపుదేవిగా ఉండకుండా అనగ త్రోసిపడవేసినవాడై ఉన్నాడు. అటువంటి పట్టుదల మనము కలిగి ఉండాలి. ఆలోచన సహితము మనము త్రోసివేసేవారముగా ఉండాలి. ఖచ్చితముగా ఆలోచన వస్తుంది. అయితే, ఆ ఆలోచనను త్రోసివేసే నిశ్చయతను మనము కలిగిఉండాలి. అంతే కాక మరొకసారి అటువంటి అవకాశము అపవాదికి దొరకకుండునట్టు మనము స్పష్టమైన ఏర్పాటు చేసుకోవాలి.

ఆసా యేలుబడియందు ముప్పది యయిదవ సంవత్సరమువరకు యుద్ధములు జరుగలేదు. -2 దినవృత్తాంతములు 15:19

అనగా దేవునికి అనుకూలముగా ఉన్నంతసేపూ ఆసా కు యుద్ధములే లేవు. మనము కూడా దేవునికి అనుకూలముగా ఉన్నంతసేపూ, మన జీవితములలో దేవుడు సిద్ధపరచిన శ్రేష్టమైన వాటినే మనము అనుభవించే స్థితిలో ఉండగలుగుతాము. 35 సంవత్సరములు ఆసా దేవునికి అనుకూలముగా జీవించాడు. అయితే 36వ సంవత్సరములో ఆసా చేసిన వ్యతిరేకమైన కార్యమును బట్టి యుద్ధములు కలిగినట్టుగా మనము చూడవచ్చు.

అందుకు–నేనీలాగు అనుకొనుచున్నాను మహోన్నతుని దక్షిణహస్తము మార్పునొందెననుకొను టకు నాకు కలిగినశ్రమయే కారణము. -కీర్తనలు 77:10
రక్షింపనేరక యుండునట్లు యెహోవా హస్తము కురుచకాలేదు విననేరక యుండునట్లు ఆయన చెవులు మందము కాలేదు మీ దోషములు మీకును మీ దేవునికిని అడ్డముగా వచ్చెను మీ పాపములు ఆయన ముఖమును మీకు మరుగు పరచెను గనుక ఆయన ఆలకింపకున్నాడు. -యెషయా 59:1-2

ఈరోజు చెప్పబడిన వాక్యము ప్రకారము మన జీవితములను సరిచేసుకుందాము. ఎక్కడెక్కడ విగ్రహములు ఉన్నాయో, ఎక్కడెక్కడ బలిపీఠములు కట్టామో అవన్నిటిని త్రోసివేసి, చిన్నాభిన్నములుగా చేసి దేవుని కొరకు మన జీవితములను సమర్పించుకుందాము.