08-10-2023 – ఆదివారం రెండవ ఆరాధన – ఫలించే జీవితం

వారము కొరకైన వాక్యము

మన జీవితములు మన దేవుని మహిమ కొరకే అని లేఖనములు తెలియచేస్తున్నాయి. తన వాక్కును పంపి, మనము పడిన గుంటలలోనుండి మనలను లేవనెత్తే వాడుగా మన దేవుడు ఉన్నాడు.

ఆదివారము దినాన దేవుని సన్నిధికి వచ్చినప్పుడు, మన ఆత్మకు పట్టిన కల్మషమంతా వాక్యము చేత శుద్ధీకరించబడుతుంది. అలాగే మన జీవితములు తన మహిమ కొరకు సిద్ధపరచబడులాగున తన వాక్కును విడుదల చేసేవాడుగా ఉన్నాడు. ఆ వాక్కు మనము పడిన గుంటలలోనుండి లేవనెత్తేదిగా ఉంటుంది. వాక్యములోని సత్యము యొక్క లోతులను తెలుసుకొనేవారిగా మనము ఉండాలి. కేవలము పై పై విషయములు ధ్యానించుట ద్వారా మనము అంత్యదినములను కొనసాగించలేము, ఖచ్చితముగా వాక్యము లోతులను మనము తెలుసుకోవాలి.

యేసయ్య అనేకమైన ఉపమానములను ఉపయోగించి తన బోధను చేసినవాడుగా ఉన్నాడు. ఆ ఉపమానములలోని సత్యము మనము గ్రహిస్తే మనము కూడా దానిలోని ఆశీర్వాదమును పొందగలుగుతాము. ఈరోజు ఫలించే జీవితము కలిగి ఉండాలి అంటే ఏమి చేయాలి? ఎవరు కలిగి ఉంటారు అని వాక్యము ద్వారా తెలుసుకుందాము.

వాక్యము లోని లేఖనములన్నీ ఎవరికొరకు ఇవ్వబడ్డాయి? ఇవి జరిగిపోయిన వాటిని గూర్చి మాట్లాడుతున్నాయా? మన జీవితపు ప్రస్తుతము కొరకు మాట్లాడుతున్నాయా? ఈ స్పష్టత మనము ఎరిగి ఉండాలి.

విత్తువాడు తన విత్తనములు విత్తుటకు బయలు దేరెను – లూకా 8:5

ఈ మాటలో ప్రభువు మనతో ఏమి మాట్లాడుతున్నాడు అని ధ్యానిస్తే, విత్తువాడు “తన విత్తనములు” విత్తుటకు బయలుదేరెను అని వ్రాయబడింది. విత్తనము గూర్చి మనము ధ్యానిస్తే, విత్తనములో జీవము ఉంటుంది. అలాగే జీవమును ఆశీర్వాదముగా కూడా మనము చూడవచ్చు. అనగా విత్తువాడైన దేవాది దేవుడు తన విత్తనము అనగా తాను సిద్ధపరచి మనకొరకు ఇవ్వలనుకుంటున్న ఆశీర్వాదము విత్తుటకు బయలుదేరెను.

ఆదివారము మనము కూడుకొనుట అనేది దేవుడి నియమించిన నియమము. ఈ దినములో మన జీవితమునకు పట్టిన కల్మషమును తీసివేయుటకు, తన ఆశీర్వాదమును ఇవ్వడానికి బయలుదేరినవాడై ఉన్నాడు.

అతడు విత్తుచుండగా, కొన్ని విత్తనములు త్రోవ ప్రక్కను పడి త్రొక్కబడెను గనుక, ఆకాశపక్షులు వాటిని మ్రింగివేసెను. -లూకా 8:5

విత్తనము అనగా మనము ఆశీర్వాదము మరియు జీవముగా మనము నేర్చుకున్నాము. అయితే ఏ ఆశీర్వాదము నా జీవితములో స్థిరపరచబడుతుంది? అనే ఆలోచన కలిగి ఉండాలి. ఏ ఆశీర్వాదము ఇవ్వడానికి బయలుదేరాడు?

దేనికాలమునందు అది చక్కగా నుండునట్లు సమస్తమును ఆయన నియమించియున్నాడు; ఆయన శాశ్వతకాల జ్ఞానమును నరుల హృదయమందుంచియున్నాడుగాని దేవుడు చేయుక్రియలను పరిశీలనగా తెలిసికొనుటకు అది చాలదు.౹ -ప్రసంగి 3:11

దేని కాలమందు అనగా ఈ సమయమందు మనము దేవుని సన్నిధిలో ఉన్నాము. ఈ సమయానికి మన జీవితము చక్కగా ఉండుటకు నియమించాడు. యవ్వనస్తులు చదువు ముగించుకున్న తరువాత ఉద్యోగము చేయుట అనేది చక్కగా ఉండుట అనేది ఉదాహరణగా చూస్తే, ఒకవేళ ఉద్యోగము లేకపోతే చక్కగా లేనట్టు అని అర్థము చేసుకోవచ్చు. అలాగే, పెళ్ళైనవారు సంవత్సరాలు గడిచినా సరే పిల్లలు లేనివారుగా ఉన్నట్టయితే వారు చక్కగా లేనట్టుగా మనము అర్థము చేసుకోవచ్చు.

అయితే దేవుని కృప ఈ సమయమునకు దేవుని సన్నిధికి మనలను తీసుకువచ్చింది. తన విత్తనములు తీసుకుని బయలుదేరాడు. విత్తనములు అనగా అనేకమైనవి ఒక్కటి కాదు. అనగా ఇన్ని దినములు దేవుని చేత నియమించబడి, నేను కోల్పోయిన వాటినన్నింటినీ తిరిగి పొందుకోవడానికి తన ఆశీర్వాదములు చేతపట్టుకుని బయలుదేరాడు. అనగా రెస్టొరేషన్ దినముగా ఈ దినమును ప్రభువు నియమించాడు.

ఆయన పరిపూర్ణతలోనుండి మనము పరిపూర్ణులుగా మనము మార్చబడతాము. సగము సగము ఆశీర్వాదములు తీసుకువచ్చేవాడు కాదు గానీ, పరిపూర్ణమైన ఆశీర్వాదములు ఇచ్చేవాడు. పోయిన సమయమును బట్టి ఎంతో బాధ పడేవారిగా ఉంటాము, అయితే ఇంక ఆ విషయమును గూర్చి మర్చిపోతాము. అయితే మన ప్రభువు మాత్రము మర్చిపోయేవాడుకాదు.

దేవుడైతే విత్తనములతో బయలుదేరాడు, ఆశీర్వాదములు చేత బట్టుకొని బయలుదేరాడు. అయితే మనము ఎలా ఉంటున్నాము?

అతడు విత్తుచుండగా – లూకా 8:5

అనగా ఈరోజు దేవుడు మన జీవితములకు కావలసిన ఆశీర్వాదములు ఇచ్చియున్నాడు. అయితే మనము వాటిని పొందుకునే వారిగా ఉన్నామా లేదా? అని పరీక్షించుకుందాము.

కొన్ని విత్తనములు త్రోవ ప్రక్కను పడి త్రొక్కబడెను గనుక, ఆకాశపక్షులు వాటిని మ్రింగివేసెను – లూకా 8:5
దేవుడు ఆశీర్వాదములు ఇచ్చినప్పటికీ, మనము సరైనమార్గములో నిలువక, త్రోవ ప్రక్కన పడ్డాయి. అయితే త్రోవపక్కన ఉండువారు ఎవరు? త్రోవ ప్రక్కనుండువారు, వారు వినువారు గాని నమ్మి రక్షణ పొందకుండునట్లు అపవాది వచ్చి వారి హృదయములోనుండి వాక్యమెత్తికొని పోవును. -లూకా 8:12

ఇప్పుడు మనము సరైన త్రోవలో ఉన్నామా అని చూస్తే, “నమ్మి రక్షణ పొందినవారు సరైన త్రోవలో ఉన్నవారు”. గనుక ప్రభువైన యేసయ్యను అంగీకరించి, ఆయనను వెంబడించేవారిగా మనము ఉంటే మనము సరైన త్రోవలో ఉన్నవారము. అంతే కాక, దేవుని మహిమకరము కానిదానిని విడిచిపెట్టి ఆయననే వెంబడించేవారు సరైన త్రోవలో ఉండేవారు.

వెంబడించడము అంటే, గొర్రెలు ఎలా అయితే కాపరి వెళ్ళిన వైపునే నడుస్తాయో, మనము కూడా మన కాపరి అయిన యేసయ్య తన వాక్కు ద్వారా ఎలా చెయ్యమంటే అలా, ఎలా వెళ్ళమంటే అలా వెళ్ళుట సరైన త్రోవలో వెళ్ళుట. జరిగిపోయిన దానిగూర్చి చితపడవద్దు కానీ, ఈరోజు నీ వద్దకు వచ్చిన వాక్కుకు లోబడుటయే నీవు చేయదగినది. అదే సరైన త్రోవ. అలాకాని యెడల దేవుడి ఇచ్చిన ఆశీర్వాదము ఫలించదు అనగా నీవు అనుభవించలేవు.

నేనే ద్వారమును; నా ద్వారా ఎవడైన లోపల ప్రవేశించినయెడల వాడు రక్షింపబడినవాడై, లోపలికి పోవుచు బయటికి వచ్చుచు మేత మేయుచునుండును.౹ -యోహాను 10:9

కాపరి ముందు వెళుతున్నాడు, గొర్రెలు ఆ కాపరిని వెంబడిస్తున్నాయి. ఆ గొర్రెలు లోపల బయట కూడా మేత మేసేవిగా ఉన్నాయి. కాపరి యొక్క కాపరత్వములో ఉన్నవారు లోపల అనగా ఆత్మీయమైన విషయములలో, బయట అనగా భౌతికమైన విషయములలో కూడా ఆశీర్వదించబడేవారిగా ఉంటారు. వారి ఆశీర్వాదమునకు కాపరి కారకుడుగా ఉన్నాడు. కాపరిని మనము వెంబడిస్తున్నాము అంటే ఆ కాపరిని బట్టి కలిగే ఆశీర్వాదములుకూడా మనలను వెంబడిస్తాయి. సరైన త్రోవలో ఉన్నవారికి ఆ ఆశీర్వాదములు ఖచ్చితముగా ప్రత్యక్షపరచబడతాయి.

మరి కొన్ని రాతినేలను పడి, మొలిచి, చెమ్మలేనందున ఎండిపోయెను. -లూకా 8:6
రాతినేలనుండు వారెవరనగా, వినునప్పుడు వాక్యమును సంతోషముగా అంగీకరించువారు గాని వారికి వేరు లేనందున కొంచెము కాలము నమ్మి శోధనకాలమున తొలగిపోవుదురు. -లూకా 8:13

రాతి నేలమీద కూడా విత్తనాలు విత్తబడ్డాయి. రాతి నేల అంటే, దేవుని వాక్కు వినినప్పుడు సంతోషముతో అంగీకరించువారు. అయితే, వేరు లేనందున, కొంచెము కాలము మాత్రము నమ్మి, శొధన కాలమున తొలగిపోవుదురు.

దేవుని యొక్క కృప కొరకు కనిపెట్టువారియందు ఆయన ఆనందిస్తున్నాడు. నీవు కూడా ఆయన కృప కొరకు కనిపెడుతూ ఉన్నట్టయితే, నీ యందు ఆయన కూడా ఆనందించేవాడుగా ఉన్నాడు. అయితే కొన్ని దినములు అయిన తరువాత ఇంకా ముగించబడకముందే వదిలిపెట్టేసేవారుగా ఉన్నట్టయితే, ఫలించే జీవితము కాదు. అయితే ఇకముందు ఇలా ఉండవద్దు. నీతి మంతుని ప్రార్థన బహు బలము గలది. అటువంటి ప్రార్థన ఎలా తప్పిపోతుంది? ఈ సత్యమును గ్రహించి మనము ఆ ప్రకారము నిలబడితే, మన రాతినేల స్వభావము మారినట్టే!

మరి కొన్ని ముండ్లపొదల నడుమ పడెను; ముండ్లపొదలు వాటితో మొలిచి వాటి నణచివేసెను. -లూకా 8:7
ముండ్ల పొదలలో పడిన (విత్తనమును పోలిన) వారెవరనగా, విని కాలము గడిచినకొలది యీ జీవనసంబంధమైన విచారములచేతను ధనభోగములచేతను అణచివేయబడి పరిపక్వముగా ఫలింపనివారు. -లూకా 8:14

దేవుడు మన జీవితమునకు కావలిసిన ఆశీర్వాదమును ఇచ్చాడు. ఆ ఆశీర్వాదమును సంతోషముగా అనుభవిస్తున్నాము. అయితే, మరొక విషయములో విచారము కలిగి ఉన్నట్టయితే, రాను రాను ఆ విచారము పెరిగిపోవుటను బట్టి సంపూర్ణముగా సంతోషించలేని వారిగా ముండ్లపొదల జీవితము ఉంటుంది. అయితే, ఒక విషయములో ఆశీర్వదించిన దేవుడు, నీవు విచారము కలిగి ఉన్న దానిలో కూడా చేయగలడు అనే సత్యము ఎరిగి మనము జీవించాలి అలా మన జీవితమును సిద్ధపరచుకోవాలి. దావీదువలే, “నా ప్రాణమా నాలో నీవేల కృంగియున్నావు? నీవేల తొందరపడుచున్నావు? దేవుని యందు నమ్మిక ఉంచు” అని మనము కూడా చెప్పుకొనేవారిగా మన్ము మార్చుకోవాలి.

మరికొన్ని మంచినేలను పడెను; అవి మొలిచి నూరంతలుగా ఫలించెననెను -లూకా 8:8
మంచి నేల నుండు (విత్తనమును పోలిన) వారెవరనగా యోగ్యమైన మంచి మనస్సుతో వాక్యము విని దానిని అవలంబించి ఓపికతో ఫలించువారు. -లూకా 8:15

సరైన త్రోవలో నిలిచి, రాతి స్వాభావము లేనిది, ముండ్ల గచ్చపొదలు లేనిది అయిన జీవితము కలిగినవారు మంచినేలను వున్నవారు. దేవుడు ఇచ్చిన ఆశీర్వాదము పొందుకోవడానికి నిన్ను నీవే సిద్ధపరచుకోవాలి. ఆయన తన ఆశీర్వాదమును ఇచ్చేవున్నాడు, అయితే ఇప్పుడు మనము దానిని స్వతంత్రించుకోనేవారిగా మనము మార్చుకుందాము.