05-03-2023 ఆదివారం మొదటి ఆరాధన – ఆయనయందు నిలచి యుండుడి

Main message| మెయిన్ మెసేజ్

ఈరోజు మనము ధ్యానము “ఆయనయందు నిలిచియుండుడి”. ఏ వాక్యము నీ దగ్గరకు వచ్చినా, ఆ వాక్యములో నీ జీవితము ఉంది. దేవుడు విడుదలచేసే వాక్కులో నీ జీవితమును నీవు కనుగొనగలిగితే నీవు సత్యమును ఎరుగగలుగుతావు.

ద్రాక్షావల్లిని నేను, తీగెలు మీరు. ఎవడు నాయందు నిలిచియుండునో నేను ఎవనియందు నిలిచి యుందునో వాడు బహుగా ఫలించును; నాకు వేరుగా ఉండి మీరేమియు చేయలేరు – యోహాను 15:5.

“మీరు” అనే మాట ప్రాముఖ్యమైనది. మన జీవితాలు ఫలించాలి అంటే ఈ ఆత్మీయ సత్యము మనము పట్టుకోవాలి. వాక్యాన్ని నీవు చేతపట్టుకున్నపుడు నీవు జ్యోతివలే ప్రకాశిస్తావు. నీవు ఫలించటానికి ఒక మర్మము లేఖనము తెలియచేస్తుంది.

1. దేవుని యందు నిలిచియుండుట
2. దేవుడు మనయందు నిలిచి యుండుట

ఏ మానవుడును దేవుని ఎప్పుడును చూచియుండ లేదు; మనమొకనినొకడు ప్రేమించిన యెడల దేవుడు మనయందు నిలిచియుండును; ఆయన ప్రేమ మనయందు సంపూర్ణమగును. దీనివలన మనము ఆయనయందు నిలిచియున్నామనియు ఆయన మన యందున్నాడనియు తెలిసికొనుచున్నాము; ఏలయనగా ఆయన మనకు తన ఆత్మలో పాలు దయచేసియున్నాడు. – 1 యోహాను 4:12-13.

నీవు ప్రేమ కలిగి ఉన్నప్పుడు, అనగా ఇతరులను ప్రేమించే మనస్సు నీవు కలిగి ఉన్నప్పుడు నీవు ఫలించేవాడవుగా ఉంటావు. అయితే మన జీవితాలను పరీక్షించుకోవాలి. కయీను మరియు హేబెలు అన్నదమ్ములే కానీ కయీను హేబెలును చంపినవాడుగా ఉన్నాడు. కారణము ఏమిటి అని ఆలోచిస్తే, ఇద్దరూ దేవునికి అర్పణ తీసుకొచ్చారు. హేబెలు అర్పణ అంగీకరించబడింది అయితే కయీను అర్పణ అంగీకరించబడలేదు, అయితే ఆ బాధచేత పుట్టిన అసూయ తన తమ్ముడిమీద ప్రేమను చంపేసింది. అందుచేత హేబెలును చంపేసాడు. మనలో ఉన్న శరీర క్రియలైన అసూయ, ద్వేషము మనలో ఉన్న దేవుని ప్రేమను చంపివేస్తున్నాయి. ఎప్పుడైతే ఆ ప్రేమ చచ్చిపోయిందో, ఆయనలో నీవు నిలిచి ఉండలేవు, నీలో ఆయన నిలిచి ఉండలేదు. దేవుని ప్రేమను చంపివేసేది ఏమిటంటే, మనలో పనిచేసే శరీరక్రియలు. ఎప్పుడైతే మనము శరీర క్రియలు జరిగిస్తామో, పాపమును కూడగట్టుకుంటాము. నిజానికి మనలో దేవుని ప్రేమ ఉంటుంది, అయితే ఎప్పుడైతే శరీర క్రియ ప్రేరేపిస్తుందో ఆ ప్రేమను చంపివేసేవారముగా అయిపోతాము. దేవుని ప్రేమ లేనివాడు ఆయనవాడవు కాదు.

ప్రేమ దీర్ఘకాలము సహించును, దయ చూపించును. ప్రేమ మత్సరపడదు; ప్రేమ డంబముగా ప్రవర్తింపదు; అది ఉప్పొంగదు; – 1 కొరింథీ 13:4

కోపము దేవుని చిత్తాన్ని నెరవేర్చదు. అయితే ప్రేమ నీలో ఉంటే సహనము ఉంటుంది. నీవు దయను కలిగినవాడుగా ఉంటావు. ప్రేమ కలిగినవారు డంబముగా ప్రవర్తించదు. ఇంకా చూస్తే, “అమర్యాదగా నడువదు; స్వప్రయో జనమును విచారించుకొనదు; త్వరగా కోపపడదు; అపకారమును మనస్సులో ఉంచుకొనదు. దుర్నీతివిషయమై సంతోషపడక సత్యమునందు సంతోషించును. అన్ని టికి తాళుకొనును, అన్నిటిని నమ్మును; అన్నిటిని నిరీక్షించును; అన్నిటిని ఓర్చును. – 1 కొరింథీ 13:5-7“. మనము ప్రత్యేకించబడినవారము. యేసయ్యే మన ప్రత్యేకత. ఈ లక్షణములు మనము క్రియా రూపములో కనపరచినప్పుడు మనము దేవునిలో నిలిచి ఉన్నామని సాక్ష్యము ఇవ్వగలుగుతాము.

మనుష్యులు మీ సత్క్రియలను చూచి పరలోకమందున్న మీ తండ్రిని మహిమపరచునట్లు వారియెదుట మీ వెలుగు ప్రకాశింప నియ్యుడి. – మత్తయి 5:16.

నిత్య నరకము లోనికి వెళ్ళకుండునట్లు, “ప్రేమ” కలిగి ఉండుట అనే “దేవుని ఆజ్ఞ” ను పాటించుట కొరకు నీ జీవితమును మార్చుకొనవలసినదే అని గుర్తించు. దేవుని ఆజ్ఞ మన జీవితమునకు దీపము అయి ఉన్నది.

ఆయన ఆజ్ఞలను గైకొనువాడు ఆయన యందు నిలిచియుండును, ఆయన వానియందు నిలిచి యుండును; ఆయన మనయందు నిలిచియున్నాడని ఆయన మనకనుగ్రహించిన ఆత్మమూలముగా తెలిసికొను చున్నాము. – 1 యోహాను 3:22

నిత్య నరకము లోనికి వెళ్ళకుండునట్లు, “ప్రేమ” కలిగి ఉండుట అనే “దేవుని ఆజ్ఞ” ను పాటించుట కొరకు నీ జీవితమును మార్చుకొనవలసినదే అని గుర్తించు. దేవుని ఆజ్ఞ మన జీవితమునకు దీపము అయి ఉన్నది.

యేసు దేవుని కుమారుడని యెవడు ఒప్పుకొనునో, వానిలో దేవుడు నిలిచియున్నాడు, వాడు దేవునియందున్నాడు – 1 యోహాను 4:15.

యేసుకు తండ్రి చేత సర్వాధికారము ఇవ్వబడినది అనే సత్యమును అంగీకరించాలి. అలాగే అనేకసార్లు మనము వినేది, “కేవలము ప్రార్థన వలన ఏమి జరుగుతుంది?” అనే మాటలు. అయితే నీవు ఆయన మాట నమ్మాలి, ఆయన అధికారముకలిగిన వాడు అని మనము నమ్మాలి.

కాబట్టి ఆయనద్వారా మనము దేవునికి ఎల్లప్పుడును స్తుతియాగము చేయుదము, అనగా ఆయన నామమును ఒప్పుకొనుచు, జిహ్వాఫలము అర్పించుదము. – హెబ్రీయులకు 13:15.

మనము ఆరాధించే సమయములో తెలియచేయబడిన సత్యమును ఒప్పుకొంటున్నాము. ఆ సత్యము యేసే అయి ఉన్నాడు. అలాగే-

కుమారుని ఒప్పుకొనని ప్రతివాడును తండ్రిని అంగీకరించువాడుకాడు; కుమారుని ఒప్పుకొనువాడు తండ్రిని అంగీకరించు వాడు – 1 యోహాను 2: 23
మనుష్యులయెదుట నన్ను ఒప్పుకొనువాడెవడో పరలోకమందున్న నా తండ్రి యెదుట నేనును వానిని ఒప్పుకొందును. మత్తయి – 10:32

నా శరీరము నిజమైన ఆహారమును నా రక్తము నిజమైన పానమునై యున్నది. “నా శరీరము తిని నా రక్తము త్రాగువాడు నాయందును, నేను వానియందును నిలిచియుందుము.” – యోహాను 6:55-56.
దానిని విరిచియిది మీకొరకైన నా శరీరము; నన్ను జ్ఞాపకము చేసికొనుటకై దీనిని చేయుడని చెప్పెను – 1 కొరింథీ 11:24

మనకొరకు నలుగగొట్టబడి, మన పాపముల కొరకు శిక్షించబడినది చెల్లించినది ఆయన శరీరము. మన పాపములకొరకు ప్రాయశ్చిత్తము చేసి వెల చెల్లించినది ఆయన రక్తము. ఈ సత్యము గ్రహించి మనము సిద్ధపడాలి. మనము ఫలించాలి అనేది ఆయన ఆశ!

మరొక సత్యము, కొన్ని సందర్భాలలో భౌతికముగా ప్రభు శరీరము, రక్తము లలో పాలు కలిగి ఉండలేము. అయితే శరీరమునకు సాదృశ్యమైన “వాక్యము” నకు లోబడి ఉంటే, నీవు పాలు కలిగి ఉన్నట్టే

ఈరోజు నేర్చుకున్న నాలుగు విషయాలు.
1. దేవుని ప్రేమను కలిగి ఉండాలి.
2. దేవుని మాటలు లోబడి ఆజ్ఞలు పాటించాలి.
3. ఆయన నామమును ఒప్పుకోవాలి.
4. ఆయన శరీరము, రక్తములో పాలు కలిగి ఉండాలి.