07-04-2024 – ఆదివారం మొదటి ఆరాధన

వారము కొరకైన వాక్యము

ఈరోజు మనము ఎందుకు దేవుని సత్యములోనే నిలిచి ఉండాలి అనే విషయము గూర్చి తెలుసుకుందాము.

ఆయన, మనుష్యులందరు రక్షణపొంది సత్యమునుగూర్చిన అనుభవజ్ఞానముగలవారై యుండవలెనని యిచ్ఛయించుచున్నాడు.౹ -1 తిమోతికి 2:4

దేవాది దేవుని కోరిక మనుష్యులందరు రక్షణ పొందుకోవడం మాత్రమే కాక, “సత్యము” గూర్చిన “అనుభవము” కలిగి ఉండాలి అనేదే! అయితే సత్యము ఏమిటి?

ఆయన తన రెక్కలతో నిన్ను కప్పును ఆయన రెక్కల క్రింద నీకు ఆశ్రయము కలుగును ఆయన సత్యము, కేడెమును డాలునై యున్నది. -కీర్తనలు 91:4

ఆయన సత్యము, కేడెమును డాలునై యున్నది. దేవుని సత్యములో మనము నిలిచినపుడు, అది మనకు కేడెముగాను, డాలుగాను ఉంది.

డాలు అంటే గుండ్రముగా ఉండి ఎదురుగా వచ్చే దాడిని అడ్డుకోగలిగింది. కేడెము అంటే, డాలు పట్టుకున్న చెయ్యిని మోచేతి వరకు కప్పేది. అది శత్రువు ఆయుధమునుండి కాపాడేది. అంటే శత్రువు మన మీద చేసే ప్రతి దాడి నుండి మనలను తప్పించేది దేవుని సత్యము.

దేవుని సత్యము, ఆ సత్యమునందలి విశ్వాసము మన ఆత్మీయ జీవితములో డాలు వలే, కేడెము వలే పనిచేస్తాయి.

క్రీస్తు సత్యము నాయందు ఉండుటవలన అకయ ప్రాంతములయందు నేనీలాగు అతిశయ పడకుండ, నన్ను ఆటంకపరచుటకు ఎవరి తరముకాదు.౹ -2 కొరింథీయులకు 11:10

“క్రీస్తు సత్యము నాయందు ఉండుటవలన” నన్ను ఆటంకపరచడము ఎవరి వలనా కాదు! అందుకే దేవుని సత్యము మన జీవితములో ఎంతో ప్రాముఖ్యమైనది.

సత్యము ఖచ్చితముగా డాలుగా పనిచేస్తుంది, ఈ సత్యము మనలో ఉంటే మనలను ఆపగలుగుట ఎవరి వలనా కాదు! అనగా మనము కలిగిన సత్యమును బట్టి శత్రువు చేసే దాడినుండి మనము కాపాడబడతాము. అంతే కాక, శత్రువును దాటి ముందుకు వెళ్ళగలిగే సామర్థ్యము కలుగచేస్తుంది,

మేము సత్యమునకు విరోధముగా ఏమియు చేయనేరము గాని, సత్యము నిమిత్తమే సమస్తమును చేయుచున్నాము.౹ -2 కొరింథీయులకు 13:8

శత్రువు మనపై దాడి చేసినపుడు సత్యము మనలను కాపాడుతుంది, ఆ శత్రువును జయించి ముందుకు తీసుకువెళుతుంది. దానికి ముందు మనము సత్యమును పట్టుకుని నిలబడాలి. అలాగే ఆ సత్యమును పట్టుకుని నిలబడేలా మనము సమస్తము సిద్ధపరచుకోవాలి.

యేసయ్య సత్యము, వెలుగు అయి ఉన్నాడు. వెలుగు ఉన్న చోట చీకటి ఉండలేదు. సత్యము నిమిత్తమే సమస్తము చేస్తాను అంటే, నాలో ఏ చీకటి ఉండకుండా అనగా అపవాది క్రియలు ఏవీ ఉండకుండా నా జీవితమును సిద్ధపరచుకోవాలి.

సత్యములో నిలబడితే ఏమి జరుగుతుందో చూద్దాము –

ఆయన సముద్రముమీద నడుచుట శిష్యులు చూచి తొందరపడి, భూతమని చెప్పుకొని భయముచేత కేకలువేసిరి. -మత్తయి 14:26

ఇక్కడ శిష్యులు ఎందుకు భూతము అని అనుకున్నారు? వారి దృష్టిలో భూతములు సముద్రముపై నడువగలదు కానీ మనుష్యులు నడువలేరు అని వారికి తెలిసిన సత్యము.

వెంటనే యేసు ధైర్యము తెచ్చుకొనుడి; నేనే, భయపడకుడని వారితో చెప్పగా పేతురు–ప్రభువా, నీవే అయితే నీళ్లమీద నడిచి నీయొద్దకు వచ్చుటకు నాకు సెలవిమ్మని ఆయనతో అనెను. -మత్తయి 14:27-28

యేసయ్య నేనే, భయపడకుడి అని చెప్పగానే, పేతురు నీవు నిజమైతే నేను కూడా నీళ్ళ మీద నడుచుటకు సెలవిమ్ము అని పేతురు అడిగాడు. ఇక్కడ చూస్తే, ఇంతవరకు భూతమే నీళ్ళమీద నడవగలదు అనేది సత్యముగా అనుకున్నారు. అందుకే “నీవే అయితే” అని యేసయ్యతో అన్నాడు పేతురు.

అనగా శిష్యులు ఇంతవరకు అసత్యమును నమ్మినవారుగా ఉన్నారు. యేసయ్య నిజమైన సత్యమును వారికి చూపించారు. అప్పుడు పేతురు ఆ సత్యమును అనుభవించడానికి అనగా ఆ సత్యములో నిలబడటానికి ఆసక్తి చూపించాడు.

మన జీవితములో కూడా దేవుని గూర్చిన సత్యములో నిలిచి ఉన్నపుడు, యేసయ్య కలిగిన అదృశ్యశక్తిని మనలో కూడా అనుభవించగలుగుతాము.

ఆసా తన దేవుడైన యెహోవాకు మొఱ్ఱపెట్టి – యెహోవా, విస్తారమైన సైన్యముచేతిలో ఓడిపోకుండ బలములేనివారికి సహాయము చేయుటకు నీకన్న ఎవరును లేరు; మా దేవా యెహోవా, మాకు సహాయముచేయుము, నిన్నే నమ్ముకొనియున్నాము, నీ నామమునుబట్టియే యీ సైన్యమును ఎదిరించుటకు బయలుదేరియున్నాము. యెహోవా నీవే మా దేవుడవు, నరమాత్రులను నీ పైని జయమొందనియ్యకుము అని ప్రార్థింపగా -2 దినవృత్తాంతములు 14:11

ఆసా నమ్మిన సత్యము – “యెహోవా, విస్తారమైన సైన్యముచేతిలో ఓడిపోకుండ బలములేనివారికి సహాయము చేయుటకు నీకన్న ఎవరును లేరు”. దానిని బట్టి, ఆ సత్యములో నిలబడుతున్నాడు, అందుకే – “నీ నామమునుబట్టియే యీ సైన్యమును ఎదిరించుటకు బయలుదేరియున్నాము. యెహోవా నీవే మా దేవుడవు, నరమాత్రులను నీ పైని జయమొందనియ్యకుము” అని చెప్పుచున్నాడు. ఆ యుద్ధములో దేవుని సత్యములోని శక్తి ఆసాకు అందించబడి జయము పొందాడు.

అబ్రహాము జీవితములో కూడా తాను నమ్మిన సత్యము గూర్చి చూస్తే –

తన పనివారితో–మీరు గాడిదతో ఇక్కడనే ఉండుడి; నేనును ఈ చిన్నవాడును అక్కడికి వెళ్లి (దేవునికి) మ్రొక్కి మరల మీయొద్దకు వచ్చెదమని చెప్పి -ఆదికాండము 22:5

ఇక్కడ అబ్రహాము, “దేవుడు మృతమైనదానిని సజీవముగ చేయువాడు, లేనిదానిని ఉన్నట్టుగానే చేయగలడు” అనే సత్యమును నమ్మినవాడుగా ఉన్నాడు. దానిని బట్టి ఇస్సాకును పొందగలిగాడు.

అలాగే పేతురు, నీళ్ళమీద నడిచేది భూతమే అనే అసత్యమును నమ్మాడు. అయితే ఇంతకుముందు ఎప్పుడైనా భూతమును అలా నడవడము చూసాడా? లేదు! అయితే లోకములో తాను విన్న దానిని బట్టి అలా అనుకున్నాడు. అదే ఒకవేళ దేవునికి సంబంధించిన సత్యమును గనుక ఎరిగి ఉంటే, పేతురు ఖచ్చితముగా అది దేవుడే అనుకొనేవాడు. అందుకే మనము మన మనస్సును దేవుని గూర్చిన మాటలతో, సత్యముతో, సమాచారముతో మనము నింపుకోవాలి.

మరొకలా చూస్తే, పేతురు లోకములోని అసత్యపు సమాచారమును బట్టి దేవుని సత్యమును ప్రశ్నించినవాడుగా ఉన్నాడు. అందుకే మనము మన మనస్సును దేవుని గూర్చిన మాటలతో, సత్యముతో, సమాచారముతో మనము నింపుకోవాలి.

అలాగే కుష్టురోగి, “నీకిష్టమైతే నన్ను శుద్ధునిగా చేయుము” అని యేసయ్యతో అడిగాడు. ఒకవేళ సత్యము ఎరిగితే ” అని మాత్రమే చెప్పగలుగుతాడు.

అదే తీమయి కుమారుడు అయిన గుడ్డివాడు సత్యమును ఎరిగినవాడుగా ఉన్నాడు గనుకనే, “దావీదు కుమారుడా కరుణించు, నన్ను దాటిపోకు” అని అరిచాడు, ప్రశ్నించలేదు.

అందుకే మనము సత్యములో నిలబడటము ఎంతో అవసరము, రాబోయే దినములలో మనలను నిలబెట్టేది దేవుని సత్యమే! దేవుని గూర్చి చెప్పబడిన ప్రతి మాట సత్యమే! పరిశుద్ధాత్మ గూర్చి చెప్పబడిన ప్రతి మాట సత్యమే! యేసయ్య గూర్చి చెప్పబడిన ప్రతి మాట సత్యమే! అప్పుడు ఆ సత్యములోని శక్తి మనలో ప్రత్యక్షపరచబడుతుంది.