11-Dec-2022 – ఆదివారము మొదటి ఆరాధన

Main Message | మెయిన్ మెసేజ్

దేవుడు ఎవరితో ఉంటాడో వారి జీవితములు జయకరమైన జీవితములుగా ఉంటాయి. మరి మనము ఏమి చేస్తే మన జీవితములు జయకరముగా ఉంటాయో ఈరోజు మనము తెలుసుకుందాము.

ద్వితీయోపదేశకాండములో గనుక చూస్తే, దేవుడు ఇలా అంటున్నాడు, “నా ఆజ్ఞల ప్రకారము నడుచుకోండి. ఇదే కదా నిన్ను అడుగుతున్నాను”. మనము పెద్ద పెద్ద బరువులు మోయనక్కరలేదు కానీ ప్రభువు ఆజ్ఞలప్రకారము నడుచుకొనుటమాత్రమే చాలు. ఆయన ఆజ్ఞల ప్రకారము నడుచుకోవడము కొరకే మనము సృష్టించబడ్డాము.

మరియు వాటియందు మనము నడుచుకొనవలెనని దేవుడు ముందుగా సిద్ధపరచిన సత్‌క్రియలు చేయుటకై, మనము క్రీస్తుయేసునందు సృష్ఠింపబడినవారమై ఆయన చేసిన పనియైయున్నాము – ఎఫెసీ 2:10.

ఏది సత్క్రియ అని మనకు ఎలా తెలుస్తుంది? కేవలము దేవుని వాక్యమే తెలియచేస్తుంది. మనము మంచి అనుకునే మన జ్ఞానానుసారమైన క్రియలు మురికి గుడ్డలు అని వాక్యము చెప్పుచున్నది. దేవుని లేఖనములద్వారానే మనకు ఏది మంచి అని తెలుస్తుంది కనుక దేవుని వాక్యము ప్రకారము చెయ్యడమే సత్క్రియలు చెయ్యడము. అలా కాని యెడల మనము విడిచిపెట్టబడేవారముగా అయిపోతాము.

ఆయన సమస్తమైన దుర్నీతినుండి మనలను విమోచించి, సత్‌క్రియలయందాసక్తిగల ప్రజలను తన కోసరము పవిత్రపరచుకొని తన సొత్తుగా చేసికొనుటకు తన్నుతానే మనకొరకు అర్పించుకొనెను – తీతు 2:14.

ఆ కలువరి సిలువలో యేసయ్య చేసిన త్యాగము ఫలించాలి అంటే, ఖచ్చితముగా నీవు చెయ్యవలసినది ఒకటి ఉంది. అది ఏమిటి అంటే, సత్క్రియలయందు ఆసక్తి కలిగి ఉండాలి. ప్రభువు వాక్య ప్రకారము నా జీవితాన్ని కట్టుకోవాలి అనే ఆసక్తి కలిగి ఉండాలి. కొంతమంది ఈ ఆసక్తిని సంఘములో ఇతరులు చూసేలాగున ప్రదర్శిస్తారు. అయితే ఇతరులు చూచులాగున కాదుగాని, నీకొరకు ప్రాణము పెట్టిన యేసయ్య కొరకు నీ జీవితము జీవించాలి. దేవుడు నీ కొరకు ఇచ్చిన వాక్యము ప్రకారము నీవు నడుచుకోవడానికి సిద్ధపడటమే సత్క్రియల యందు ఆసక్తి కలిగి ఉండటము.

కొంతమందిని గమనించినప్పుడు క్రైస్తవ విశ్వాసులుగా ఉన్నప్పటికీ పాపము వారి జీవితాలను ఏలేదిగా ఉంటుంది. అలా ఎందుకు అంటే వారికి ఆసక్తి లేకపోవడం బట్టి. అయితే నీవు గనుక దేవుని వాక్కు నేను నెరవేర్చాలి అనే ఆసక్తి కలిగి ఉంటే, నీవు జయించలేని పాపమైనాకూడా దేవుడు నీ ఆసక్తిని బట్టి నీకు జయము అనుగ్రహించేవాడుగా ఉంటాడు. ఎప్పటికప్పుడు నీ ఓటమిలలో నీ ప్రభువు దేనికొరకు ప్రాణము పెట్టాడో జ్ఞాపకము చేసుకోవటము ద్వారా తిరిగి సమకూర్చుకోగలుగుతావు. పౌలు కూడా అందుకే “నేను ఎప్పుడు బలహీనుడనో అప్పుడే బలవంతుడను” అని చెప్పగలుగుతున్నాడు. దేవుని కృప నీ కొరకే ఉంది అనే సత్యము ఎరిగి జీవించు. ఆరిపోయిన దీపము వలె మన జీవితము ఉండకూడదు. ఎక్కడైనా మనము ఆరిపోయిన స్థితిలో ఉన్నామా? మనము ఆరిపోయిన స్థితిలో ఉండటానికి కాదు కానీ, వెలిగించబడి అనేకమైన వారికి వెలుగుగా ఉండుటకై నిన్ను ప్రభువు రక్షించుకున్నాడు. మన ప్రభువు సత్యవంతుడు, నిజమైనవాడు. నీకు గనుక ఆసక్తి ఉంటే ఆయన వాక్యము ప్రకారము చేసి అనుభవించు.

ఈ మాట నమ్మదగినది గనుక దేవునియందు విశ్వాసముంచినవారు సత్‌క్రియలను శ్రద్ధగా చేయుటయందు మనస్సుంచునట్లు నీవీసంగతులనుగూర్చి దృఢముగా చెప్పుచుండవలెనని కోరుచున్నాను. ఇవి మంచివియు మనుష్యులకు ప్రయోజనకరమైనవియునై యున్నవి – తీతు 3:8

ఏ సత్క్రియలైతే నీవు చేస్తున్నావో, అవి నీకు ప్రయోజనకరమైనవిగా ఉన్నాయి అని వాక్యము చెప్పుచున్నది.

మరియు యొప్పేలో తబితా అను ఒక శిష్యురాలు ఉండెను; ఆమెకు భాషాంతరమున దొర్కా అని పేరు. ఆమె సత్‌ క్రియలను ధర్మకార్యములను బహుగా చేసి యుండెను. ఆ దినములయందామె కాయిలాపడి చని పోగా, వారు శవమును కడిగి మేడ గదిలో పరుండ బెట్టిరి. – అపొస్తలుల కార్యములు 9:36-37.

తబిత సత్క్రియలు చేస్తూ తన జీవితము కొనసాగించుచున్నది. అయితే తాను రోగముచేత చనిపోయినది. తన శరీరమును భూస్థాపన చేయుటకొరకై సిద్ధపరచినారు. అయితే దేవుని కార్యమును చూద్దాము –

లుద్ద యొప్పేకు దగ్గరగా ఉండుటచేత పేతురు అక్కడ ఉన్నాడని శిష్యులు విని, అతడు తడవుచేయక తమయొద్దకు రావలెనని వేడుకొనుటకు ఇద్దరు మనుష్యులను అతని యొద్దకు పంపిరి. పేతురు లేచి వారితోకూడ వెళ్లి అక్కడ చేరినప్పుడు, వారు మేడగదిలోనికి అతనిని తీసికొని వచ్చిరి; విధవరాండ్రందరు వచ్చి యేడ్చుచు, దొర్కా తమతోకూడ ఉన్నప్పుడు కుట్టిన అంగీలును వస్త్రములును చూపుచు అతని యెదుట నిలిచిరి. పేతురు అందరిని వెలుపలికి పంపి మోకాళ్లూని ప్రార్థనచేసి శవమువైపు తిరిగితబితా, లెమ్మనగా ఆమె కన్నులు తెరచి పేతురును చూచి లేచి కూర్చుండెను. – అపొస్తలుల కార్యములు 9:38-40.

నీ క్రియలు నీ వెంట వచ్చును. నీవు సత్క్రియలు గనుక చేస్తే అవే నీ వెంట వచ్చి నీకు ప్రయోజనకరమైనవిగా ఉంటాయి. తబిత ఇంటికి పేతురు ఏ ఉద్దేశ్యముతో వెళ్ళాడో మనకు తెలియదు గానీ, తబిత చేసిన సత్క్రియలు ప్రకటించబడుతున్నప్పుడు పేతురు ద్వారా తబిత జీవము తిరిగి పొందుకొనులాగున పరిశుద్ధాత్మ దేవుడు పేతురు ద్వారా కార్యము జరిగించాడు. వాక్యము మనకు నేర్పిస్తున్న సందర్భములో మనము లోబడాలి.

శతాధిపతి యేసునుగూర్చి విని, ఆయన వచ్చి తన దాసుని స్వస్థపరచవలెనని ఆయనను వేడుకొనుటకు యూదుల పెద్దలను ఆయన యొద్దకు పంపెను. వారు యేసునొద్దకు వచ్చినీవలన ఈ మేలు పొందుటకు అతడు యోగ్యుడు; అతడు మన జనులను ప్రేమించి మనకు సమాజమందిరము తానే కట్టించెనని ఆయనతో చెప్పి మిక్కిలి బతిమాలు కొనిరి. – లూకా 7: 3-5.

ఈ శతాధిపతి దేవుని ప్రజలను ప్రేమించి వారికొరకై ఒక సమాజమందిరమును కట్టించాడు. ఆయన చేసిన ఆ మంచి కార్యమును బట్టి మేలు పొందుటకు అర్హుడుగా ఎంచబడ్డాడు. ఈ మేలు ఏమిటి అని చూస్తే, తన దాసుని జీవితములో జరిగిన అద్భుతము.

పాత నిబంధనలో మనము చూస్తే,

ఒక దినమందు ఎలీషా షూనేము పట్టణమునకు పోగా అచ్చట ఘనురాలైన యొక స్త్రీభోజనమునకు రమ్మని అతని బలవంతముచేసెను గనుక అతడు ఆ మార్గమున వచ్చినప్పుడెల్ల ఆమె యింట భోజనము చేయుచువచ్చెను. ఒక దినమందు ఎలీషా షూనేము పట్టణమునకు పోగా అచ్చట ఘనురాలైన యొక స్త్రీభోజనమునకు రమ్మని అతని బలవంతముచేసెను గనుక అతడు ఆ మార్గమున వచ్చినప్పుడెల్ల ఆమె యింట భోజనము చేయుచువచ్చెను. – 2 రాజులు 4: 8-10.

అప్పుడు ఎలీషా ఎమంటున్నాడు అంటే,

అతడునీవు ఇంత శ్రద్ధా భక్తులు మాయందు కనుపరచితివి నీకు నేనేమి చేయవలెను? రాజుతోనైనను సైన్యాధిపతితోనైనను నిన్నుగూర్చి నేను మాటలాడవలెనని కోరుచున్నావా అని అడుగుమని గేహజీకి ఆజ్ఞ ఇయ్యగా వాడు ఆ ప్రకారము ఆమెతో అనెను. అందుకామెనేను నా స్వజనులలో కాపురమున్నాననెను – 2 రాజులు 4:13.

ఆమె దేవుని మాటప్రకారము తాను జీవించడానికి సిద్ధపడింది. అందుకే దైవజనుడు అని తెలిసికొన్నది కనుక ఆయనను ఘనపరచింది. ఆమె చేసిన సత్క్రియలు ఆమెకు ప్రయోజనకరమైనవిగా మారి మూయబడిన తన గర్భము తెరువబడింది. నీవు చేసిన సత్క్రియల ఫలము నీవు పొందటానికి ఒక సమయము ఉంది. ఆ సమయము వచ్చినప్పుడు అద్భుతముగా నీ జీవితంలో మేలు ఖచ్చితముగా జరిగించబడుతుంది. తబిత జీవితములో చూస్తే తన ప్రాణము పోగొట్టుకుంది. ఈ షూనేమీయురాలు కొదువ కలిగి ఉన్నది. ఈ ఇద్దరి పరిస్థితులలో జీవము పొందుకున్నారు, కొదువ తీర్చబడింది. మనముకూడా వాక్య ప్రకారము మనము చెయ్యడానికి సిద్ధపడితే ఆ సత్క్రియలను బట్టి నీవు ప్రయోజనకరమైన మేలులను మనము పొందుకోగలుగుతాము.