15-01-2023 ఆదివారం మొదటి ఆరాధన – నన్ను వెంబడించుము

Main message| మెయిన్ మెసేజ్

దేవుని సన్నిధిలో ఉన్నవారు దేవుని శక్తితోను, ఆయన ప్రభావముతోను నిండినవారుగా ఉన్నారు. అయితే దేవుని మాట, బలము మరియు ప్రభావము క్రియలతో కూడినదై ఉంటుంది. ఆయన సన్నిధిలోని బలము, ప్రభావము మన శరీరములోనికి మరియు ఆత్మలోనికి వెళుతుంది. ఆయన ప్రభావము ఖచ్చితముగా కార్యము చేసేదిగా ఉంటుంది. నీ ఆత్మలో ఏమి కృంగుదల ఉంటుందో దానినుండి విడుదల పొందుకుంటుంది. ఇది నీ కంటి యెదుట కనబడదు గానీ ఆ కార్యము స్థిరపరచబడుతుంది. అదే విధముగా నీ శరీరములో ఏమి సమస్య ఉందో ఆ సమస్య కూడా ఆయన ప్రభావమును బట్టి బాగుచేయబడుతుంది.

మనము, యేసు ప్రభువు మరియు తండ్రి ఉన్నారు. తండ్రిలోని ప్రభావము యేసు క్రీస్తులోనికి వెళుతుంది. మరి యేసు క్రీస్తులోని ప్రభావము ఎవరి లోనికి వెళుతుంది? మనలోనికి వెళుతుంది. అయితే మనలోని ప్రభావము అది వెల్లడిపరచబడుతుంది.

నిజమైన వెలుగు ఉండెను; అది లోకములోనికి వచ్చుచు ప్రతి మనుష్యుని వెలిగించుచున్నది – యోహాను 1:9

నీవున్న పరిస్థితులలో నీలో ఉన్న ప్రభావము కార్యము చేస్తుంది అని నీవు నమ్మి, ఆ ప్రభావము ప్రకారము ప్రకటించి ప్రయత్నించండి. మీరు అనుభవపూర్వకముగా ఈ సత్యమును తెలుసుకోండి.

ఈ సంవత్సరము నీవు వెలిగించబడి ప్రకాశించబడే సంవత్సరము. అపవాది ఉచ్చులకు లోబడకండి. నీలో ఉన్నవాని ప్రభావము, బలము, జ్ఞానము గ్రహించండి. ఈ సంవత్సరము ఇలా ప్రాక్టికల్ గా ప్రయత్నించండి. ఇది రాదు, అని మీకు మీరే అనుకోకండి, మీలో ఉన్నవాని శక్తిమీద ఆధారపడి ముందుకు వెళ్ళండి.

నేను దేవుని శక్తిచేత నింపబడినవాడను, దేవుని జ్ఞానము చేత నింపబడినవాడను – ఆమేన్! ఏ సమస్య నాకు వ్యతిరేకముగా నిలబడలేదు! ఆయన నామమునే ధ్వజముగా ఎత్తి నిలబడినవాడను నేను అని నిన్ను నీవు బలపరచుకో!

ఈ రోజు మన ధ్యానాంశము – “నన్ను వెంబడించుము”. ఈ మాట ఒక ఆహ్వానము వలే ఉంది కదా!

యేసు నా వెంబడి రండి, నేను మిమ్మును మనుష్యులనుపట్టు జాలరులనుగా చేసెదనని వారితో చెప్పెను – మార్కు 1:17.

ఈరోజు ప్రభువు ఒక ఆహ్వానము ఇస్తున్నాడు, “నా వెంబడి రండి”. అయితే పిలిచినవాడు ఎవడు ఎటువంటివాడు అనే సంగతి ఎరిగినట్టయితే అప్పుడు వెంబడించడానికి సిద్ధపడతావు.

సీమోను ఏలినవాడా, రాత్రి అంతయు మేము ప్రయాసపడితివిు గాని మాకేమియు దొరకలేదు; అయినను నీ మాట చొప్పున వలలు వేతునని ఆయనతో చెప్పెను. వారాలాగు చేసి విస్తారమైన చేపలు పట్టిరి, అందుచేత వారి వలలు పిగిలిపోవుచుండగా, వారు వేరొక దోనె లోనున్న తమ పాలివారు వచ్చి తమకు సహాయము చేయవలెనని వారికి సంజ్ఞలు చేసిరి; వారు వచ్చి రెండు దోనెలు మునుగునట్లు నింపిరి. లూకా 5:5-7.

వచ్చిన ఆహ్వానము ఎటువంటి పరిస్థితిలో అని మనము గమనించాలి. పేతురుకు ఉన్న నెగటివ్ సందర్భములో అనగా ఏమి దొరకని, ప్రయత్నము ఫలించని స్థితిలో ఆయనకు ఆహ్వానము వచ్చింది. వారు వరి వలలు విడిచిపెట్టి యేసయ్యను వెంబడించారు. అయితే ఎందుకు వెంబడించారు? పిలిచినవ్యక్తి ఎటువంటివాడు అనే సంగతి ఎరిగినవాడు. “ఏమీలేని స్థితిలో సమృద్ధి కలుగచేసినవాడు” వారిని పిలిచినవాడు అనే విషయము వారు గ్రహించారు.

ప్రభువు వారిని పిలిచినప్పుడు వారు వలలు విడిచిపెట్టి వెంబడించారు. అయితే నీవు నేను మనకు వచ్చిన పిలుపుకు ఎలా వెంబడిస్తున్నాము? వారి పరిస్థితులలో వారు పట్టిన చేపలు ఎంతో విలువైనవి. అయితే ఆ సమయములో వారిని వెంబడించమని చెప్పినప్పుడు, వారికి ఎంతో విలువైనవి విడిచిపెట్టి వెంబడించారు. నీ జీవితములో కూడా ఏదీ ప్రభువుకంటే విలువైనది ఉండకూడదు. ఎప్పుడైతే నీవు ప్రభువును విలువైనవాడుగా చూడకపోతే ఆయన సన్నిధికి ఆశతో రాలేవు.

ఎవడును ఇద్దరు యజమానులకు దాసుడుగా నుండనేరడు. అతడు ఒకని ద్వేషించియొకని ప్రేమించును; లేదా యొకని పక్ష ముగానుండి యొకని తృణీకరించును. మీరు దేవునికిని సిరికిని దాసులుగా నుండనేరరు. – మత్తయి 6:24

ఎంతకాలము ఈ రెండు తలంపులు? ఎంతకాలము ఈ విధముగా ఉంటావు? ఏది నీకు విలువైనదిగా నీవు ఎంచుకుంటున్నావు? యేసు ప్రభువునే విలువైన వాడుగా ఎంచి వెంబడించు. ఒకసారి మనలను పరీక్షించుకోవాలి – ఏది మనకు విలువైనది? లోకమా? ధనమా? పదవా? లేకా నీకోసము ప్రాణము పెట్టిన నీ ప్రభువా?

నీకు ఉన్నది విడిచి పెట్టుకోమని కాదు గానీ, నీవు ప్రభువును అన్నిటికంటే విలువైనవాడి గా ఎంచుకుని ఆయను వెంబడించుమని ప్రభువు ఆహ్వానము ఇస్తున్నాడు.

యేసయ్య పరలోకములోనుండి వచ్చినవాడు. చేపలు భూమి మీద ఉన్నాయి. లోకము శరీరమునకు సంబంధించింది. యేసయ్య ఆత్మకు సంబంధించినవాడు. వారైతే వలలు విడిచి, శరీరమునకు విలువైనది విడిచిపెట్టి ఆత్మకు విలువైనది కావాలనుకున్నారు, ఆయనను విడిచిపెట్టారు. మనము కూడా “శరీరమునకు విలువైనది అనుకున్నది విడిచిపెట్టి, ఆత్మకు విలువైనది మరి ముఖ్యమని ఎంచుకునే మార్పు” మనలో రావాలి అని ప్రభువు కోరుకుంటున్నారు.

నా గొఱ్ఱలు నా స్వరము వినును, నేను వాటి నెరుగుదును, అవి నన్ను వెంబడించును – యోహాను 10:27.

“నా గొర్రెలు” అనగా ప్రభువు ఆయనవిగా ఆయన ఎంచుకున్న గొర్రెలు. ఎంత భాగ్యము? ఎంత ఆధిక్యత? అయితే ఈ సత్యము నీవు ఎరిగి ఉన్నావా?

దేవుని మాట ప్రకారము నీవు చేసినప్పుడు ఖచ్చితముగా ఆ మాట నెరవేర్పు నీ జీవితములో చూస్తావు. ఆయనను వెంబడించే నీవు ఆయన మాటల ప్రకారము నీవు సిద్ధపడుతున్నావా?

నీకు ఆహ్వానము ఇచ్చినవాడు వట్టిగానే ఇచ్చాడా? కష్టములో ఉన్నవారికి విస్తారముగా ఇచ్చాడు. విస్తారములో ఉన్నవారిని వెంబడించమన్నారు. దేనికొరకు? ఇంకా అధికముగా ఆశీర్వదించడానికి. వారు విడిచిపెట్టిన తరువాత, వారు మరి ఎక్కువగా ఆశీర్వదించబడ్డారు.

ఆత్మీయమైనదే విలువైనది
దేవునికి దాసుడుగా ఉండటానికి సిద్ధపడు
దేవుని స్వరము వినడానికి సిద్ధపడు.