09-06-2024 – ఆదివారం రెండవ ఆరాధన

వారము కొరకైన వాక్యము

జీసస్ కేర్స్ యూ మినిస్ట్రీ గమ్యము ఏమిటి అంటే, రక్షించబడిన ప్రతి ఒక్కరూ, వారి జీవితమును విజయవంతముగా జీవించుటయే. అలా జీవించి ప్రభువు కొరకు సాక్షిగా ఉండాలి అనేది దేవుని ఆకాంక్ష. దీనిని బట్టి దేవుడు నీ పట్ల ఒక ప్రత్యేకమైన ప్రణాళిక కలిగి ఉన్నాడు అని గ్రహించాలి.

అయితే ఆచారయుక్తముగా ప్రభువును వెంబడించడం వల్ల ఏమీ ప్రయోజనము లేదు. మా దేవుడు రక్షించగల సమర్థుడు, ఒకవేళ రక్షించకపోయినా ఆయనను విడిచిపెట్టము అని ఎలా అయితే షద్రకు, మేషాకు అబెద్నగోలవలే నిలబడాలి.

నీ ప్రభువు నీలో తన కార్యము జరిగే వరకు విడిచిపెట్టడు. ఆయనకు నీపై ఉన్న తన ప్రణాళికయే నిన్ను బ్రతికిస్తుంది. అందుకే మనము ధైర్యముగా చెప్పగలము – “ప్రభువును నా జీవితములో మహిమపరచుకొనే వరకు నేను ఈ భూమిని విడిచిపెట్టను”.

నీ కొరకు దేవుడు సిద్ధపరచాడు అనే విషయము గూర్చి తెలుసుకుందాము. దేవుడు అసలు ఏమి సిద్ధపరచాడు, ఏ విధముగా సిద్ధపరుస్తాడు.

యేసు ఆ సంగతి విని దోనె యెక్కి, అక్కడనుండి అరణ్యప్రదేశమునకు ఏకాంతముగా వెళ్లెను. జనసమూహములు ఆ సంగతి విని, పట్టణములనుండి కాలినడకను ఆయనవెంట వెళ్లిరి. ఆయన వచ్చి ఆ గొప్ప సమూహమును చూచి, వారిమీద కనికరపడి, వారిలో రోగులైన వారిని స్వస్థపరచెను. సాయంకాలమైనప్పుడు శిష్యు లాయనయొద్దకు వచ్చి ఇది అరణ్యప్రదేశము, ఇప్పటికే ప్రొద్దుపోయెను, ఈ జనులు గ్రామములలోనికి వెళ్లి భోజనపదార్థములు కొనుక్కొనుటకై వారినిపంపివేయ మని చెప్పిరి. యేసు–వారు వెళ్లనక్కరలేదు, మీరే వారికి భోజనము పెట్టుడని వారితో చెప్పగా -మత్తయి 14:13-16

ఇక్కడ జన సమూహమంతా యేసయ్య దగ్గరకు వచ్చారు. ఆయన అక్కడ ఉన్న రోగులను స్వస్థపరచారు. సాయంకాలము అయ్యే సరికి వారు ఆహారము కొనుక్కొనుటకై వారిని పంపివేయమని చెప్పగా, యేసయ్య మీరే వారికి భోజనము పెట్టండి అని చెప్పారు.

అయితే ఈరోజు మనము గ్రహించవలసిన మాట – “అవసరము తీర్చబడుటకు, ఎక్కడికీ వెళ్ళనవసరము లేదు”. ఆయన అద్భుతము జరిగించి తన కార్యము చేసేవాడిగా మన యేసయ్య ఉన్నాడు.

వారు– ఇక్కడ మనయొద్ద అయిదు రొట్టెలును రెండు చేపలును తప్ప మరేమియు లేదని ఆయనతో చెప్పిరి. అందు కాయన వాటిని నాయొద్దకు తెండని చెప్పి పచ్చికమీద కూర్చుండుడని జనులకాజ్ఞాపించి, ఆ అయిదు రొట్టెలను రెండు చేపలను పట్టుకొని ఆకాశమువైపు కన్నులెత్తి ఆశీర్వదించి ఆ రొట్టెలు విరిచి శిష్యులకిచ్చెను, శిష్యులు జనులకు వడ్డించిరి. వారందరు తిని తృప్తిపొందిన తరు వాత మిగిలిన ముక్కలు పండ్రెండు గంపల నిండ ఎత్తిరి స్త్రీలును పిల్లలును గాక తినినవారు ఇంచుమించు అయిదు వేలమంది పురుషులు. -మత్తయి 14:17-21

ఐదువేలకంటే ఎక్కువగా ఉన్నవారికి యేసయ్య భోజనము పెట్టాడు. అక్కడ ఆ అద్భుతము చేసిన దేవుడే మన జీవితములో ఉన్నాడు. ఆయన ద్వారా మనము పుట్టించబడినవారము. ఆయన జీవితము సూపర్నేచురల్ అయితే మన జీవితము కూడా సూపర్నేచురలే కదా!

వారు కపెర్నహూమునకు వచ్చినప్పుడు అరషెకెలు అను పన్ను వసూలుచేయువారు పేతురునొద్దకువచ్చి– మీ బోధకుడు ఈ అరషెకెలు చెల్లింపడా అని యడుగగా–చెల్లించుననెను. అతడు ఇంటిలోనికి వచ్చి మాటలాడకమునుపే యేసు ఆ సంగతి యెత్తి సీమోనా, నీకేమి తోచుచున్నది? భూరాజులు సుంకమును పన్నును ఎవరి యొద్ద వసూలుచేయుదురు? కుమారులయొద్దనా అన్యుల యొద్దనా? అని అడిగెను. అతడు–అన్యులయొద్దనే అని చెప్పగా యేసు అలాగైతే కుమారులు స్వతంత్రులే. అయినను మనము వారికి అభ్యంతరము కలుగజేయకుండునట్లు నీవు సముద్రమునకు పోయి, గాలము వేసి, మొదట పైకివచ్చు చేపను పట్టుకొని, దాని నోరు తెరచినయెడల ఒక షెకెలు దొరకును; దానిని తీసికొని నా కొరకును నీకొరకును వారికిమ్మని అతనితో చెప్పెను. -మత్తయి 17:24-27

ఇక్కడ అరషెకెలు పన్ను కట్టుటకు, వారి వద్ద ఏమీ లేవు. అయితే ఆ పన్ను కట్టుటకు ప్రభువే ఒక చేపద్వారా సిద్ధపరచాడు. సముద్రములో ఎన్నో చేపలు ఉండగా, ఒకదానిని ఆ పన్ను కట్టుటకు సిద్ధపరచాడు. ఇదే కదా అద్భుతం!

ఆకలి తీర్చబడే సందర్భమైనా, పన్ను కట్టవలసిన సందర్భమైనా అనగా శారీరకమైన అవసరమైనా, ఆర్థికమైన అవసరమైనా, నీ కొరకు అద్భుతము చేసి నీ అవసరము తీర్చేవాడు నీ దేవుడు.

జన సమూహములు యేసయ్య దగ్గర ఉన్నారు, శిష్యులు యేసయ్య దగ్గర ఉన్నారు. అనగా యేసయ్యతో ఉంటేనే అద్భుతము అనుభవించగలము. అంటే, అద్భుతముల కొరకు యేసయ్యను వెంబడించక్కరలేదు గానీ, ఆయనను కలిగిఉంటే చాలు, అద్భుతమే. నీ అవసరము తీర్చుటకే ఆయన అద్భుతము చేసేవాడుగా ఉన్నాడు.

అద్భుతము కొరకు, పేతురు వలే ప్రభువు చెప్పే మాటను నమ్మి నీవు ముందుకు వెళ్ళగలుగులాగున, మిమ్మును మీరే సిద్ధపరచుకొనుడి. నీ జీవితమునకు కావలిసినదాని కొరకు ముందుగానే సిద్దపరచాడు అని వాక్యము చెప్పుచున్నది. అంటే, అవన్నీ అద్భుతముతోనే సిద్ధపరచబడ్డాయి. అందుకే మన జీవితము అద్భుతమే! నీ జీవితమును చూసినవారు ఆశ్చర్యపడే విధముగా నీ జీవితము ఉంటుంది.

అబ్రహాము బలికి కావలసిన గొర్రెపిల్ల దేవుడే చూసుకుంటాడు అని చెప్పాడు. వెంటనే దేవుడూ అద్భుతము చేసి అక్కడ గొర్రెపిల్ల కనపడింది. గొడ్డలి నీళ్ళలో పడిపోతే, ఒక కర్రముక్క వేస్తే అది తేలడము అద్భుతము కాదా? ఇలా చూస్తే, దేవుడు చేసే అన్ని కార్యములు అద్భుతములే! ఇప్పుడు నీవున్న స్థితిలో అద్భుతము జరగవలసినదే!

అందుకే నీవు అవసరములో ఉన్నపుడు, ఇప్పుడు దేవుడు ఏ మార్గము తెరుస్తాడో అని మనము గమనించేవారిమిగా ఉండాలి. ఏలియా కొరకు సారెఫతు విధవరాలిని సిద్ధపరచారు. పేతురు కొరకు చేపను సిద్ధపరచారు. నీ కొరకు నా కొరకు కూడా ప్రభువు సిద్ధపరచారు.