05-03-2023 ఆదివారం రెండవ ఆరాధన – కృప విస్తరించును 

Main message| మెయిన్ మెసేజ్

ఈరోజు మన ధ్యానము “కృప విస్తరించును”. దేవుని కృప గురించి మనకు ఎక్కువగా తెలియని స్థితిలో ఉంటున్నాము.

చాలకాలము క్రిందట యెహోవా నాకు ప్రత్యక్షమై యిట్ల నెను శాశ్వతమైన ప్రేమతో నేను నిన్ను ప్రేమించుచున్నాను గనుక విడువక నీయెడల కృప చూపుచున్నాను – యిర్మియా 31:3

దేవుడు చెప్పుచున్న మాటలు, “నిన్ను ప్రేమించుచున్నాను గనుక” నిన్ను “విడువక” “కృప” చూపించుచున్నాను అని. నీవు ఏ స్థితిలో ఉన్నప్పటికీ నిన్ను విడువక నీ యెడల కృపచూపుచున్నాడు. ఈ కృపనే ఆధారము చేసుకుని మనము బ్రతకాలి. ఈ కృప తండ్రి యొద్దనుండి మనకు ఇవ్వబడింది. దేవుని ప్రేమ మన జీవితము చివరివరకు చూపించబడుతుంది గనుక ఆయన కృప కూడా మన జీవితము చివరివరకు ఉంటుంది. ఒకవేళ నీవు దేవునితో ఉంటే ప్రేమ నీ జీవితములో పరిపూర్ణం అవుతుంది. ఒకవేళ నీవు దేవునితో సమాధానము లేని స్థితిలో ఉంటే, ప్రేమ నిన్ను తిరిగి దేవుని దగ్గరకే చేరుస్తుంది. అందుకే ఆయనది శాశ్వతమైన ప్రేమ. అందుకే మనము ఆయన కృప మీద ఆధారపడాలి. దేవుని కృప యొక్క లక్షణము “విస్తరించుట” నిన్ను నీ జీవితకాలము “వెంబడించుట”.

దేవుని కృపలోనే అన్నీ ఉన్నాయి అని అనేకసార్లు మనకు వాక్యము బోధించబడింది. అన్నీ అంటే క్షమాపణ, దయ, సమాధానము మొదలైన దేవుని గుణలక్షణములన్నీ ఆ కృపలో మనకు విడుదల అవుతాయి. ఎవరికి ఏది అవసరమో అది ప్రతి ఒక్కరి జీవితములో విడుదల అవుతుంది.

యెహోవా ఇశ్రాయేలీయుల దేవా, హృదయపూర్వకముగా నిన్ను అనుసరించు నీ భక్తులకు నిబంధనను నెరవేర్చుచు కృపను చూపుచునుండు నీవంటి దేవుడు ఆకాశమందైనను భూమి యందైనను లేడు – 2 దినవృత్తాంతములు 6:14

మన శరీర జీవితములో మనకు ఉన్న ఉద్యోగము బట్టి ఎమైనా సమకూర్చుకోగలము అని సంతోషముగా ఉంటాము. అయితే ప్రపంచ పరిస్థితులను బట్టి ఆ ఉద్యోగము ఉండవచ్చు పోవచ్చు. అయితే దేవునిని ఆధారము చేసుకునేవారు ఏ పరిస్థితిలోనైనా దేవుని కృపను బట్టి నిలబడతారు.

యెహోవా దయాళుడు ఆయనకు కృతజ్ఞతా స్తుతులు చెల్లించుడి ఆయన కృప నిత్యముండును. కీర్తన 107:1
కృప ద్వారా జరిగేది సూపర్ నేచురల్ విషయాలు. అది నీ జీవితములో ప్రతి పరిస్థితిలోను సూపర్ నేచురల్ జరిగిస్తుంది. అయితే కృప యొక్క లక్షణము – “విస్తరించుట”.
అబ్రాహామను నా యాజమానుని దేవుడైన యెహోవా స్తుతింపబడునుగాక; ఆయన నా యజమానునికి తన కృపను తన సత్యమును చూపుట మానలేదు – ఆదికాండము 24:27

“కృప చూపుట మానలేదు” అంటే దాని అర్థము ఇంతకు ముందు కూడా కృప చూపించాడు అనే కదా! అబ్రహాము జీవితములో ఇంతకుముందు ఎక్కడ కృప చూపించాడు? ఇస్సాకు పుట్టుకలో కృప చూపించాడు. శారా గర్భము మృతతుల్యము అయిపోయింది, స్త్రీ ధర్మము నిలిచిపోయింది అయితే దేవుని కృపనుబట్టి సూపర్ నేచురల్ జరిగి ఇస్సాకు పుట్టుక జరిగింది. అయితే ఇప్పుడు ఇస్సాకు వివాహము విషయములో కూడా ఆ కృప చూపించబడింది.

మన జీవితములో కూడా దేవుని కృప విడుదల చేయబడుతుంది.

అయినను దేవుడు కరుణాసంపన్నుడై యుండి, మనము మన అపరాధములచేత చచ్చినవారమై యుండినప్పుడు సయితము మనయెడల చూపిన తన మహా ప్రేమచేత మనలను క్రీస్తుతోకూడ బ్రదికించెను. కృపచేత మీరు రక్షింపబడియున్నారు.ఎఫెసీ 2:4-5

నీవు క్రీస్తును అంగీకరించావు అంటే, నీ పుట్టుక ఎటువంటిది? ఒకప్పుడు మన జీవితాలు పాపముతో చచ్చిన జీవితాలు. అయితే యేసుక్రీస్తు ద్వారా నూతనమైన జీవితము ఇవ్వబడింది. అయితే నూతనమైన జీవితము పొందుకోవడానికి మనము ఏమి చేసాము? ఏమీ చేయ్యలేదు. ఆయనే ముందుగా నిర్ణయించి, వెతికి, సువార్తను ప్రకటించి తన ప్రేమను వెల్లడి పరిచాడు. ఇంతకు ముందు నీవు పాపివి అంటే ఒప్పుకునేవాడివా? అయితే ఈరోజు నీలో ఆ మార్పు ఎలా వచ్చింది? కృపను బట్టి.

ఇస్సాకు జీవితములో పుట్టుకలో మొదలయిన కృప వివాహము విషయములో కూడా విస్తరించింది. సుబుద్ధి గలిగిన భార్య యెహోవా దానము. ఇస్సాకు ఉన్న పరిస్థితి చూస్తే, తల్లి చనిపోయి దుఃఖములో ఉన్నాడు. అయితే దేవుని కృపను బట్టి భార్యను పొంది, తన కష్టములో దుఃఖనివారణ పొందాడు.

అలాగే మన ఆత్మీయ పుట్టుక కృపను బట్టి కలిగింది. మన ఆత్మీయ జీవితము కొనసాగించబడుతుండగా, మనమున్న కష్ట పరిస్థితులలో కూడా దేవుని కృప విడుదల అవుతుంది. అందుకే దేవుని కృప నిరంతరము ఉంటుంది అని వ్రాయబడింది.

దేవునిగూర్చినట్టియు మన ప్రభువైన యేసునుగూర్చినట్టియునైన అనుభవజ్ఞానమువలన మీకు కృపయు సమాధానమును విస్తరించును గాక. 2 పేతురు 1:3

యేసయ్యను గూర్చిన అనుభవములో నీవుంటే, ఆ అనుభవ జ్ఞానము బట్టి నీ జీవితములో కృప మరియు సమాధానము విస్తరిస్తుంది. దావీదు గురించి ఒకసారి ఆలోచిస్తే,

నిన్ను స్థాపించుటకై నేను కొట్టి వేసిన సౌలునకు నా కృప దూరమైనట్లు అతనికి నా కృప దూరము చేయను – 2 సమూయేలు 7:15
నేనైతే దేవుని మందిరములో పచ్చని ఒలీవ చెట్టువలె నున్నాను నిత్యము దేవుని కృపయందు నమ్మిక యుంచుచున్నాను – కీర్తన 52:8

దావీదుకు దేవుని కృప అనుగ్రహించబడింది. దావీదు కూడా ఆ కృపయందే నమ్మిక ఉంచాడు. అందుకే దేవునిని కాపరిగా గుర్తించాడు. “యెహోవా నా కాపరి నాకు లేమి కలుగదు. పచ్చికగల చోట్లను ఆయన నన్ను పరుండజేయు చున్నాడుశాంతికరమైన జలములయొద్ద నన్ను నడిపించుచున్నాడు – కీర్తన 23:1-2”. కాపరిని గూర్చి ఆలోచిస్తే, ఆ కాపరి ఎలా నడిచివెళ్తే ఆ గొర్రెలుకూడా ఆ కాపరివెంటే వెళతాయి. ఆ కాపరి పచ్చికవద్దకు తీసుకెళతాడు. మన జీవితములో దేవుని చేత కృప అనుగ్రహించబడుతుంది. ఆ కృప ఎక్కడికి తీస్కెళుతుంది? జీవము కలిగిన స్థితిలోనికే! అందుకె దావీదు ఇలా చెప్పగలుగుతున్నాడు – “నేను బ్రదుకు దినములన్నియు కృపాక్షేమములే నా వెంట వచ్చునుచిరకాలము యెహోవా మందిరములో నేను నివాసము చేసెదను – కీర్తన 23:6”. దేవుని కృపను నమ్మినవాడే ఇలా చెప్పగలడు. పరిస్థితులు కష్టముగా ఉన్నప్పటికీ, “గాఢాంధకారపు లోయలో నేను సంచరించినను ఏ అపాయమునకు భయపడనునీవు నాకు తోడై యుందువు నీ దుడ్డుకఱ్ఱయు నీదండమును నన్ను ఆదరించును. నా శత్రువులయెదుట నీవు నాకు భోజనము సిద్ధ పరచుదువునూనెతో నా తల అంటియున్నావునా గిన్నె నిండి పొర్లుచున్నది – కీర్తన 23:4-5” అని చెప్పగలుగుతాము. ఇలా దావీదు దేవుని చేత అనుగ్రహించబడిన కృపచేత నడిపించబడ్డాడు.

శత్రువు యెదుట భోజనము సిద్ధపరచుదువు అనగా ఏమిటి? శత్రువు ఎప్పుడు నీ నాశనాన్నే కోరుకుంటాడు. అయితే వెంట వచ్చుచున్న కృపను బట్టి నీ శత్రువు ప్రయత్నాలు ఏమీ నెరవేరవు, నీ శత్రువు సిగ్గుపరచబడపోతున్నాడు. ఆమేన్! ఒకవేళ మనము బలము కలిగి ఉంటే, శత్రువును ఓడిస్తాము. అయితే వాడు శత్రువు నిలబడుతున్నాడు అంటే, నీవు బలహీనుడవు. అయితే నీకు దేవుడనుగ్రహించిన కృప నీ బలహీన పరిస్థితిలో నీ శత్రువును సిగ్గుపరుస్తుంది. మనము చూసిన పచ్చిక అవసరమైన పరిస్థితులు, గాఢాంధకరాము వంటి పరిస్థితులు, శత్రువులు చుట్టుముట్టిన పరిస్థితులు అన్నీ ఒకే సారి రావు. ఒక్కక్కటిగా తన పరిస్థితులలో, విడుదల అయిన కృపను గూర్చిన అనుభవ జ్ఞానము బట్టి, తరువాత వచ్చుచున్న పరిస్థితులలో ఆ కృప మీదే ఆధారపడి నిలబడి, ఆ కృపకు సాక్ష్యముగా ఉన్నాడు. ఇలా దేవుని కృప విస్తరిస్తుంది అని మనము తెలుసుకోగలము. దావీదు కృపను ఎరిగి ఉన్నాడు గనుకనే “నా ప్రాణమా ఆయన చేసిన మేలులను మరువకు అని చెప్పుచున్నాడు”.

దావీదు జీవితములోనే కాదు గానీ సొలోమోను జీవితములో కూడా చూస్తే,

సొలొమోను ఈలాగు మనవి చేసెనునీ దాసుడును నా తండ్రియునైన దావీదు నీ దృష్టికి అనుకూలముగా సత్య మును నీతిని అనుసరించి యథార్థమైన మనసు గలవాడై ప్రవర్తించెను గనుక నీవు అతనియెడల పరిపూర్ణ కటాక్షమగుపరచి, యీ దినముననున్నట్లుగా అతని సింహాసనముమీద అతని కుమారుని కూర్చుండబెట్టి అతనియందు మహాకృపను చూపియున్నావు 1 రాజులు 3:6

సొలోమోను సింహాసనము మీద కూర్చున్నాడు. దావీదుకు అనుగ్రహించబడిన కృప తన తరువాత తరముకు కూడా అనుగ్రహించబడుతుంది. మనము కూడా మన జీవితాలను చూద్దాము. దావీదుకు దేవుని కృపను గూర్చిన అనుభవము కలిగి ఉన్నాడు. మనము యేసు క్రీస్తును గూర్చిన అనుభవము కలిగి ఉండాలి.

నేను గొఱ్ఱలకు మంచి కాపరిని; మంచి కాపరి గొఱ్ఱలకొరకు తన ప్రాణము పెట్టును – యోహాను 10:11

కాపరిగా ఉన్న యేసయ్య తన కృపను మన జీవితములో విస్తరింపచేసేవాడుగా ఉన్నాడు. ఈ అనుభవ జ్ఞానము మనము కలిగి ఉండాలి.

మరియు అపరాధము విస్తరించునట్లు ధర్మశాస్త్రము ప్రవేశించెను. అయినను పాపము మరణమును ఆధారము చేసికొని యేలాగు ఏలెనో, ఆలాగే నిత్యజీవము కలుగుటకై, నీతిద్వారా కృపయు మన ప్రభువైన యేసుక్రీస్తు మూలముగా ఏలునిమిత్తము పాపమెక్కడ విస్తరించెనో అక్కడ కృప అపరిమితముగా విస్తరించెను. రోమా 5:20-21

యేసు క్రీస్తు కాపరిగా ఉన్నాడు. ఇప్పుడు ఆయన మూలము గా ఏలు నిమిత్తము ఆయన కృప ఎక్కడ విస్తరిస్తుంది? పాపము ఎక్కడ విస్తరిస్తుందో అక్కడ దేవుని కృప విస్తరిస్తుంది. పాపము వలన వచ్చేది మరణము. ఎక్కడైతే నీ జీవితములో నెగటివ్ పరిస్థితులు ఉన్నాయో అక్కడ నిన్ను తప్పించడానికి దేవుని కృప విడుదల అవుతుంది. ప్రత్యేకించి “నీ శత్రువును నీవు ఏలు నిమిత్తము దేవుని కృప నీకు తోడుగా వస్తుంది”.

వారు బయలుదేరి వాక్యమంతట ప్రకటించిరి. ప్రభువు వారికి సహకారుడై యుండి, వెనువెంట జరుగుచువచ్చిన సూచక క్రియలవలన వాక్యమును స్థిరపరచుచుండెను. ఆమేన్‌. – మార్కు 16:20

నీ శత్రువు సిగ్గుపడటమే దేవుడు నీకు అనుగ్రహించుచున్న కృపను బట్టి జరిగేది. నేను బ్రదుకు దినములన్నియు నేను ఏలువాడుగా ఉంటాను. నా వెంట వచ్చుచున్న కృపను బట్టి చిరకాలము దేవునికి సాక్షిగా ఉందును అని నీవు చెప్పగలుగుతావు.