14-05-2023 – ఆదివారం రెండవ ఆరాధన – తల్లిలా ఆదరించును

మెయిన్ మెసేజ్

ఎమ్మాయి గ్రామములోనికి వెళుతున్న శిష్యులు యేసయ్య మాటలు వినబడుతున్నప్పుడు “హృదయము మండలేదా” అని అనుకున్నారు. దేవుని మాటలలోని శక్తిని మనము స్వీకరించినప్పుడు మన హృదయములు ఉత్తేజపరచబడతాము.

ఒకని తల్లి వానిని ఆదరించునట్లు నేను మిమ్మును ఆద రించెదను యెరూషలేములోనే మీరు ఆదరింపబడెదరు. -యెషయా 66:13

మనము వెంబడించే దేవుడియొక్క లక్షణము, “ఆదరించుట”. గనుకనే మనలను ఆయన అనేక సందర్భాలలో ఆదరించేవాడుగా ఉన్నాడు. మరిన్ని లక్షణములు గమనిస్తే, ఆయన క్షమించే హృదయము కలిగినవాడు, శక్తి కలిగినవాడు. ఆయన కలిగిన ఈ లక్షణములు మన జీవితములో నెరవేర్చబడి స్థిరపరచబడతాయి.

మనము వెళ్ళే కష్ట సందర్భములలో అనేకసార్లు మనుష్యుల దయ కోసము ఎదురుచూసేవారిగా ఉంటాము గానీ దేవుని దయ కొరకు కనిపెట్టేవారే ధన్యులు, వారు ఆదరించబడతారు.

కనికరము చూపు తండ్రి, సమస్తమైన ఆదరణను అనుగ్రహించు దేవుడు, మన ప్రభువైన యేసుక్రీస్తు తండ్రియునైన దేవుడు స్తుతింపబడునుగాక.౹ -2 కొరింథీయులకు 1:3

“సమస్తమైన ఆదరణ” అంటే నీవున్న కృంగిన పరిస్థితి ఎటువంటిది అయినా, ఆ ప్రతీ పరిస్థితిలో నిన్ను ఆదరించేవాడు. బాధ పంచుకుంటే ఆ బాధ భారము తీరుతుంది అని లోకములో అంటారు. అయితే అది దేవునితో పంచుకున్నవాడికే నిజమైన ఆదరణ కలుగుతుంది. హన్నా జీవితమును జ్ఞాపకము చేసుకుంటే, ఆమె వెళుతున్న అవమానకరమైన పరిస్థితిలో, తాను దేవుని సన్నిధిలోనే తన హృదయాన్ని కుమ్మరించింది, అనగా తన బాధను పంచుకుంది.

–సైన్యములకధిపతివగు యెహోవా, నీ సేవకురాలనైన నాకు కలిగియున్నశ్రమను చూచి, నీ సేవకురాలనైన నన్ను మరువక జ్ఞాపకము చేసికొని, నీ సేవకురాలనైన నాకు మగపిల్లను దయచేసినయెడల, వాని తలమీదికి క్షౌరపుకత్తి యెన్నటికి రానియ్యక, వాడు బ్రదుకు దినములన్నిటను నేను వానిని యెహోవావగు నీకు అప్పగింతునని మ్రొక్కుబడి చేసి కొనెను. ఆమె యెహోవా సన్నిధిని ప్రార్థన చేయుచుండగా ఏలీ ఆమె నోరు కనిపెట్టుచుండెను,౹ ఏలయనగా హన్నా తన మనస్సులోనే చెప్పుకొనుచుండెను.౹ ఆమె పెదవులుమాత్రము కదలుచుండి ఆమె స్వరము వినబడక యుండెను గనుక ఏలీ ఆమె మత్తురాలై యున్నదనుకొని –ఎంతవరకు నీవు మత్తురాలవై యుందువు? నీవు ద్రాక్షారసమును నీయొద్దనుండి తీసివేయుమని చెప్పగా హన్నా–అది కాదు, నా యేలినవాడా, నేను మనోదుఃఖము గలదాననై యున్నాను; నేను ద్రాక్షారసమునైనను మద్యమునైనను పానము చేయ లేదుగాని నా ఆత్మను యెహోవా సన్నిధిని కుమ్మరించుకొనుచున్నాను.౹ -1 సమూయేలు 1:11-15

తాను దుఃఖపడటానికి ఏమేమి కారణాలు ఉన్నాయో, తన శ్రమ ఎలా ఉందో అన్ని విషయాలు అన్నీ దేవుని సన్నిధిలో దేవునితో పంచుకుంది. అలాగే మనము కూడా మన ప్రతి పరిస్థితిలో ఆదరించగల దేవుని సన్నిధిలో మన హృదయము కుమ్మరించుకొనినప్పుడు దేవుడు ఖచ్చితముగా ఆదరిస్తాడు.

తల్లిలా ఆదరించేవాడు అని మనము చూసాము. తల్లి ప్రేమను గమనిస్తే, చిన్న పిల్లాడిని ఎత్తుకుని అన్నము తినిపిస్తూ ఉన్నప్పుడు వాడు ఏడుస్తూ ఉన్నప్పుడు, తల్లి ఏమి చెప్తుంది? దూరముగా ఉన్న చందమామ చూపించి వాడికి అన్నము తినిపిస్తుంది. మరొక సందర్భములో పిల్లవాడు పడిపోయాడు వాడికి గాయము అయింది. ఆ సందర్భములో వాడు ఏడుస్తున్నప్పుడు, వాడి గాయమును కట్టి, ఆ నొప్పి వాడు మరిచిపోయేలాగా, వాడిని నిద్రపుచ్చుతుంది. దేవుని ప్రేమ ఎలా ఉందో చూద్దాము.

యెహోవా సీయోనును ఆదరించుచున్నాడు దాని పాడైన స్థలములన్నిటిని ఆదరించి దాని అరణ్యస్థలములను ఏదెనువలె చేయుచున్నాడు దాని యెడారి భూములు యెహోవా తోటవలెనగు నట్లు చేయుచున్నాడు ఆనంద సంతోషములును కృతజ్ఞతాస్తుతియు సంగీతగానమును దానిలో వినబడును -యెషయా 51:3

ఎలా అయితే పిల్లవాడు తల్లికి చెందినవాడో, సీయోను కూడా దేవుని పట్టణము అనగా దేవుడు నివసించు స్థలము. మనము కూడా, దేవుడు నివసించే స్థలమే కదా! అందుకే మన జీవితములో పాడైన స్థలములను అనగా ఎక్కడైతే మనము పాడైన పరిస్థితులలో ఉన్నామో ఆ ప్రతి పరిస్థితిలో మనలన్ను ఆదరించేవాడుగా ఉన్నాడు. సమస్తమైన ఆదరణ అనుగ్రహించువాడు. అరణ్యము అనగా ఏమి లేని స్థితి, అనగా సమస్తము పోగొట్టుకున్న స్థితి. మన జీవితములో అన్నీ పోగొట్టుకున్న స్థితినుండి సమస్తము కలిగిన స్థితిలోనికి మార్చి ఆదరించేవాడుగా ఉన్నాడు. అందుకే మనము దేవుడు మనలో నివసించులాగున మన జీవితములను సిద్ధపరచుకోవాలి. ఎందుకంటే, నీలో నివసించే దేవుడు ఆదరించువాడు, శక్తిమంతుడు. కార్యము జరగమునుపు మనలను ఆదరిస్తాడు. అప్పుడు నీవున్న స్థితిలో ఆదరణపొంది, దేవుని కార్యము కొరకైన నిరీక్షణ కలిగి ఉండగలుగుతావు. అప్పుడు నీ జీవితములో ఖచ్చితముగా దేవుడు కార్యము చేస్తాడు.

మనము గమనించవలసిన ముఖ్యమైన విషయము. దేవుడు మనలో నివసించులాగున మనలను సిద్ధపరచుకోవాలి. ఏదైతే ఆయన నివాసము ఉండకుండా అడ్డుగా ఉన్నాయో, అవన్నీ వదిలిపెట్టి సిద్ధపరచుకోవాలి.

దేవుడు మమ్మును ఏ ఆదరణతో ఆదరించుచున్నాడో, ఆ ఆదరణతో ఎట్టి శ్రమలలో ఉన్నవారినైనను ఆదరించుటకు శక్తిగలవారమగునట్లు, ఆయన మా శ్రమ అంతటిలో మమ్మును ఆదరించుచున్నాడు.౹ -2 కొరింథీయులకు 1:4

ఎటువంటి శ్రమ వచ్చినా సరే దేవుడు ఆదరిస్తున్నాడు అని పౌలు చెప్తున్నాడు. ఎందుకు ఆదరిస్తున్నాడు అని చూస్తే, దేవుని కలిగి జీవించే ఆయన విధానమును బట్టి.

నేను క్రీస్తుతోకూడ సిలువ వేయబడియున్నాను; ఇకను జీవించువాడను నేను కాను, క్రీస్తే నాయందు జీవించుచున్నాడు. నే నిప్పుడు శరీరమందు జీవించుచున్న జీవితము నన్ను ప్రేమించి, నా కొరకు తన్నుతాను అప్పగించుకొనిన దేవుని కుమారుని యందలి విశ్వాసమువలన జీవించుచున్నాను.౹ -గలతీయులకు 2:20

మనము కూడా ఆయన నివసించేవిధముగా మన జీవితమును సిద్దపరచుకుంటే, ఆయన మనలను ఆదరించేవాడుగా ఉంటాడు.

సహోదరులారా, ఆసియలో మాకు తటస్థించినశ్రమనుగూర్చి మీకు తెలియకుండుట మాకిష్టములేదు; అదేదనగా మేము బ్రదుకుదుమను నమ్మకములేక యుండునట్లుగా, మా శక్తికి మించిన అత్యధిక భారమువలన క్రుంగిపోతిమి.౹ మరియు మృతులను లేపు దేవునియందేగాని, మాయందే మేము నమ్మిక యుంచకుండునట్లు మరణమగుదుమను నిశ్చయము మామట్టుకు మాకు కలిగియుండెను.౹ ఆయన అట్టి గొప్ప మరణమునుండి మమ్మును తప్పించెను, ఇక ముందుకును తప్పించును. మరియు మాకొరకు ప్రార్థనచేయుటవలన మీరు కూడ సహాయము చేయుచుండగా, ఆయన ఇక ముందుకును మమ్మును తప్పించునని ఆయనయందు నిరీక్షణ గలవారమై యున్నాము.౹ -2 కొరింథీయులకు 1:8-10

పౌలు మరియు శిష్యులు వెళ్ళిన సందర్భములో వారు చనిపోయే పరిస్థితి వచ్చింది. అనగా వారి జ్ఞానమును బట్టి చూస్తే వారు చనిపోవాల్సిందే. అయితే మృతులను సహితము లేపగలిగిన దేవుని యందే వారు నమ్మిక ఉంచారు. అనగా వారి జ్ఞానమును బట్టి కాక, వారిలో ఉన్న దేవుని జ్ఞానము బట్టి వారు నిరీక్షణ కలిగి వెళ్ళగలిగారు. వారి జీవితములో దేవుని కార్యము స్థిరపరచబడింది. వారే కాదు గానీ మన జీవితములో కూడా అటువంటి సాక్ష్యము దేవుని కొరకు ఇవ్వగలగాలి. దానికి మనము దేవుడు నివసించే స్థలముగా సిద్ధపరచుకోవాలి.