12-05-2024 – ఆదివారం మొదటి ఆరాధన

వారము కొరకైన వాక్యము

స్త్రీ ప్రసవించునప్పుడు ఆమె గడియ వచ్చెను గనుక ఆమె వేదనపడును; అయితే శిశువు పుట్టగానే లోకమందు నరుడొకడు పుట్టెనను సంతోషముచేత ఆమె ఆ వేదన మరి జ్ఞాపకము చేసికొనదు.౹ -యోహాను 16:21

తల్లి యొక్క ప్రేమ ఎందుకు గొప్పది అంటే, ప్రసవ వేదన ఎంతో ఎక్కువ. దానికొరకు తన శక్తినంతా కూడగట్టుకొని ఆ నొప్పి భరించి తన బిడ్డకు జన్మనిస్తుంది. ఆ సమయములో ప్రాణము కూడా పోయేంతగా శ్రమపడి బిడ్డకు జన్మనిస్తుంది. ఆ పుట్టిన బిడ్డను చూడగానే పడినవేదన అంతా మర్చిపోతుంది.

అయితే అంతకంటే ఎక్కువైన ప్రేమ యేసయ్యది. తల్లి ప్రాణము పోయేంతగా శ్రమ అనుభవించి బిడ్డకు జన్మనిస్తుంది. అయితే, యేసయ్య ప్రాణము పెట్టి మరీ మనలను తిరిగి జన్మించింపచేసిన ప్రేమ కలవాడు.

ఒకని తల్లి వానిని ఆదరించునట్లు నేను మిమ్మును ఆద రించెదను యెరూషలేములోనే మీరు ఆదరింపబడెదరు. -యెషయా 66:13

అనగా తల్లి ఖచ్చితముగా ఆదరిస్తుంది. యేసయ్య కూడా మనలను ఆదరించేవాడుగా ఉన్నాడు. మనము ఎటువంటి శ్రమలో ఉన్నప్పటికీ, తల్లి వద్ద ఉన్నప్పుడు మనము ఎంతో ఆదరణ కలిగి ఉంటాము. ఒక తల్లి మనసు ఎప్పూడూ తన పిల్లల మీదే ఉంటుంది. అలాగే యేసయ్య కూడా మనలను అలాగే ఆదరించేవాడిగా ఉంటాడు.

దేవుడు మమ్మును ఏ ఆదరణతో ఆదరించుచున్నాడో, ఆ ఆదరణతో ఎట్టి శ్రమలలో ఉన్నవారినైనను ఆదరించుటకు శక్తిగలవారమగునట్లు, ఆయన మా శ్రమ అంతటిలో మమ్మును ఆదరించుచున్నాడు.౹ -2 కొరింథీయులకు 1:4

ఈ మాటలు నిజమా కాదా అని చూస్తే –

సహోదరులారా, ఆసియలో మాకు తటస్థించినశ్రమనుగూర్చి మీకు తెలియకుండుట మాకిష్టములేదు; అదేదనగా మేము బ్రదుకుదుమను నమ్మకములేక యుండునట్లుగా, మా శక్తికి మించిన అత్యధిక భారమువలన క్రుంగిపోతిమి.౹ మరియు మృతులను లేపు దేవునియందేగాని, మాయందే మేము నమ్మిక యుంచకుండునట్లు మరణమగుదుమను నిశ్చయము మామట్టుకు మాకు కలిగియుండెను.౹ ఆయన అట్టి గొప్ప మరణమునుండి మమ్మును తప్పించెను, ఇక ముందుకును తప్పించును. మరియు మాకొరకు ప్రార్థనచేయుటవలన మీరు కూడ సహాయము చేయుచుండగా, ఆయన ఇక ముందుకును మమ్మును తప్పించునని ఆయనయందు నిరీక్షణ గలవారమై యున్నాము.౹ -2 కొరింథీయులకు 1:8-10

ఇక్కడ చూస్తే, మరణకరమైన స్థితిలో దేవుడు వారిని ఆదరించినవాడుగా ఉన్నాడు. వారి పరిస్థితి చూస్తే, ఇంక మరణము తప్పని పరిస్థితి. అయినప్పటికీ దేవుని ఆదరణ బట్టి, వారు తప్పించబడ్డారు.

ఉదాహరణకు పిల్లవాడికి దెబ్బ తగిలితే, ఆ తల్లి ఏమి చెప్తుంది అని చూస్తే, ఏమీ కాదురా అని దగ్గరకు తీసుకుంటే వాడు ఏడుపు ఆపివేసేవాడిగా ఉంటాడు. అయితే యేసయ్య ప్రేమ, ఆదరణ క్రియల ద్వారా కనపరచబడుతుంది.

తల్లి తన బిడ్డను చేర్చుకొనేది గా ఉంది. కోడిని చూస్తే, తన పిల్లలను కాపాడవలనెననే నిశ్చయతతో తన రెక్కలు చాపి తన పిల్లలను కాపాడుతుంది. అంతకు ముందువరకు ఒకవేళ కోపముగా ఉన్నప్పటికీ, తన పిల్లలు అపాయములో ఉన్నారు అని తెలిస్తే వెంటనే వారిని రక్షించుకోవడానికి సమస్తము చేసేదిగా ఉంటుంది.

యేసయ్య పృఎమను చూస్తే, ఆయన రక్తము మన కొరకు మొరపెడుతుంది. కాబట్టే మనము ఇంకా సజీవుల లెక్కలో ఉంటున్నాము. ఆయన ప్రేమ, నీ కష్టములో, నష్టములో విస్తరిస్తుంది.

అయితే స్తన్యమిచ్చు తల్లి తన సొంత బిడ్డలను గారవించునట్లుగా, మేము మీమధ్యను సాధువులమై యుంటిమి.౹ -1 థెస్సలొనీకయులకు 2:7
కాగా దేవుడు తన ఐశ్వర్యము చొప్పున క్రీస్తుయేసునందు మహిమలో మీ ప్రతి అవ సరమును తీర్చును.౹ -ఫిలిప్పీయులకు 4:19

తల్లి తన బిడ్డలకు పాలిచ్చినపుడు తన బిడ్డను ముద్దుచేస్తుంది, వాడికి కంఫర్ట్ ఇస్తుంది. ఉదాహరణకు మనము మూడుపూటల వేర్వేరు ఆహారముల ద్వారా బలపరచబడతాము. అయితే చిన్న బిడ్డలకు అవసరమైన ప్రతీదీ తల్లి పాలనుండే వస్తుంది. అలాగే మనకు అవసరమైన సమస్తము కూడా యేసయ్యలోనే మనకు ఇవ్వబడుతుంది.

చిన్న పిల్లలను చూస్తే, వాడికి తల్లి పాలు తాగాలి అనే విషయము ఎవరూ నేర్పించక్కరలేదు. కానీ మరుజన పొందిన మనము యేసయ్యలోనే సమస్తము మనము ఉన్నవనే సత్యము గ్రహించలేనివారముగ ఉంటున్నాము.

స్త్రీ తన గర్భమున పుట్టిన బిడ్డను కరుణింపకుండ తన చంటిపిల్లను మరచునా? వారైన మరచుదురు గాని నేను నిన్ను మరువను. -యెషయా 49:15

అంటే స్త్రీ తాను జన్మనిచ్చిన బిడ్డను మర్చిపోనే మర్చిపోదు. ఒకవేళ వారైనా మర్చిపోతారేమో గానీ, నీ దేవుడు మాత్రము మర్చిపోనే మర్చిపోడు. తల్లిదండ్రులు పరిస్థితులను బట్టి మారతారేమో గానీ, యేసయ్య మాత్రం మారనివాడిగా ఉంటున్నాడు.

యేసయ్య తన ప్రాణాన్ని పెట్టి మనకు నూతన జీవితమును ఇచ్చారు. అనగా ప్రాణమును పెట్టే సమయము లో ఏ బాధ ఉంటుందో ఎరిగినవాడుగా ఉన్నాడు. గనుకనే నీ ప్రాణము పోయే సమయములో ఆయన నిన్ను విడిచిపెట్టి ఉండలేదు.

అయితే సీయోను–యెహోవా నన్ను విడిచిపెట్టి యున్నాడు ప్రభువు నన్ను మరచియున్నాడని అనుకొనుచున్నది. -యెషయా 49:14

కొన్ని సార్లు దేవుడు మనలను విడిచిపెట్టాడు అని అనుకుంటాము. అయితే ఈ వాక్యము అలా ఎన్నడు విడిచిపెట్టడు అనే సత్యమును జ్ఞాపకము చేస్తుంది.

యెహోవా సీయోనును ఆదరించుచున్నాడు దాని పాడైన స్థలములన్నిటిని ఆదరించి దాని అరణ్యస్థలములను ఏదెనువలె చేయుచున్నాడు దాని యెడారి భూములు యెహోవా తోటవలెనగు నట్లు చేయుచున్నాడు ఆనంద సంతోషములును కృతజ్ఞతాస్తుతియు సంగీతగానమును దానిలో వినబడును -యెషయా 51:3

మన దేవుడు మనలను విడిచిపెట్టే వాడు కాదు. పాడైన స్థితిలో ఉన్న బాధనుండి విడిచిపెట్టడానికే ఇష్టము కలిగినవాడుగా నీ దేవుడూ ఉంటాడు.

చూడుము నా యరచేతులమీదనే నిన్ను చెక్కి యున్నాను నీ ప్రాకారములు నిత్యము నాయెదుట నున్నవి -యెషయా 49:16

అనగా దేవుని కళ్ళ యెదుటనే నీవు నీ జీవితము ఎల్లప్పుడు ఉన్నాయి, ఆయన నిన్ను మర్చిపోయేది లేనే లేదు. నీవున్న స్థితి నిరాశగా ఉంటే, నిన్ను ఆ స్థితిలోనే విడిచిపెట్టడు. పాడైన సీయోను స్థలములన్నీ ఎలా అయితే ఆదరించాడో, అలాగే మనలను కూడా విడిచిపెట్టక పాడైన పరిస్థితులను సరిచేసి, సకలము సమృద్ధిగా చేసేవాడుగా మన దేవుడు ఉన్నాడు.