11-06-2023 – ఆదివారం రెండవ ఆరాధన – మాట తప్పని దేవుడు

మెయిన్ మెసేజ్

ఈరోజు “మాట తప్పని వాడు” అనే విషయము గూర్చి తెలుసుకుందాము. ఏ విధముగా దేవుని ఆశీర్వాదము మనము పొందుకోవచ్చు అని చూస్తే,

మాదీయుడగు అహష్వేరోషుయొక్క కుమారుడైన దర్యావేషు కల్దీయులపైన రాజాయెను.౹ అతని ఏలుబడిలో మొదటి సంవత్సరమందు దానియేలను నేను యెహోవా తన ప్రవక్తయగు యిర్మీయాకు సెలవిచ్చి తెలియజేసినట్టు, యెరూషలేము పాడుగా ఉండవలసిన డెబ్బది సంవత్సరములు సంపూర్తియౌచున్నవని గ్రంథములవలన గ్రహించితిని.౹ -దానియేలు 9:1-2

యిర్మియా ద్వారా చెప్పబడిన సంగతులు గ్రంథము ద్వారా తెలుసుకొని వాటి ప్రకారము చేయడానికి సిద్ధపడ్డాడు. మనము కూడా దేవుని వాక్య ప్రకారముగా చేయడానికి సిద్ధపడాలి.

ఇతడు అహాబు కుమార్తెను పెండ్లి చేసికొని యుండెను గనుక అహాబు కుటుంబికులవలెనే ఇతడును ఇశ్రాయేలురాజులు ప్రవర్తించినట్లు ప్రవర్తించుచు యెహోవా దృష్టికి చెడుతనము జరిగించెను.౹ అయినను యెహోవా సదాకాలము తన సేవకుడగు దావీదునకును అతని కుమారులకును దీపము నిలిపెదనని మాట యిచ్చి యుండెను గనుక అతని జ్ఞాపకముచేత యూదాను నశింప జేయుటకు ఆయనకు మనస్సు లేకపోయెను.౹ -2 రాజులు 8:18-19

ఇక్కడ చూస్తే, దేవుని హృదయము గ్రహిస్తే, ఆయన తాను ఇచ్చిన మాటను జ్ఞాపకము చేసుకొనేవాడుగా ఉన్నాడు. ఆయన ఇచ్చిన మాట ప్రకారము చేయడానికి ఇష్టపడేవాడుగా ఉన్నాడు. మన దేవుడు వాగ్దానమును ఇచ్చినప్పుడు ఆ వాగ్దానము పరిస్థితులను బట్టి మారిపోదు గానీ, అననుకూలముగా ఉన్నప్పటికీ నెరవేర్చేవాడుగా ఉన్నాడు.

మోషే కొండదిగకుండ తడవుచేయుట ప్రజలు చూచినప్పుడు ఆ ప్రజలు అహరోనునొద్దకు కూడి వచ్చి –లెమ్ము, మా ముందర నడుచుటకు ఒక దేవతను మాకొరకు చేయుము. ఐగుప్తులోనుండి మమ్మును రప్పించిన ఆ మోషే అనువాడు ఏమాయెనో మాకు తెలియదని అతనితో చెప్పిరి.౹ అందుకు అహరోను–మీ భార్యలకు మీ కుమారులకు మీ కుమార్తెలకు చెవులనున్న బంగారు పోగులను తీసి నాయొద్దకు తెండని వారితో చెప్పగా ప్రజలందరు తమ చెవులనున్న బంగారు పోగులను తీసి అహరోను నొద్దకు తెచ్చిరి.౹ -నిర్గమకాండము 32:1-3

ఇక్కడ మోషే కొండమీద ఆలస్యము చేసినప్పుడు, ఇశ్రాయేలు ప్రజలు ఇంతవరకు నడిపిన దేవుడిని విడిచిపెట్టడానికి సిద్ధపడే సందర్భము ఇది. అయితే మన ఫోకస్ దేవునికి మోషేకు జరుగుతున్న సంభాషణ.

మరియు యెహోవా ఇట్లనెను–నేను ఈ ప్రజలను చూచియున్నాను; ఇదిగో వారు లోబడనొల్లని ప్రజలు.౹ కావున నీవు ఊరకుండుము; నాకోపము వారిమీద మండును, నేను వారిని కాల్చివేసి నిన్ను గొప్ప జనముగా చేసెదనని మోషేతో చెప్పగా -నిర్గమకాండము 32:9-10

ఒకవేళ మన జీవితములో కూడా కొన్నిసార్లు ఆలస్యము చేతనో, మరేకారణము చేతనో మన దేవునిని విడిచిపెట్టేవారముగా అయిపోతాము. అయితే మన దేవుడు ఎలా మన జీవితములో కార్యము చేస్తున్నాడో అని సత్యము ఎరిగినట్టయితే, అలా తప్పిపోము.

మోషే తన దేవుడైన యెహోవాను బ్రతిమాలుకొని–యెహోవా, నీవు మహాశక్తివలన బాహుబలము వలన ఐగుప్తుదేశములోనుండి రప్పించిన నీ ప్రజలమీద నీ కోపము మండనేల? –ఆయన కొండలలో వారిని చంపునట్లును భూమిమీదనుండి వారిని నశింపచేయునట్లును కీడుకొరకే వారిని తీసికొని పోయెనని ఐగుప్తీయులు ఏల చెప్పుకొనవలెను? నీ కోపాగ్నినుండి మళ్లుకొని నీవు నీ ప్రజలకు ఈ కీడుచేయక దానిగూర్చి సంతాపపడుము.౹ నీ సేవకులైన అబ్రాహామును ఇస్సాకును ఇశ్రాయేలును జ్ఞాపకము చేసికొనుము. నీవు వారితో–ఆకాశనక్షత్రములవలె మీ సంతానము అభివృద్ధిజేసి నేను చెప్పిన యీ సమస్తభూమిని మీ సంతానమున కిచ్చెదననియు, వారు నిరంతరము దానికి హక్కుదారులగుదురనియు వారితో నీతోడని ప్రమాణముచేసి చెప్పితివనెను.౹ అంతట యెహోవా తన ప్రజలకు చేసెదనని చెప్పిన కీడునుగూర్చి సంతాపపడెను. -నిర్గమకాండము 32:11-14

ఇక్కడ మోషే మాటలు గమనిస్తే, ఐగుప్తీయులు నీగురించి చెడ్డగా చెప్పుకోవడానికి ఎందుకు అవకాశము ఇవ్వాలి? మరొకలా చూస్తే, “దేవా నీవు వాగ్దానము చేసావు కదా, ఆ వాగ్దానము నెరవేరకపోతే ఐగుప్తీయులు నీ గురించి చెడుగా మాట్లాడుకుంటారు కదా!” అని అడుగుతున్నాడు. మన జీవితాలను మనము జ్ఞాపకము చేసుకుంటే, మనము దేవుని మాటను పట్టుకొనేవారిగా ఉండాలి. ఆయన సన్నిధిలో, నీవు నెరవేర్చగలవు అని ఆ మాటనే పట్టుకోండి. ఒకవేళ అననుకూల పరిస్థితులు వచ్చినా సరే, మోషే పలికినట్టుగా మనము కూడా సత్యము ఎరిగి ఆయన సన్నిధిలో నిలబడాలి.

నా చిత్తమంతా కూడా నేనే నెరవేర్చుకుంటాను అని దేవుడు చెప్పాడు. నెరవేర్చేది ఆయనే గానీ నిలబడవలసినది మనమే. ఎలా నిలబడాలో, మోషేను చూసి మనము నేర్చుకుందాము. వాగ్దానమును నెరవేర్చడనికి ఆయన సిద్ధపడేవాడు, ఇష్టపడేవాడు.