10-09-2023 – ఆదివారం మొదటి ఆరాధన – అపవాదిని ఓడించడానికి

వారము కొరకైన వాక్యము

మనము ఆత్మీయముగా కట్టబడాలి అనే ఆశ కలిగి, సిద్ధపాటు కలిగి ఉంటాము. అయితే, అపవాది మనలను పడగొట్టడానికి అనేకమైన ప్రయత్నాలు చేస్తూనే ఉంటాడు. మనము అపవాది తంత్రములు ఎరగకపోతే, ఎంతగా మనము ఆత్మీయముగా ఎదిగినప్పటికీ, అపవాది సమయము చూసి ప్రయోగించే తంత్రములకు పడిపోయేవారిగా ఉంటాము.

ఏలయనగా మనము పోరాడునది శరీరులతో కాదు, గాని ప్రధానులతోను, అధికారులతోను, ప్రస్తుత అంధకారసంబంధులగు లోక నాథులతోను, ఆకాశమండలమందున్న దురాత్మల సమూహములతోను పోరాడుచున్నాము.౹ -ఎఫెసీయులకు 6:12

“మనము” అనే మాటలో నీవు కూడా ఉన్నావా? అనగా, నీవు పోరాడునది శరీరులతో కాదు, గాని ప్రధానులతోను, అధికారులతోను, ప్రస్తుత అంధకారసంబంధులగు లోక నాథులతోను, ఆకాశమండలమందున్న దురాత్మల సమూహములతోను పోరాడుచున్నావు అని గ్రహించగలుగుతున్నావా? ఆత్మీయమైన జీవితములో ఈ పోరాటము ఉంటుంది అనే విషయము కూడా చాలామందికి తెలియదు. అయితే మనము ఈ సత్యము అనగా అపవాది ఎలా మనమీద దాడి చేస్తాడు, దానినుండి ఎలా మనము తప్పించుకోవాలి అనే సత్యము ఎరిగి ఉండాలి. ఒకసారి యోబు జీవితాన్ని ధ్యానము చేస్తే, ఈ విషయము స్పష్టముగా మనకు తెలుస్తుంది.

దేవదూతలు యెహోవా సన్నిధిని నిలుచుటకై వచ్చిన దినమొకటి తటస్థించెను. ఆ దినమున అపవాది యగు వాడు వారితో కలిసి వచ్చెను. యెహోవా–నీవు ఎక్కడనుండి వచ్చితివని వానినడుగగా అపవాది–భూమి మీద ఇటు అటు తిరుగులాడుచు అందులో సంచరించుచు వచ్చితినని యెహోవాకు ప్రత్యుత్తర మిచ్చెను. అందుకు యెహోవా–నీవు నా సేవకుడైన యోబు సంగతి ఆలో చించితివా? అతడు యథార్థవర్తనుడును న్యాయవంతుడునై దేవునియందు భయభక్తులుకలిగి చెడుతనము విసర్జించినవాడు, భూమిమీద అతనివంటివాడెవడును లేడు అని అడుగగా అపవాది–యోబు ఊరకయే దేవునియందు భయభక్తులు కలవాడాయెనా? నీవు అతనికిని అతని యింటివారికిని అతనికి కలిగిన సమస్తమునకును చుట్టు కంచె వేసితివి గదా? నీవు అతనిచేతిపనిని దీవించుచుండుటచేత అతని ఆస్తి దేశములో బహుగా విస్తరించియున్నది. -యోబు 1:6-10

అపవాది మాటలు చూస్తే, యోబుకు కలిగిన ప్రతి దానికి దేవుడవైన నీవు కంచెవేసావు కదా అని అడుగుతున్నాదు. అసలు అపవాదికి కంచెవేయబడి ఉంది ఎలా తెలిసింది? అంటే అప్పటికే యోబును నష్టపరచడానికి అనేకమైన ప్రయత్నాలు చేసాడు అనే కదా అర్థము. అయితే ఒక్కసారి అకస్మాత్తుగా యోబు జీవితములో ఆపద కలిగింది.

ఒకదినమున యోబు కుమారులును కుమార్తెలును తమ అన్నయింట భోజనముచేయుచు ద్రాక్షారసము పానముచేయుచునుండగా ఒక దూత అతనియొద్దకు వచ్చి –ఎద్దులు నాగలి దున్నుచు గాడిదలు వాటి సమీపమున మేయుచునుండగా షెబాయీయులు వాటిమీదపడి వాటిని పట్టుకొనిపోయి ఖడ్గముతో పనివారిని హతము చేసిరి. జరిగినది నీకు తెలియజేయుటకు నేనొక్కడనే తప్పించుకొని వచ్చియున్నాననెను. అతడు ఇంక మాటలాడుచుండగా మరియొకడు వచ్చి–దేవుని అగ్ని ఆకా శమునుండి పడి గొఱ్ఱెలను పనివారిని రగులబెట్టి కాల్చి వేసెను; దానిని నీకు తెలియజేయుటకు నేనొక్కడనే తప్పించుకొని వచ్చియున్నాననెను. అతడు ఇంక మాటలాడుచుండగా మరియొకడు వచ్చి–కల్దీయులు మూడు సమూహములుగా వచ్చి ఒంటెలమీదపడి వాటిని కొనిపోయి ఖడ్గముచేత పనివారిని చంపిరి; నీకు దానిని తెలియజేయుటకు నేనొక్కడనే తప్పించుకొని వచ్చియున్నాననెను. అతడు మాటలాడుచుండగా వేరొకడు వచ్చి– నీ కుమారులును నీ కుమార్తెలును తమ అన్న యింట భోజనముచేయుచు ద్రాక్షారసము పానముచేయుచుండగా గొప్ప సుడిగాలి అరణ్యమార్గముగా వచ్చి ఆ యింటి నాలుగు మూలలను కొట్టగా అది యౌవనులమీద పడినందునవారు చనిపోయిరి; దానిని నీకు తెలియజేయుటకు నేనొక్కడనే తప్పించుకొని వచ్చియున్నాననెను. -యోబు 1:13-19

అయితే ఈ నష్టము వెనుక అపవాది కార్యము, ప్రయత్నము ఉన్నట్టుగా యోబుకు తెలుసా? అస్సలు తెలియదు. అలాగే మన జీవితములో కూడా మనలను నాశనము చేయడానికి అపవాది ఖచ్చితముగా ప్రయత్నిస్తున్నాడు. అందుకే అపవాది తంత్రములను ఎరిగినవారుగా మనము ఉండాలి. అందుకే మనము మనుష్యులతో కాదు పోరాడేది అనే విషయము మనము ఎరిగి ఉండాలి. మన జీవితాలలో అపవాది ఖచ్చితముగా దాడి చేస్తాడు. అయితే ఎలా మనము దాడి జరగకుండా మనలను కాపాడుకోవాలి? అలాగే దాడి జరిగినా కూడా ఎలా మనము నిలబడాలి అనేది మనము తెలుసుకుందాము.

నేనే ద్వారమును; నా ద్వారా ఎవడైన లోపల ప్రవేశించినయెడల వాడు రక్షింపబడినవాడై, లోపలికి పోవుచు బయటికి వచ్చుచు మేత మేయుచునుండును.౹ -యోహాను 10:9

ఇక్కడ కాపరి గురించి చెప్తూ, “సంఘమునకు నేనే ద్వారమును” అని చెప్పుచున్నాడు. అంటే, సంఘములోని బిడ్డల ఆశీర్వాదమునకు ద్వారముగా ఉన్నాడు అని అర్థము. ఒకవేళ సింహమో, పులియో కాపరిని చంపేస్తే, గొర్రెలను సునాయాసముగా పట్టుకోవచ్చు. అలాగే సంఘకాపరి కూడా అపవాది దాడులకు భయపడని వాడుగా ఉండాలి.

సీమోనూ, సీమోనూ, ఇదిగో సాతాను మిమ్మును పెట్టి గోధుమలవలె జల్లించుటకు మిమ్మును కోరుకొనెను గాని నీ నమ్మిక తప్పిపోకుండునట్లు నేను నీకొరకు వేడుకొంటిని; నీ మనసు తిరిగిన తరువాత నీ సహోదరులను స్థిరపరచుమని చెప్పెను. -లూకా 22:31-32

అపవాది అనేక రకాలుగా ప్రయత్నాలు చేసాడు అనే సంగతి సీమోనుకు తెలియదు. జల్లెడపట్టడము అంటే ఎక్కడ దొరుకుతాడో అని కనిపెట్టి వెతకడము. ఆ పరిస్థితులలో సీమోను నమ్మిక కోల్పోయే స్థితిలోనిని అతను వెళ్ళబోతున్నాదు అని ముందే యెరిగిన యేసయ్య తన కొరకు ప్రార్థించాడు అనే సంగతి ఇక్కడ మనము చూడగలము. అదేవిధముగా మన జీవితములో కూడా అపవాది ఇలాగే ప్రయత్నిస్తాడు అని మనము ఎరిగి ఉండాలి. అయితే ఈ సత్యము ఎరుగక మనము మనుష్యులను ద్వేషించేవారిగా ఉంటాము. యేసయ్య సీమోనును దండించలేదు గానీ అతని వెనుక ప్రేరేపించిన సాతానునే గద్దించాడు.

ఈ విషయములన్నింటిలో మనము గమనిస్తే చివరికి విజయము మాత్రము దేవుని బిడ్డలదే! అనగా దేవుని గూర్చిన సత్యము ఎరిగినట్టయితే నీది, నాదే! అపవాది తల తన బిడ్డలచేత చితుకత్రొక్కబడవలసినదే అని ఆదిమ దినాలలోనే దేవుడు నిర్ణయించాడు. అయితే అపవాది మనమీద దాడి చేయకుండా ఉండాలి అంటే యోబువలె మనలను మనమే సిద్ధపరచుకోవాలి.

ఊజు దేశమునందు యోబు అను ఒక మనుష్యు డుండెను. అతడు యథార్థవర్తనుడును, న్యాయవంతుడునై దేవునియందు భయభక్తులుకలిగి చెడుతనము విసర్జించినవాడు. -యోబు 1:1

మనము కూడా, యథార్థవర్తనుడును, న్యాయవంతుడునై దేవునియందు భయభక్తులుకలిగి చెడుతనము విసర్జించినవాడు. మనము ఇలా యోబు కలిగిన క్యారెక్టర్ కలిగినవారిగా సిద్ధపడాలి. ఒకసారి చెడు అని తెలిసిన తరువాత మనము విసర్జిస్తున్నామా? లేక మరలా అదే చెడువైపుకు వెళుతున్నామా? ఆత్మీయమైన జీవితములలో ఏ విషయములోనూ మినహాయింపులు ఉండకూడదు. ఆత్మీయజీవితము పోరాటముతోనే ముందుకు నడిచేదిగా ఉంది.

ప్రభువు ప్రేమ కలిగినవాడై, మనము చెడువిషయములలో ఉన్నప్పుడు మన మనస్సాక్షిని గద్దిస్తూనే ఉంటాడు. అయితే మనము ఆ హెచ్చరికలను ఖాతరు చేయకుండా అదే పరిస్థితిలో కొనసాగుతుంటాము అయితే అలా మనము ఇకమీదట ఉండకూడదు. అయితే ఇలా సిద్ధపడకుండా దేవుని పని చేయాలి అంటే అది కుదరని పని. నీ సామర్థ్యము బట్టి నీవు ఏమి చెయ్యలేవు. అయితే నీ దేవుని సామర్థ్యము బట్టి నీవు ఏమైనా చేయగలవు. క్రీస్తును నమ్ముకున్న మనలో క్రీస్తు కనబడాలి. క్రీస్తు కనబడకుండా క్రైస్తవులము అని చెప్పుకోవడము వ్యర్థము. మనలో చాలామంది భక్తి కనపరచేవారముగా ఉంటాము గానీ, దేవుని యందలి భయము లేని వారుగా ఉంటున్నాము. దేవుడు, నాలోనూ, నాతోనూ ఉంటున్నాడు అనే సంగతి మర్చిపోయేవారముగా ఉంటున్నాము. అయితే “చీకటిని పారద్రోలడానికి మనలను ఏర్పరచుకున్నాడు”. అంతే కానీ, చీకటిలో కలిసిపోవడానికి కాదు! దేవుని వెలుగును కలిగిన మనము, చీకటిలో ప్రకాశించాలి గానీ, చీకటిలో కలిసిపోకూడదు. నిన్ను నీవే సిద్ధపరచుకోవాలి గానీ, మరొకను నిన్ను సిద్ధపరచరు అనే సత్యము ఎరిగి ఉండాలి. మనలో జయము రావాలి అంటే మొదటి మెట్టు, అపవాదిని అపవాదికి సంబంధించిన దానిని అసహ్యించుకోవాలి. నా దేహము దేవునిది అనే సమర్పణ మనము కలిగి ఉండాలి.

యథార్థవర్తనులుగా, న్యాయవంతులుగా దేవునియందు భయభక్తులుకలిగి చెడుతనము విసర్జించినవారిగా మనము ఉంటే మన చుట్టూ, దేవదూతల చేత కంచెవేయబడుతుంది.

యెహోవాయందు భయభక్తులు గలవారి చుట్టు ఆయనదూత కావలియుండి వారిని రక్షించును -కీర్తనలు 34:7

దేవునియందలి భయభక్తులు కలిగి ఉన్నట్టయితే నీ మార్గములో నీకు దేవదూతల కావలి ఉంటుంది. మార్గము అనగా భౌతికమైన ప్రయాణములలోనైనా, లేక నీ జీవితపు ప్రయాణములలోనైనా సరే! మాటలద్వారా కూడా మనలను పడగొట్టాలి అనే ప్రయత్నము అపవాది చేస్తాడు. గనుక మన మాటలు మనము జాగ్రత్తగా మాటలాడాలి.

పేతురును జల్లెడ పట్టాలి అని అపవాది ప్రయత్నిస్తున్న సందర్భములో యేసయ్య ఎందుకు కలుగచేసుకున్నాడు? అని ఆలోచిస్తే, పేతురు యేసయ్యను వెంబడించినవాడుగా పేతురు ఉన్నాడు. మనము కూడా యేసయ్యను వెంబడించేవారిగా అనగా యేసయ్య తన వాక్యము ద్వారా ఏమి చెప్తే ఆ ప్రకారముగా మనము జీవించాలి. అప్పుడు మన జీవితములో కూడా యేసయ్య కలుగచేసుకుంటాడు. శిష్యుల జీవితములో చూస్తే, మరికొద్ది దినములలో యేసయ్య వారిని విడిచివెళ్ళేవాడుగా ఉన్నాడు గనుక, యేసయ్యను వెంబడించేవారిగా ఉన్నప్పుడు, యేసయ్య విడిచివెళ్ళాక అప్పగించినదానిని కొనసాగించగలుగుతారు. వెంబడించడము అంటే సమస్తము అనగా ఈ లోకమునకు సంబంధించిన ప్రతీ విషయమును విడిచిపెట్టాలి. అప్పుడు అపవాది దాడి చేయకుండా మనలను సిద్ధపరచుకుంటాము. అయితే ఒకవేళ అపవాది మనమీద దాడి చేసేస్తే ఏమి చెయ్యాలి? అపవాది శోధించినప్పుడు యేసయ్య ఏమి చేసాడో అదే మనము చేయాలి. అనగా వాక్యము చేతపట్టుకుని నిలబడి ఎదిరిస్తే ఖచ్చితముగా జయము మనదే!

గతవారము “గుమ్మముల గడియలు బలపరచడము” అనేదాని గురించి ప్రభువు మాట్లాడాడు. అంటే దాని అర్థము ఏమిటి? గడియ బలహీనముగా ఉంది అని అర్థము. ఇప్పుడు బలపరచాలి అంటే, అయితె ఆ గడియను బాగుచేయాలి లేదా కొత్త గడియ వేయాలి. మన జీవితములో కూడా మన జీవితములో అపవాది ప్రవేశించకుండా అడ్డగించవలసినది బలహీనముగా ఉన్నప్పుడు, ఆ విషయమును సరిజేసి, బలపరచి అపవాది ప్రవేశించకుండా మనము సిద్ధపడతాము. సరిచేయుట అంటే రిస్టోరేషన్. కొత్తది వేయుట అంటే, రీప్లేస్మెంట్. గనుక అపవాదితో జరిగే యుద్ధములో భయపడక యోబువలే పేతురువలే మనము సిద్ధపడదాము.

ఏలయనగా మనము పోరాడునది శరీరులతో కాదు, గాని ప్రధానులతోను, అధికారులతోను, ప్రస్తుత అంధకారసంబంధులగు లోక నాథులతోను, ఆకాశమండలమందున్న దురాత్మల సమూహములతోను పోరాడుచున్నాము.౹ అందుచేతను మీరు ఆపద్దినమందు వారిని ఎదిరించుటకును, సమస్తము నెరవేర్చినవారై నిలువబడుటకును శక్తిమంతులగునట్లు, దేవుడిచ్చు సర్వాంగ కవచమును ధరించుకొనుడి౹ ఏలాగనగా మీ నడుమునకు సత్యమను దట్టి కట్టుకొని నీతియను మైమరువు తొడుగుకొని౹ పాదములకు సమాధాన సువార్తవలననైన సిద్ధమనస్సను జోడుతొడుగుకొని నిలువబడుడి.౹ ఇవన్నియుగాక విశ్వాసమను డాలు పట్టుకొనుడి; దానితో మీరు దుష్టుని అగ్నిబాణములన్నిటిని ఆర్పుటకు శక్తిమంతులవుదురు.౹ మరియు రక్షణయను శిరస్త్రాణమును, దేవుని వాక్యమను ఆత్మ ఖడ్గమును ధరించుకొనుడి.౹ -ఎఫెసీయులకు 6:12-17

అపవాది మనలను పడగొట్టడానికి ప్రయత్నము ఉంటుంది గనుక ఆపద్దినము అనేది ఖచ్చితముగా ఉంటుంది. అలాగే మనము అపవాదికి సంబంధించిన ప్రతిదానిమీద పోరాడుచున్నాము. గనుక సమస్తము నెరవేర్చినవారమై, అనగా దేవుడు ఈరోజు తెలియచేసిన క్యారెక్టర్ కలిగినవారిగా ఉన్నప్పుడు అని అర్థము. ఈ క్యారెక్టర్ కలిగిలేకుండా సర్వాంగ కవచము ఏమీ ఉపయోగపడదు. మన హృదయములో రూపాంతరత లేకుండా మనము పోరాటములో నిలవలేము.

యోబు జీవితములో పరీక్షించుట కొరకే అపవాది అనుమతించబడ్డాడు అయితే దేవుడు విడిచిపెట్టక రెండంతల ఆశీర్వాదము దయచేసినవాడుగా ఉన్నాడు. నీవు నేను కూడా దేవుడు ఈరోజు తెలియచేసిన ప్రకారము మనము చెడుతనమును విడిచిపెట్టి, దేవుని యందలి భయభక్తులు కలిగి వెంబడిస్తే, ఖచ్చితముగా అపవాది పోరాటములో విజయము మనదే!