05-11-2023 – ఆదివారం మొదటి ఆరాధన

వారము కొరకైన వాక్యము

ఈరోజు మనకు ప్రభువు కొన్ని ప్రశ్న వేస్తున్నాడు. ఈ ప్రశ్నను బట్టి మన ఆత్మీయ జీవితములను పరీక్షించుకుందాము.

ఇంత గొప్ప సాక్షి సమూహము మేఘమువలె మనలను ఆవరించియున్నందున౹ మనము కూడ ప్రతిభారమును, సుళువుగా చిక్కులబెట్టు పాపమును విడిచిపెట్టి, విశ్వాసమునకు కర్తయు దానిని కొనసాగించువాడునైన యేసువైపు చూచుచు, మన యెదుట ఉంచబడిన పందెములో ఓపికతో పరుగెత్తుదము. ఆయన తనయెదుట ఉంచబడిన ఆనందముకొరకై అవమానమును నిర్లక్ష్యపెట్టి, సిలువను సహించి, దేవుని సింహాసనముయొక్క కుడి పార్శ్వమున ఆసీనుడైయున్నాడు.౹ -హెబ్రీయులకు 12:1-2

ఇంత గొప్ప సాక్షి సమూహము మేఘమువలె మనలను ఆవరించియుండుటకు ఏమైనా కారణము ఉందా? మన జీవితాలకు ముందు ఒక సాక్షి సమూహము దేవుడు ఉంచిఉన్నాడు. మనము దానిని చూసి దేవుని కొరకు సిద్ధపడగలుగులాగున ఈ సాక్షి సమూహము ఉంచబడింది.

మన యెదుట ఉంచబడిన పందెములో ఓపికతో పరుగెత్తుదము. ఆయన తనయెదుట ఉంచబడిన ఆనందముకొరకై అవమానమును నిర్లక్ష్యపెట్టి, సిలువను సహించి, దేవుని సింహాసనముయొక్క కుడి పార్శ్వమున ఆసీనుడైయున్నాడు.

ప్రభువు మనలను అడుగుతున్న ప్రశ్నలు.
“మనము” అనే మాటలో నీవున్నావా?
నీవు ఏ పరుగు పందెములో ఉన్నావు?

క్రీస్తు యేసునందు దేవుని ఉన్నతమైన పిలుపునకు కలుగు బహుమానమును పొందవలెనని, గురి యొద్దకే పరుగెత్తుచున్నాను.౹ -ఫిలిప్పీయులకు 3:14

మంచి పోరాటము పోరాడితిని, నా పరుగు కడ ముట్టించితిని, విశ్వాసము కాపాడుకొంటిని.౹ -2 తిమోతికి 4:7

పౌలు విషయములో అయితే, క్రీస్తునందు దేవుని యొక్క పిలుపు ఉంది అని గ్రహించి. ఆ పిలుపుకు ఒక బహుమానము కూడా ఉంది అని ఎరిగి దానికొరకు గురి యొద్దకు పరిగెడుతున్నాను అంటున్నాడు.

మరి నీవు ఏ గురి కలిగి ఉన్నావు? ఇహలోక సంబంధమైన విషయములలోనా? దేవుడు నీ యెదుట ఉంచిన గురి ఏమైనా ఉందా? నీ సమాధానము ఏమిటి?

కాబట్టి– ఏమి తిందుమో యేమి త్రాగుదుమో యేమి ధరించు కొందుమో అని చింతింపకుడి; అన్యజనులు వీటన్నిటి విషయమై విచారింతురు. ఇవన్నియు మీకు కావలెనని మీ పరలోకపు తండ్రికి తెలియును. కాబట్టి మీరు ఆయన రాజ్యమును నీతిని మొదట వెదకుడి; అప్పుడవన్నియు మీకనుగ్రహింపబడును. -మత్తయి 6:31-33

ఈరోజులలో అనేకమంది క్రైస్తవులు గురి లేని జీవితములు జీవిస్తున్నారు. కేవలము ఇహలోక సంబంధమైన విషయములపైనే దృష్టి ఉంచి జీవితములు ముగిస్తున్నారు. అయితే నీ జీవితము నీ దేవుని సొత్తై ఉన్నది గనుక ఆయన నీకు ఇహలోకములో అవసరమైనవాటి విషయము ఆయనకు తెలుసు అని ఆయనే చెప్పుచున్నాడు. నీవు తినడానికి, ఉండటానికి, ధరించుకొనటానికి అవసరమైన ప్రతీదీ ఆయన సమకూరుస్తాను, అయితే నా రాజ్యమును, నీతిని మొదట వెతుకుము అని చెప్పుచున్నాడు. అంటే నీ భౌతికమైన జీవితములో అవసరమైన ప్రతిదాని గూర్చి నేను ఆలోచన కలిగి ఉన్నాను, నీవు ఆత్మీయమైన జీవితము గూర్చి చింత కలిగి ఉండుము అని ప్రభువు చెప్పుచున్నాడు.

మనము ముగింపు దినములలో ఉన్నాము. ఒకవేళ మనము ఏ పందెములో ఉన్నామో ఎరగక జీవితమును ముగిస్తే ప్రభువు యెదుట నిలబడినప్పుడు ఏమి సమాధానము చెప్పగలుగుతాము?

దేవునియొద్దనుండి పంపబడిన యొక మనుష్యుడు ఉండెను; అతని పేరు యోహాను.౹ -యోహాను 1:6

సాక్షి సమూహములో యోహాను ఒక వ్యక్తి. అతని మూలముగా అందరు విశ్వసించునట్లు అతడు ఆ వెలుగునుగూర్చి సాక్ష్య మిచ్చుటకుదేవుడు అతనిని పంపబడెను. యేసయ్య రాకముందు ప్రజలను మారుమనస్సుకొరకు ప్రకటిస్తూ ఆయనకు ఇవ్వబడిన పందెములో పరిగెట్టినాడు.

మన జీవితము కూడా దేవుని చేత ఇవ్వబడిన జీవితము. మనము కూడా దేవుని చేత పంపబడినవారము, మనకు కూడా ఒక పని ఇవ్వబడింది. ఎలా అయితే యోహాను ఇవ్వబడిన పనిని నెరవేర్చాడో, మనము కూడా అదేవిధముగా ఇవ్వబడిన పనిని నెరవేర్చుటకు గురి కలిగి జీవించాలి.

ప్రవక్తయైన యెషయా గ్రంథము ఆయన చేతి కియ్యబడెను; ఆయన గ్రంథము విప్పగా – –ప్రభువు ఆత్మ నామీద ఉన్నది బీదలకు సువార్త ప్రకటించుటకై ఆయన నన్ను అభిషేకించెను చెరలోనున్న వారికి విడుదలను, గ్రుడ్డివారికి చూపును, (కలుగునని) ప్రకటించుటకును నలిగినవారిని విడిపించుటకును ప్రభువు హితవత్సరము ప్రకటించుటకును ఆయన నన్ను పంపియున్నాడు అని వ్రాయబడిన చోటు ఆయనకు దొరకెను. -లూకా 4:17-19

యేసయ్య కూడా దేవుని చేత పంపబడినవాడు. ఆయన కూడా మనముందు ఉన్న సాక్షి సమూహములో ఉన్నాడు. దేవుడు ఏమైతే సిద్ధపరచి ఉంచాడో, అది చేయడానికి మనము సిద్ధపడితే, నెరవేర్చడానికి ఆయన సన్నద్ధుడై ఉన్నాడు.

ఆత్మీయ జీవితములో ఖచ్చితముగా ఒక పని నీకు ఇవ్వబడింది. గనుక నీకు ఇవ్వబడిన పని ఏమిటో తెలుసుకుని సిద్ధపడు.

అయినను తల్లిగర్భమునందు పడినది మొదలుకొని నన్ను ప్రత్యేకపరచి, తన కృపచేత నన్ను పిలిచిన దేవుడు నేను అన్యజనులలో తన కుమారుని ప్రకటింపవలెనని౹ ఆయనను నాయందు బయలుపరప ననుగ్రహించినప్పుడు మనుష్యమాత్రులతో నేను సంప్రతింపలేదు.౹ -గలతీయులకు 1:15-16

దేవుడు నిన్ను నన్ను కూడా ఎన్నిక చేసుకున్నాడు. అయితే దేనికొరకు నిన్ను ఎన్నిక చేసుకున్నాడో నీవు గ్రహిస్తున్నావా? లేఖనములలో నీకొరకైన దేవుని చిత్తము ఖచ్చితముగా పొందుపరచబడి ఉంటుంది. అయితే దాని ద్వారా దేవుని చిత్తము కనుగొనడానికి నీవు కనిపెట్టాలి.

మన అందరికీ కామన్ గా ఇవ్వబడిన పందెము ఏమిటి అంటే పరిశుద్ధమైన జీవితమును కలిగి, కొనసాగించుట. అయితే ఎలా మనము పరిశుద్ధముగా ఎలా ఉండగలుగుతాము? దేవుని వాక్యము ఆధారముగా మాత్రమే జీవించుటను బట్టి మనము పరిశుద్ధత కొనసాగించుకోగలము. అలా కాని యెడల మనము విడువబడే ప్రమాదము ఉంది. మనము ఈ లోకములో ఉన్నంతవరకే మనము చేయగలిగినది.

నేను యీవిని అపేక్షించి యీలాగు చెప్పుటలేదు గాని మీ లెక్కకు విస్తారఫలము రావలెనని అపేక్షించి చెప్పు చున్నాను.౹ -ఫిలిప్పీయులకు 4:17

అనగా మనము జీవించే జీవితమునకు ఒక లెక్క ఉంది. మనం చేసే ప్రతీ పని లెక్కపెట్టబడుతుంది. ఆ లెక్కను బట్టే ఫలము సిద్ధపరచబడుతుంది. మన ముందు ఉంచబడిన సాక్షి సమూహములోని ఉన్నవారు వారికి ఇవ్వబడిన పిలుపు కొరకు ప్రయాసపడ్డారు. అలాగే నీవు నేను కూడా ప్రయాసపడవలసిన అవసరము ఉంది. పౌలు జీవితములో అయితే అనేకసార్లు మరణమగునంతగా కొట్టబడ్డాడు. ఒక సందర్భములో చనిపోయాడనుకుని ఊరి వెలుపల పడవేసినప్పుడు, మరుసటి దినమున సమాజమందిరములో తిరిగి సమాజమందిరములో బోధించినవాడుగా ఉన్నాడు.

ఇహలోకములో పరుగు పందెములోని వారు సహితము ఎంతో ప్రయాసపడి సిద్ధపడతారు. మరి ఆత్మీయ జీవితములో మనకు ఇవ్వబడిన పందెము కొరకు, ఇంకెంతగా మనము ప్రయాసపడాలి.

మనము కూడ ప్రతిభారమును, సుళువుగా చిక్కులబెట్టు పాపమును విడిచిపెట్టి, విశ్వాసమునకు కర్తయు దానిని కొనసాగించువాడునైన యేసువైపు చూచుచు, మన యెదుట ఉంచబడిన పందెములో ఓపికతో పరుగెత్తుదము. ఆయన తనయెదుట ఉంచబడిన ఆనందముకొరకై అవమానమును నిర్లక్ష్యపెట్టి, సిలువను సహించి, దేవుని సింహాసనముయొక్క కుడి పార్శ్వమున ఆసీనుడైయున్నాడు -హెబ్రీయులకు 12:2

పందెములో ఓపిక అనేది ఖచ్చితముగా అవసరము. పరిశుద్ధమైన జీవితమును సిద్ధపరచుకొనుటలో, కొనసాగించుటలో ఓపిక అవసరము. యేసయ్య తనయెదుట ఉంచబడిన ఆనందముకొరకై అవమానమును నిర్లక్ష్యపెట్టి, సిలువను సహించి, దేవుని సింహాసనముయొక్క కుడి పార్శ్వమున ఇప్పుడు ఆసీనుడైయున్నాడు.

ఇక్కడ ఒక సత్యము ఏమిటి అంటే, మన ఎదుట ఉంచబడిన గురిని చేరుకొనుటలో ప్రయాస ఉంటుంది. దేవుడు అనుగ్రహించే బహుమానము ముందు ఈ ప్రయాస ఎన్నదగినది కాదు. ఈ సత్యము మనము ఎరిగినట్టయితే పౌలు వలే, యేసు వలే, యోహాను వలే అవమానమును నిర్లక్ష్య పెట్టి గురి యొద్దకే పరిగెట్టేవారముగా ఉంటాము.

గనుక ఈరోజు నుంచి, దేవుని వాక్యము ప్రకారముగా మాత్రమే జీవించుటకు సిద్ధపడదాము. నా జీవితములో ప్రతి విషయములో దేవుని మహిమను నేను అనుభవిచాల్సిందే అనే తీర్మానము కలిగి ప్రయాసమైనా సరే అదే గురితో జీవిద్దాము.

దేవుని చేత పంపబడినవారు, లోకములో వారికి ఇవ్వబడిన పని ముగించి, తిరిగి దేవుని వద్దకే వెళ్ళారు. కనుక మన గురి కూడా తిరిగి నా దేవుని యొద్దకే వెళ్ళాలి అని ఉండాలి.

మీరు క్రీస్తుతోకూడ లేపబడినవారైతే పైనున్న వాటినే వెదకుడి, అక్కడ క్రీస్తు దేవుని కుడిపార్శ్వమున కూర్చుండియున్నాడు.౹ పైనున్న వాటిమీదనేగాని, భూసంబంధమైనవాటిమీద మనస్సు పెట్టుకొనకుడి; ఏలయనగా మీరు మృతిపొందితిరి, మీ జీవము క్రీస్తుతోకూడ దేవునియందు దాచబడియున్నది.౹ -కొలొస్సయులకు 3:1-2

అనగా ఎలా అయితే క్రీస్తు ఈలోకములో తనకు ఇవ్వబడిన గురికొరకే ప్రయాసపడి జీవించాడో అలాగే మీరు జీవిస్తే, మీరు కూడా క్రీస్తువలే మరలా దేవుని యొద్దకే చేర్చబడతారు.

పరలోక సంబంధమైన విషయములే మనము గురిగా ఉండటము అంటే ఈ లోకములో వివాహము, పిల్లలు, ఉద్యోగము అన్నీ వదిలి ఉండటమా? కానే కాదు.

ప్రియుడా, నీ ఆత్మ వర్ధిల్లుచున్న ప్రకారము నీవు అన్ని విషయములలోను వర్ధిల్లుచు సౌఖ్యముగా ఉండ వలెనని ప్రార్థించుచున్నాను.౹ -3 యోహాను 1:2

మన ఆత్మ వర్థిల్లుచున్న ప్రకారము అన్ని విషయములలో అంటే, పైన చూసిన విషయాలవంటి అన్ని విషయములలో మనము వర్థిల్లుతాము.

ఆయన పరిపూర్ణతలోనుండి మనమందరము కృప వెంబడి కృపను పొందితిమి.౹ -యోహాను 1:16
బుద్ధి జ్ఞానముల సర్వసంపదలు ఆయనయందే గుప్తములైయున్నవి.౹ -కొలొస్సయులకు 2:3

కాబట్టి, దేవుడు నీకిచ్చిన పని గురిగా నీవు జీవిస్తే, ఆయన పరిపూర్ణతను బట్టి, ఆయన కృప నిన్ను వెంబడించడమునుబట్టి నీ జీవితములో అవసరమైన సమస్తము నీకు సమకూర్చబడుతుంది. అందుకే నిన్ను నీవు వాక్యమును గైకొనువాడిగా, గైకొను దానిగా మనము సిద్ధపడదాము.

కాబట్టి మీరు ఆయన రాజ్యమును నీతిని మొదట వెదకుడి; అప్పుడవన్నియు మీకనుగ్రహింపబడును. -మత్తయి 6:33