05-05-2024 – ఆదివారం రెండవ ఆరాధన

వారము కొరకైన వాక్యము

యెహోవా దయాదాక్షిణ్యములుగలవాడు ఆయన దీర్ఘశాంతుడు కృపాతిశయముగలవాడు. యెహోవా అందరికి ఉపకారి ఆయన కనికరములు ఆయన సమస్త కార్యములమీద నున్నవి. -కీర్తనలు 145:8-9

సంతోషముతో యెహోవాను సేవించుడి ఉత్సాహగానముచేయుచు ఆయన సన్నిధికి రండి. యెహోవాయే దేవుడని తెలిసికొనుడి ఆయనే మనలను పుట్టించెను మనము ఆయన వారము మనము ఆయన ప్రజలము ఆయన మేపు గొఱ్ఱెలము. -కీర్తనలు 100:2-3

దేవుడే నిన్ను నన్ను పుట్టించినవాడు, మరియు మనము ఆయన వారమై ఉన్నాము గనుక, మనము ఆయన కార్యమై ఉన్నాము. కాబట్టి ఆయన కనికరము మనపై ఖచ్చితముగా ఉంటుంది.

అంతే కాక, మనము ఆయన మేపు గొర్రెలమై ఉన్నాము గనుక, మనలను నడిపించేవాడు ఆయనే. వీటన్నిటిని బట్టి మనము ఆయన సొత్తు అని అర్థము చేసుకోవచ్చు.

దేవుడు దయాళుడు అని చెప్పబడుతుంది అంటే, ఆయన దయ మన జీవితములకు ఆధారమై ఉంటుంది.

తగిన కాలమున నీవు వాటికి ఆహారమిచ్చెదవని ఇవన్నియు నీ దయకొరకు కనిపెట్టుచున్నవి -కీర్తనలు 104:27

సమస్త కార్యములపై ఆయన దయ, కరుణ ఉంటుంది. గనుక మనకు కూడా ఆయన దయను బట్టి సమస్తము అనుగ్రహించబడతాయి.

నీవు వాటికి పెట్టునది అవి కూర్చుకొనును నీవు గుప్పిలి విప్పగా అవి మంచివాటిని తిని తృప్తి పరచబడును. -కీర్తనలు 104:28

అనగా, దేవుడు ఇస్తేనే తప్ప మనము పొందుకోలేము, కూర్చుకోలేము, తృప్తిపరచబడలేము.

దేవుడు దయాళుడు అనే వ్యక్తిత్వము మన జీవితములకు ఎంతో అవసరమై ఉన్నది. ఈ సత్యములను మనము మర్చిపోకుండా మన జీవితములను సిద్ధపరచుకోవాలి.

రోడ్డుపై అడుక్కునేవారిని చూసినపుడు వారు నిస్సహాయస్థితిలో ఉంటారు. అనేకులు వారిని చూసి వెళ్ళిపోతారు గానీ, దయ కలిగినవారు మాత్రము వారికి కలిగిన దానిలోనుండి కొంత వారికి ఇస్తారు.

మన దేవుడు కూడా మనము నిస్సహాయ స్థితిలో ఉన్నపుడు మన దేవుడిని తన దయ చూపమని అడిగేవారిగా ఉండాలి.

యెహోవా నీవున్న పరిస్థితిలో ఆదుకొనగల సమర్థుడు అలాగే ఆయన దయ కలిగినవాడు. గనుక నిన్ను దాటిపోడు. నీవున్న నిస్సహాయస్థితిలో సహాయము నీకు అందిస్తాడు.

వెంటనే ఆయన నాయీనను ఒక ఊరికి వెళ్లుచుండగా, ఆయన శిష్యులును బహుజనసమూహమును ఆయనతోకూడ వెళ్లుచుండిరి. ఆయన ఆ ఊరి గవినియొద్దకు వచ్చి నప్పుడు, చనిపోయిన యొకడు వెలుపలికి మోసికొని పోబడుచుండెను; అతని తల్లికి అతడొక్కడే కుమారుడు, ఆమె విధవరాలు; ఆ ఊరి జనులు అనేకులు ఆమెతోకూడ ఉండిరి. ప్రభువు ఆమెను చూచి ఆమెయందు కనికరపడి–ఏడువవద్దని ఆమెతో చెప్పి, దగ్గరకు వచ్చి పాడెను ముట్టగా మోయుచున్నవారు నిలిచిరి. ఆయన –చిన్నవాడా, లెమ్మని నీతో చెప్పుచున్నాననగా ఆ చనిపోయినవాడు లేచి కూర్చుండి మాటలాడసాగెను; ఆయన అతనిని అతని తల్లికి అప్పగించెను. -లూకా 7:11-15

ఈ భాగములో చూస్తే, యేసయ్య కనికరము గలవాడు. నాయీను గ్రామమునకు వెళ్ళుచున్న మార్గము మధ్యలో ఒక తల్లి కనపడుతుంది. ఆ తల్లి విధవరాలు. ఒక్కగానొక్క కుమారుడు కూడా చనిపోయాడు. అంటే ఆమె పరిస్థితి నిస్సహాయ స్థితిని చూసినవాడుగా అక్కడ యేసయ్య ఉన్నాడు.

ఆ విధవరాలు యేసయ్యను అడగలేదు కానీ, యేసయ్యలో ఉన్న కనికరమును బట్టి అక్కడ ఆకార్యము చేసినవాడుగా ఉన్నాడు.

ఒక గొర్రెల కాపరిని గూర్చి ఆలోచించినపుడు, ఒక ప్రదేశములో గొర్రెలు మేత మేయుచుండగా, అక్కడ ఆహారము అయిపోయే అయిపోయే సమయమునకు వేరే ప్రదేశమునకు నడిపించడానికి సిద్ధపడతాడు.

ఎందుకంటే, అదే ప్రదేశములో ఉంటే ఆకలికి తాళలేని పరిస్థితిలో ఉంటాయి. ఆ పరిస్థితిని ఆ గొర్రెల కాపరి చూడలేడు గనుక, మేత దొరికే ప్రదేశమునకు తోడుకొని వెళతాడు.

గనుక ఇప్పుడు జీవము లేని పరిస్థితి ఉంటే కంగారు పడవద్దు గానీ, జీవము గల ప్రదేశమునకు ఆయన నడిపించేవాడు అని నమ్మి సంతోషించండి.

ఆ దినములలో మరియొక సారి బహుజనులు కూడి రాగా, వారికి తిననేమియు లేనందున యేసు తన శిష్యులను తనయొద్దకు పిలిచి –జనులు నేటికి మూడుదినముల నుండి నాయొద్దనున్నారు; వారికి తిననేమియు లేనందున, నేను వారిమీద కనికరపడుచున్నాను; -మార్కు 8:1-2

గొర్రెల విషయములో ఇంకా జీవము లేని పరిస్థితి రాకమునుపే జీవము కలిగే మరొక మార్గమును సిద్ధపరచేవాడుగా ఉనాడు.

ఇక్కడ కూడివచ్చిన జనుల విషయములో, జీవము పోలేదు గానీ, పోయే పరిస్థితిలో ఉన్నారు. అందుకే యేసయ్య “ఒకవేళ” అనే మాట ఉపయోగించారు. అలాగే “మూడు దినములు” అని దినములు కూడా లెక్కపెట్టినవాడుగా ప్రభువు ఉన్నాడు.

అంటే నీవు ఎన్ని దినములు జీవము లేకుండా ఉన్నావో ప్రభువు గమనించేవాడుగా ఉన్నాడు. ఇలాగే కొనసాగించబడితే, నీవు నిరీక్షణ కోల్పోతావేమో అని ప్రభువు తన దయాగుణమును బట్టి, తన కనికరము మనపై చూపించేవాడుగా ఉన్నాడు.

అక్కడ కూడుకున్న వారందరి దగ్గర కలిపి 7 రొట్టెలు ఉన్నాయి. అయితే వారిపై కనికరపడిన యేసయ్య ఆ ఏడు రొట్టెలను ఆశీర్వదించి అవే 7 వేల మందికి సరిపోయేవిధానములో ఆశీర్వదించాడు.

నీ పరిస్థితి కూడా ఎన్ని దినములు జీవములేని పరిస్థితిలో ఉందో, ఆ పరిస్థితిలో నీకు తన కనికరము చూపించి, నీకున్న దానినే ఆశీర్వదించి వృద్ధిచేసేవాడుగా ఉన్నాడు. అంటే ఆయన కనికరము నీవు దీవించబడునట్లుగా నీ జీవితమును సిద్ధపరుస్తుంది.

వాడింక దూరముగా ఉన్నప్పుడు తండ్రి వానిని చూచి కనికరపడి, పరుగెత్తి వాని మెడమీదపడి ముద్దుపెట్టుకొనెను. -లూకా 15:20

తప్పిపోయిన చిన్న కుమారుడు ఆత్మీయముగా ఒకప్పుడు మంచిగా ఉండి, ఇప్పుడు ఆత్మీయత కోల్పోయినవారిని సూచిస్తున్నాడు. తండ్రితో ఉన్నంతసేపు ఆనందమే.

ఈ చిన్న కుమారుని చూస్తే, తనకు రావలసినది సమస్తము పట్టుకుని తండ్రిని విడిచిపెట్టి వెళ్ళిపోయాడు. తండ్రితో ఉన్నంతసేపు తన చుట్టూ రక్షణ కంచె ఉంది. ఎప్పుడైతే తాను వెళ్ళిపోయాడో, అపుడు ఆ రక్షణ కంచేనుండి దూరముగా వెళ్ళినవాడై నష్టపరచబడే స్థితిలోనికి వెళ్ళిపోయాడు.

ఇక్కడ తండ్రి వ్యాపారము చేసేవాడు, ఆ వ్యాపారములో తన కుమారులుకూడా పాలు కలిగిఉన్నారు. తండ్రితో ఉన్నంతసేపు ప్రొటెక్షన్ ఉంది. అయితే ఎప్పుడైతే తండ్రినుండి విడిపోయాడో, అప్పుడు తనకు ప్రొటెక్షన్ పోయింది.

పరలోకపు రాజ్యము కట్టబడటమే తండ్రి యొక్క వ్యాపారమై ఉన్నది. అలాగే ఆ వ్యాపారములో కుమారులుగా మనము కూడా బాధ్యత కలిగిన వారిగా ఉన్నాము. తండ్రితో ఉన్నంతసేపు ఆ వ్యాపారములో పాలు, మనకు రక్షణ. ఒకవేళ తండ్రితో ఉండక, వేరే లోకపు దుర్వ్యాపారములతో గనుక మళ్ళితే, రక్షణ వలయమునుండి దూరమయ్యి అపవాది చేత నష్టపరచబడటానికి చిక్కుపడిపోతాము. అంతే కాక తండ్రితో ఉన్నప్పుడు ఏదైతే కలిగి ఉన్నామో, అది సమస్తము పోగొట్టుకొనే స్థితిలోనికి వెళ్ళిపోతాము.

వాడింక దూరముగా ఉన్నప్పుడు తండ్రి వానిని చూచి కనికరపడి, పరుగెత్తి వాని మెడమీదపడి ముద్దుపెట్టుకొనెను. -లూకా 15:20

అయితే విడిచివెళ్ళిన చిన్నకుమారుడు తిరిగివచ్చినపుడు ఆ తండ్రి ఎంతో సంతోషించేవాడుగా ఉన్నాడు. తండ్రి నీ స్థితిని చూసి, నీవు కోల్పోయిన జీవమును తిరిగి దయచేసేవాడిగా ఉన్నాడు.

కుమారుడికి తండ్రి కలిగినదానిలో స్వాతంత్ర్యము ఉంటుంది. దాసుడైతే యజమానుడు దయచేసేవరకు వేచిఉండవలసినదే. తండ్రి తన చిన్నకుమారుడు ఇంకా మురికి బట్టలతో ఉన్నపుడే పరుగున వెళ్ళి ముద్దుపెట్టుకున్నాడు. ముద్దు అనేది అంగీకారమునకు సూచన అయి ఉన్నది.

యెహోవా దయాదాక్షిణ్యములుగలవాడు ఆయన దీర్ఘశాంతుడు కృపాతిశయముగలవాడు. యెహోవా అందరికి ఉపకారి ఆయన కనికరములు ఆయన సమస్త కార్యములమీద నున్నవి. -కీర్తనలు 145:8-9

నీవు నేను ఆయన పని అయి ఉన్నాము. ఆయన కనికరము నీపైనా నాపైన కూడా ఉంది. ఆయన కనికరమును బట్టి నీవు కోల్పోయినదానిని తిరిగి నీకు దయచేసేవాడిగా ఉన్నాడు.