09-07-2023 – ఆదివారం రెండవ ఆరాధన – నీకు విజయమే

వారము కొరకైన దేవుని వాక్కు

ఆత్మీయ మర్మములు ఎవరైతే ఎరిగినవారుగా ఉంటారో, వారు బలము కలిగి ఉంటారు. అందుకే మన హృదయమును లోకములోని చెత్తతో కాదు గానీ, ఆత్మ సంబంధమైన విషయాలతో నింపబడాలి. ఈ రోజు మనము “నాకు విజయమే” అనే విషయము గురించి నేర్చుకుందాము. మనకు విజయమే అంటే ఒక పోరాటము ఉంది అనే కదా దాని అర్థము. మనము ఆత్మీయముగా ముందుకు వెళ్ళేకొద్దీ, శరీరము వ్యతిరేకముగా పోరాటము చేస్తుంది. మన జీవితమే అనేకమైన పోరాటములతో కూడినది. మనకు ఏమి పోరాటమున్నాసరే మనకు విజయమే!

అనేకసార్లు మనము అన్యులను చూసి వారి జీవితమే బాగుంది అని అనుకుంటాము. అయితే నీవు చూసి, ఊహించినదానికంటే అత్యధికముగా ఇవ్వగలిగిన సమర్థుడు. మనకైతే మన జీవితములు ఎటువంటివో అర్థము కావటము లేదు. నిజానికి పోరాటము ఏమైనా సరే మనకే విజయము. మన ముందు తరములలో ఉన్న దావీదు చెప్పిన మాటలు చూస్తే, “యెహోవా నా కాపరి నాకు లేమి కలుగదు”. యేసయ్య ఏమి చెప్పాడు? “నేనిచ్చు జీవజలమును మీరు త్రాగినప్పుడు ఇంక ఎన్నడూ దప్పిగొనరు” అని చెప్తూ ఉన్నారు. నీవు కూడా నీవు వెంబడించేవాడు ఎవరో నీవు ఎరిగి ఉంటే, నీవు కూడా అదేవిధముగా సాక్ష్యము ఇస్తావు.

“నా గొర్రెలు నా స్వరమును వినును అవి నన్ను వెంబడించును” అని వాక్యము చెప్తుంది. ఆయన నీ ముందు వెలుగై ఉన్నాడు. ఆయనను వెంబడిస్తున్న నీ జీవితములో చీకటి ఇంక ఉండదు. సామెతల గ్రంథములో కూడా, “నీతిమంతుల మార్గములో మరణమే లేదు” అని వ్రాయబడింది. అందుకే మన జీవితము ఎలాంటిదో నీవు ఎరిగి ఉండాలి. “మా దేవుడు మమ్ములను రక్షించ సమర్థుడు” అని షద్రకు, మేషాకు మరియు అబెద్నగోలు అగ్నిగుండములో వేసేమునుపు ఆ విషయము ఎరిగి సహితము చెప్పగలిగారు. ఈ జ్ఞానము, ధైర్యము మనము కూడా సంపాదించుకోవాలి.

నాయందు మీకు సమాధానము కలుగునట్లు ఈ మాటలు మీతో చెప్పుచున్నాను. లోకములో మీకు శ్రమ కలుగును; అయినను ధైర్యము తెచ్చుకొనుడి, నేను లోకమును జయించియున్నాననెను. -యోహాను 16:33

ఈలోకములో శ్రమ ఎవరు అనుభవిస్తారు? మనమే! కానీ ఈ శ్రమను నేను జయించి ఉన్నాను అని యేసయ్య చెప్పుచున్నారు. ఆయన జయమునకు, మన జీవితమునకు ఏమిటి సంబంధము అని మనము ఎరిగి ఉండాలి. ఆయనకు నీకు సంబంధము ఉన్నంత సేపు కూడా జయము నీదే!

సమాధానకర్తయగు ప్రభువు తానే యెల్లప్పుడును ప్రతి విధముచేతను మీకు సమాధానము అనుగ్రహించును గాక. ప్రభువు మీకందరికి తోడై యుండును గాక. -2 థెస్సలొనీకయులకు 3:16

సమాధానకర్తయగు అంటే సమాధానమును కలుగచేసేవాడు. లోకమును జయించువాడు ఎటువంటివాడు అని చూస్తే, సమాధానమునకు కర్తగా ఉన్నాడు. ఆ ప్రభువు, తానే యెల్లప్పుడును ప్రతి విధముచేతను మీకు సమాధానము అనుగ్రహించును. అనగా నీ పరిస్థితిలో ఏమి జరిగిస్తే సమాధానము కలుగుతుందో ఆ ప్రకారముగా కార్యము జరిగించి సమాధానమును అనుగ్రహిస్తారు! అందుకే లోకమును జయించినవానిని బట్టి మనకు జయము కలుగుతుంది.

దేవుని ప్రేమించువారికి, అనగా ఆయన సంకల్పముచొప్పున పిలువబడినవారికి, మేలుకలుగుటకై సమస్తమును సమకూడి జరుగుచున్నవని యెరుగుదుము.౹ -రోమా 8:28

“దేవుని ప్రేమించువారు” అంటే ఆయనతో సంబంధము కలిగినవారే కదా! వారికి మేలు కలుగుటకు అనగా వారున్న శ్రమలో మేలుజరగాలి అంటే, సమస్తమునూ అనగా ప్రతివిధముచేతనూ, సమకూడి జరుగుచున్నవి అనగా శ్రమ జయకరముగా ముగించబడి, సమాధానము కలుగుతుంది.

మన తండ్రియైన దేవుని చిత్త ప్రకారము క్రీస్తు మనలను ప్రస్తుతపు దుష్టకాలములోనుండి విమోచింపవలెనని మన పాపముల నిమిత్తము తన్ను తాను అప్పగించుకొనెను.౹ -గలతీయులకు 1:4

క్రీస్తు జయించినవాడుగా ఉన్నాడు. ఆ జయించినవాడు చెప్తున్న మాటలు ఏమిటి అంటే, “మనలను ప్రస్తుతపు దుష్టకాలములోనుండి విమోచింపవలెనని”, “మన పాపముల నిమిత్తము తన్ను తాను అప్పగించుకొనెను”. అనగా మనము ప్రస్తుతము వెళుతున్న శ్రమలనుండి విడిపించబడటానికి ఆయన కార్యమును ముందుగానే జరిగించి విజయమును సంపాదించి ఉంచాడు. మన జీవితములను ఆశీర్వాదము వెంబడించడానికి అవసరమైన వెల యేసుక్రీస్తు ముందుగానే చెల్లించినాడు. నా శ్రమలో అవసరమైన సొల్యూషన్ ఆయన వెతికినవాడుగా ఉన్నాడు. అందుకే మనము ధైర్యము తెచ్చుకొని ముందుకు సాగాలి. క్రీస్తు మర్మమై ఉన్నాడు, యేసయ్య గురించి ఎంతగా తెలుసుకుంటే అంతగా మనము విజయము పొందుకుంటాము.

నేను జయించాను అని చెప్పిన వాడు, సమాధానమునకు కర్త మరియు, నీ శ్రమలోనుండు నిన్ను విడిపించడానికి సొల్యూషన్ సిద్ధపరచినవాడు.

మనము ఆయన ద్వారా జీవించునట్లు, దేవుడు తన అద్వితీయ కుమారుని లోకములోనికి పంపెను; దీనివలన దేవుడు మనయందుంచిన ప్రేమ ప్రత్యక్షపరచబడెను.౹ -1 యోహాను 4:9

యేసయ్య ఒక ఉద్దేశ్యము కలిగినవాడుగా ఉన్నాడు. ఆ ఉద్దేశ్యము నీవు నేను జీవింపచేయబడుట. అపవాది యొక్క తంత్రములు ఏమిటి అంటే, వాక్యమును నిన్ను విననివ్వదు. ఎందుకంటే, నీవు వాక్యములోని సత్యము నీవు గ్రహిస్తే, ఆ సత్యము నిన్ను స్వతంత్రునిగా చేస్తుంది. గనుక అపవాది అడ్డగిస్తూనే ఉంటుంది. అందుకే నీవు జాగ్రత్తకలిగి దేవుని సన్నిధిలో ఉండాలి. నీవు సత్యము గ్రహించినట్టయితే, నా శ్రమలో ఆయన ద్వారా నేను జీవింపచేయబడతాను అని ప్రకటించగలుగుతావు. నిన్ను శ్రమలోనుండి లేవనెత్తటమే, నీకు సొల్యూషన్ దయచేసి విడిపించడము, నికు జీవము కలిగించుట ఆయన ఉద్దేశ్యము అని యేసయ్య చెప్పుచున్నాడు.

అయినను మన ప్రభువైన యేసుక్రీస్తు మూలముగా మనకు జయము అనుగ్రహించుచున్న దేవునికి స్తోత్రము కలుగును గాక.౹ -1 కొరింథీయులకు 15:57

అన్యజనులలో ఈ మర్మముయొక్క మహిమైశ్వర్యము ఎట్టిదో అది, అనగా మీయందున్న క్రీస్తు, మహిమ నిరీక్షణయై యున్నాడను సంగతిని దేవుడు తన పరిశుద్ధులకు తెలియపరచగోరి యిప్పుడు ఆ మర్మమును వారికి బయలుపరచెను.౹ -కొలొస్సయులకు 1:27

క్రీస్తు అనగా సమాధాన కర్త, సొల్యూషన్ సిద్ధపరచినవాడు, జీవము దయచేయువాడు ఇప్పుడు నీలో ఉన్నాడు.

చిన్నపిల్లలారా, మీరు దేవుని సంబంధులు; మీలో ఉన్నవాడు లోకములో ఉన్నవాని కంటె గొప్పవాడు గనుక మీరు వారిని జయించియున్నారు.౹ -1 యోహాను 4:4

ఒకవేళ మీరు శ్రమలో ఉన్నారు అనుకోండి, నీలో ఉన్న క్రీస్తు లోకమునులో ఉన్న శ్రమకంటే, నీవు ఎదుర్కొంటున్న శ్రమ కంటే గొప్పవాడు గనుక, ఆ శ్రమలో నీకే విజయము. ప్రతీదీ అది శ్రమ అయినా అధికారమైనా అది క్రీస్తు ముందు వంగవలసినదే! మన శ్రమలో మనము చేయ్యగలిగినదీ, చెయ్యవలసినది ఒక్కటే, ఆయనను కలిగి ఉండటమే! ఆయనను కలిగి ఉండటమే జీవిత లక్ష్యము అయి ఉండాలి. అప్పుడు మనము కూడా దావీదు వలే, నాకు లేమి కలుగదు అని చెప్పగలుగుతాము.

అయితే క్రీస్తు పరిశుద్ధమైన ప్రదేశములో ఉంటాడు గనుక, నీ హృదయమును పరిశుద్దము గా ఉంచుకోవాలి. నీవు యదార్థముగా ఉన్నప్పుడు దేవుని చూసేవారిగా ఉంటావు. అనగా మనము మాట్లాడే మాటల ప్రకారము మన జీవితము కూడా ఉండాలి. యదార్థత లేని జీవితములు గనుక ఉంటే, ఓటమి పాలవుతాము. నీ మాటలు జాగ్రత్తగా చూసుకోవాలి. ఒకవేళ తప్పు చేసినయెడల, తప్పుచేసాను అని ఒప్పుకొని, సరిచేసుకొనిన యెడల, ప్రభువు నిన్ను పరిశుద్ధపరుస్తాడు. నీ శ్రమలన్నిటినోనుండి నిన్ను విడిపించి సమాధానము కలుగచేసేవాడు మన దేవుడు. దేవుని మాట ప్రకారము మార్చుకోవడానికి సిద్ధపడినప్పుడు నీలో ఆయన నివాసము ఉండేవాడుగా ఉంటాడు. ఆ ప్రకారము మనలను సిద్ధపరచుకుందాము.