08-09-2024 – ఆదివారం మొదటి ఆరాధన

ఆరాధన వర్తమానము

తన సన్నిధిలో నిలబడే భాగ్యము మనకు దయచేసిన దేవునికే ఘనత, మహిమ ప్రభావములు కలుగును గాక. ఈ దినము దేవునిని స్తుతించవలసిన, మహిమ పరచవలసిన దినము. మన దేవుడు మనలను ప్రేమించి, మన పక్షమున నిలబడి, మనకు ఎదూరైన ప్రతీ పరిస్థితినుండి విడిపించేవాడిగా ఉన్నాడు.

యెహోవా, నీవే నా దేవుడవు నేను నిన్ను హెచ్చించెదను నీ నామమును స్తుతించెదను నీవు అద్భుతములు చేసితివి, సత్యస్వభావము ననుసరించి నీవు పూర్వకాలమున చేసిన నీ ఆలోచనలు నెరవేర్చితివి -యెషయా 25:1

దేవుడు మన జీవితములఓ ఒక భాగమై ఉండాలి. మన జీవితములలో ఉద్యోగము అనేది ఒక భాగము, భోజనము చేయుట ఒక భాగము. అలాగే దేవుడు కూడా మన జీవితములో ఒక భాగమై ఉన్నట్టయితే, అప్పుడు ఆయనను గూర్చిన విషయములు తెలియచేయబడతాయి. అనగా ఆయన ఏమి చేయగలడో నీవు గమనించగలుగుతావు.

దేవుడు తన శక్తిని బట్టి అనేకమైన కార్యములు చేసేవాడివిగా ఉంటావు. మనము చేసే ఉద్యోగమును బట్టి నీకు జీతము వస్తుంది. ఆ జీతమును బట్టి నీవు నీ అవసరములను తీర్చుకుని సంతోషించేవాడివిగా ఉంటావు. అలాగే దేవుడు మన జీవితములో ఒక భాగమైపోతే ఆయనను బట్టి మన జీవితములో అనేకమైన విషయములు సమకూర్చబడి మనము సంతోషించేవారిమిగా ఉంటాము.

ధనమును బట్టి మనము పొందే సంతోషము కొంచెము సమయమే ఉంటుంది. అయితే దేవునికి సంబంధించిన విషయములలో కలిగిన అనుభవము సాక్ష్యము ఎల్లప్పుడు అదే సంతోషమును మనము పొందేవారిగా ఉంటాము.

ఇప్పటివరకు మన జీవితములో ఆయన ఆలోచనలే నెరవేర్చబడ్డాయి దానిని బట్టి మనము ఆయనను స్తుతించాలి. మన జీవితములలో చూస్తే, అనేకరకములుగా మరణము మనలను కబళించడానికి ప్రయత్నము చేస్తుంది. అయితే మనము ఈరోజు సజీవుల లెక్కలో ఉన్నాము అంటే, అది దేవుని ప్రేమ, మరియు ఆయన ప్రణాళిక.

నీ పైన దేవుని ఆలోచన ఉంది అనే సత్యము నీవు ఖచ్చితముగా ఎరిగి ఉండాలి. ఆ కారణము చేతనే మనము ఇంకా జీవించి ఉన్నాము. దేవుడు కార్యము చేయకపోతే, ఈ లోకాధికారి యొక్క అధికారమునుండి తప్పించుకోవడము మన వల్ల కాదు.

యెహోవాయే నా బలము నా గానము ఆయన నాకు రక్షణయు ఆయెను. ఆయన నా దేవుడు ఆయనను వర్ణించెదను ఆయన నా పితరుల దేవుడు ఆయన మహిమ నుతించెదను. -నిర్గమకాండము 15:2

మన దేవుని బలము మాత్రమే అపవాది యొక్క అధికారమునుండి మనలను తప్పించింది. గనుక యెహోవాయే నా బలము అని చెప్పగలిగిన అనుభవము మనది అయి ఉండాలి. హృదయాన్ని ఈ సత్యముతో సిద్ధపరచుకుందాము. అప్పుడు మాత్రమే ఆయనను ఆత్మతో సత్యముతో మనసారా స్తుతించి ఆరాధించగలుగుతాము.

మన హృదయములో లోకానుసారమైన ఆలోచనలు, వినోద మాధ్యమములో చూపించే వివిధ రకములైన మోసకరమైన ఆకర్షణలు నిండిపోయి ఉంటే దేవునిని సత్యముతో ఆరాధించలేము. మన హృదయమును దేవునికొరకు ఖాళీ చేసుకోవాలి, ప్రయోజనము కాని వాటినుండి మనము తప్పించుకుని దేవునికొరకు సిద్ధపడాలి.

మనము సంతోషించలేని పరిస్థితి గనుక మనము కలిగి ఉన్నట్టయితే, ప్రభువు నీ యెడల గొప్ప తలంపులు కలిగి ఉన్నాడు అని చెప్పుచున్న మాటలు ఈరోజు నీ వద్దకు వస్తున్నాయి. అయితే మనము ఉన్న పరిస్థితిని బట్టి వచ్చిన దేవుని వాక్కును మనము నమ్మలేని పరిస్థితిలో ఉంటాము. అయితే ఆ సత్యమును మనమున్న పరిస్థితిలో ఎలా నమ్మాలి?

యెహోవా నా దేవా, నీవు మా యెడల జరిగించిన ఆశ్చర్యక్రియలును మాయెడల నీకున్న తలంపులును బహు విస్తారములు. వాటిని వివరించి చెప్పెదననుకొంటినా అవి లెక్కకు మించియున్నవి నీకు సాటియైనవాడొకడును లేడు. -కీర్తనలు 40:5

నీ మా యెడల జరిగించిన ఆశ్చర్య క్రియలు మా యెడల నీకున్న తలంపులు. ఈ రెండింటినీ మనము ఆలోచించాలి. మరొక వాక్యము కూడ చూసి మనము ధ్యానిద్దాము.

నా ప్రాణమా, యెహోవాను సన్నుతించుము. నా అంతరంగముననున్న సమస్తమా, ఆయన పరిశుద్ధ నామమును సన్నుతించుము. నా ప్రాణమా, యెహోవాను సన్నుతించుము ఆయన చేసిన ఉపకారములలో దేనిని మరువకుము -కీర్తనలు 103:1-2

ఈ భాగములో కీర్తనాకారుని పరిస్థితి మరణము తరుముతున్న పరిస్థితి. ఈ సందర్భములో తన ప్రాణమును ఏ విధముగా బలపరచుకుంటున్నాడు అని చూస్తే, ఇంతకు ముందు తన జీవితములో చేసిన అద్భుతములను, ఆశ్చర్య కార్యములను, ఉపకారములను జ్ఞాపకము చేసుకుని బలపరచుకుంటున్నాడు.

అయితే ఎందుకు తాను తరమబడుతున్న పరిస్థితిలో గతములో చేయబడిన ఉపకారములు జ్ఞాపకము చేసుకొమ్మని చెప్పుకుంటున్నాడు అని ఆలోచిస్తే, ఇంతకుముందు అద్భుతము చేసిన దేవుడు ఇప్పుడు కూడా చెయ్యగలడు అని నమ్ముట చేతనే కదా! అయితే అలా చేయడానికి కారణము ఏమిటి అని ఆలోచిస్తే –

నేను మిమ్మునుగూర్చి ఉద్దేశించిన సంగతులను నేనెరుగుదును, రాబోవు కాలమందు మీకు నిరీక్షణకలుగునట్లుగా అవి సమాధానకరమైన ఉద్దేశములేగాని హానికరమైనవి కావు; ఇదే యెహోవా వాక్కు.౹ -యిర్మీయా 29:11

ఈరోజు మన జీవితములో అనేకమైన పరిస్థితులు మన జీవితమును ముగించడానికే అపవాది చేత ఉచ్చు పన్ని ఉన్నాయి. అయితే దేవునికి మాత్రము మన పై ఎంతో మేలైన ఆలోచనలు కలిగి ఉన్నాయి గనుక మనము నాశనము కాము. రాబోవు కాలముకొరకైన నిరీక్షిణ మనము కలిగి ఉండుటకు ఆధారముగా దేవుడు మన యెడల ఇంతకు ముందు చేసిన ఆశ్చర్య కార్యములు ఉన్నాయి. దానికి కారణము దేవునికి మనపై ఉన్న ఉద్దేశ్యములే, ఆలోచనలే.

నీవు నా దేవుడవు నేను నీకు కృతజ్ఞతాస్తుతులు చెల్లించెదను నీవు నా దేవుడవు నిన్ను ఘనపరచెదను. -కీర్తనలు 118:28

మన దేవుడు విడిచిపెట్టే దేవుడు కాదు. గతవారము దైవజనుడు మందిర నిర్మాణము కొరకైన ఎంతో క్లిష్టమైన పరిస్థితిలో ఉన్నప్పుడు. దేవుడు ఒక మాట ద్వారా ప్రభువు బలపరుస్తూ వచ్చారు. అదేమనగా-

నిన్ను ఆశ్రయించువారందరు సంతోషించుదురు నీవే వారిని కాపాడుదువు గనుక వారు నిత్యము ఆనందధ్వని చేయుదురు. యెహోవా, నీతిమంతులను ఆశీర్వదించువాడవు నీవే కేడెముతో కప్పినట్లు నీవు వారిని దయతో కప్పెదవు కావున నీ నామమును ప్రేమించువారు నిన్నుగూర్చి ఉల్లసింతురు. -కీర్తనలు 5:11-12

ఈ మాటల ద్వారా అప్పటివరకు ఉన్న నిరాశ, దుఃఖము తొలగించి, దేవుడు మార్గము తెరువగలడు అనే నిరీక్షణ కలిగింది. అప్పుడు దేవుని ద్వారా చూపించిన మార్గము ద్వారా ఆగిపోవలసిన కార్యము కొనసాగించబడే విధముగా సిద్ధపరచబడింది.

దేవుని ప్రేమించువారికి, అనగా ఆయన సంకల్పముచొప్పున పిలువబడినవారికి, మేలుకలుగుటకై సమస్తమును సమకూడి జరుగుచున్నవని యెరుగుదుము.౹ -రోమా 8:28

మన సంఘము కొరకు మందిరము కట్టబడటము అనేది దేవుని సంకల్పము. దానికొరకు సమస్తము సమకూర్చబడతాయి. ఈ మాటలు మనలను నడిపించేవిగా ఉన్నాయి. అయితె, ఈ మేలులు అన్నీ ఎందుకు జరిగిస్తున్నాడు అంటే, మనపై గొప్ప ప్రణాళికలు దేవుడు కలిగి ఉన్న కారణము చేతనే!

గనుక దేవుడు ఇంతకు ముందు చేసిన ప్రతీ మేలును జ్ఞాపకము చేసుకుని ఆయనను ఆరాధిద్దాము.

ఆరాధన గీతము

బలమైన దేవుడవు – బలవంతుడవు నీవు