05-02-2023 ఆదివారం మొదటి ఆరాధన – ప్రార్థించు

Main message| మెయిన్ మెసేజ్

మనము అబద్ధాన్ని వెంబడించట్లేదు గానీ నిజమైన దేవునిని వెంబడిస్తున్నాము. అందుకే వాక్యము చెప్పేది సత్యము. ఆయన కనికరము నీ మీద నిలుస్తుంది అంటే నీ స్థితి మార్చబడుతుంది. ఇంతకు ముందు నీ స్థితి సరిగాలేదేమో, అనారోగ్యము ఉందేమో, అయితే నీవు సత్యము ఎరిగి ఆయనను స్తుతించినప్పుడు, నీ స్థితి మార్చబడుతుంది.

ఈ రోజు ప్రభువు మనతో మాట్లాడబోతున్నాడు, మీ జీవితములు మార్చబడుతున్నాయి. ఈరోజు మన ధ్యానంశము “ప్రార్థించు”.

మన ముందు యేసు ప్రభువు ఉన్నారు. ఆయన మనకు మాదిరి అయి ఉన్నారు.

క్రీస్తుకూడ మీకొరకు బాధపడి, మీరు తన అడుగుజాడలయందు నడుచుకొనునట్లు మీకు మాదిరియుంచి పోయెను – 1 పేతురు 2:21

“నేను తన అడుగుజాడలలో నడచునట్లు అన్ని విషయాలలో మాదిరి ఉంచినాడు” అని నీవు తీసుకోవాలి. ప్రార్థించుటలో కూడా ఆయన ఒక మాదిరి ఉంచివెళ్ళాడు. ఆయన ఏ రీతిగా ప్రార్థించాడో తెలుసుకుందాము.

ఆయన పెందలకడనే లేచి యింకను చాలా చీకటి యుండగానే బయలుదేరి, అరణ్యప్రదేశమునకు వెళ్లి, అక్కడ ప్రార్థన చేయుచుండెను – మార్కు 1:35.

ప్రార్థన అంటే దేవుని మాట్లాడుట. అయితే ఎప్పుడు మరియు ఎలా అనేది మనము జ్ఞాపకము చేసుకోవాలి. యేసయ్య అయితే పెందలకడనే, ఇంకా చీకటిగా ఉండగానే లేచి ప్రార్థన చేసినవాడుగా ఉన్నాడు. ఈ దినము నేను దేవునితో ఆరంభించాలి అనే ఆశ ఆసక్తి కలిగి యేసయ్య ప్రార్థించాడు. అరణ్య ప్రదేశము అనగా ఎటువంటి ఆటంకములు లేని ప్రదేశము, దేవుడు తప్ప మరెవరు కనబడని
ప్రదేశము.

ఆ దినములయందు ఆయన ప్రార్థనచేయుటకు కొండకు వెళ్లి, దేవుని ప్రార్థించుటయందు రాత్రి గడిపెను. లూక 6:12

ఇక్కడ కూడ, ఎవరూ ఆటంకపరచని ప్రదేశములో యేసయ్య ప్రార్థించాడు. మనము కూడా నేర్చుకోవలసినది ఏమిటంటే, ప్రార్థన చేసినప్పుడు ఎటువంటి ఆటంకము లేని ప్రదేశమును సిద్ధపరచుకోవాలి. మనలను ఆటంకపరచేది మన మొబైల్. ప్రార్థించేటప్పుడు మీ మొబైల్స్ ను పక్కకు పెట్టండి, దేవుని సన్నిధిలో దేవునితో మాట్లాడటానికి సిద్ధపడండి.

కొంతమంది ఉదయము కొంతమంది రాత్రి ప్రార్థన చేస్తున్నారు. అయితే ఆటంకములు లేకుండా ఆది చేయాలి అని గమనించండి

కాబట్టి మీరీలాగు ప్రార్థనచేయుడి, పర లోకమందున్న మా తండ్రీ, నీ నామము పరిశుద్ధపరచబడు గాక, నీ రాజ్యము వచ్చుగాక, నీ చిత్తము పరలోకమందు నెరవేరుచున్నట్లు భూమియందును నెరవేరును గాక, మా అనుదినాహారము నేడు మాకు దయచేయుము. మా ఋణస్థులను మేము క్షమించియున్న ప్రకారము మా ఋణములు క్షమించుము. మమ్మును శోధనలోకి తేక దుష్టునినుండి మమ్మును తప్పించుము.- మత్తయి 6:9

మొదటిగా, ప్రార్థన చెయ్యవలసినది తండ్రికి అది కూడా యేసయ్య నామములో చెయ్యాలి. ఆ తరువాత ఆయన మహిమను, ఘనతను ప్రకటించాలి. “నీ నామము పరిశుద్ధపరచబడు గాక, నీ రాజ్యము వచ్చుగాక, నీ చిత్తము పరలోకమందు నెరవేరుచున్నట్లు భూమియందును నెరవేరును గాక” అనేది దానినే సూచిస్తుంది. అటుతరువాత నీ అవసరములు అడగాలి. అటుతరువాత ఆయన శక్తిని ఒప్పుకోవాలి.

1. తండ్రికి నీ ప్రార్థన సంబోధించాలి
2. దేవుని మహిమ ప్రకటించాలి
3. నీ అవసరము గూర్చి అడగాలి
4. నీవు అడిగినది దయచేయు సమర్థుడవు అని ఒప్పుకోవాలి
5. యేసు నామములో సమర్పించాలి

ప్రార్థన ఎప్పుడు చేయాలి? మనకు అవసరమైనప్పుడు ప్రార్థన చేస్తాము, ఇంకొంతమంది శోధనలో పడకుండునట్లు ప్రార్థన చేస్తారు. అయితే ఈరోజు మరొక సత్యము తెలుసుకుందాము.

నీ జీవితములో దుష్టుడు పనిచేస్తున్నాడా? ఎలా పని చేస్తున్నాడు? దుష్టుడు అనగానే ఏదో భయంకరముగా భూతములాగా ఆలోచిస్తాము. అయితే అదంతా మన ఊహ. మీరు క్రీస్తు బిడ్డలు. అయినప్పటికీ దుష్టుడు మీ జీవితాలలో ఎల పనిచేస్తాడు?

ఎవడైనను రాజ్య మునుగూర్చిన వాక్యము వినియు గ్రహింపక యుండగా, దుష్టుడు వచ్చి వాని హృదయములో విత్తబడినదానిని యెత్తికొనిపోవును; త్రోవ ప్రక్కను విత్తబడినవాడు వీడే. మత్తయి 13:19

నువ్వు వాక్యము వింటున్నావు అయితే నీవు ఆ విన్న వాక్యమును గ్రహించలేని దానిబట్టి నీవు విన్న వాక్యము దుష్టుడు ఎత్తుకుపోతున్నాడు. ఆ కారణము చేత ఆ వాక్యము లోని జీవము నీలో ఫలించట్లేదు. నిజానికి దేవుడు పలుకగా ఆ ప్రకారము ఆయెను. అయితే ఆ వాక్యమును మనము గ్రహించలేని దానిని బట్టి దుష్టుడు ఆ వాక్యమును ఎత్తుకుపోతున్నాడు. అంటే నీకు దీపముగా ఉన్న వాక్యమును నీవు మర్చిపోవుట, ఆ వాక్యము ద్వారా నీ స్థితిలో దేవుడు ఏమి మాట్లాడాడో గ్రహించలేకపోవుట.

దేవుని మూలముగా పుట్టియున్న వాడెవడును పాపము చేయడని యెరుగుదుము. దేవునిమూలముగా పుట్టినవాడు తన్ను భద్రముచేసికొనును గనుక దుష్టుడు వాని ముట్టడు. – 1 యోహాను 5:18.

పాపము అంటేనే ఆజ్ఞాతిక్రమము. మనము పాపము చెయ్యకుండా ఎలా ఉండాలి? దేవుని మాటకు లోబడుట ద్వారా తనను భద్రము చేసుకొనుటను బట్టి నీవు పాపము చేయవు. దానిని బట్టి దుష్టుడు నిన్ను ముట్టడు. అందుకే నీవు ప్రార్థిస్తున్నప్పుడు, నిన్ను తాకిన వాక్యమును ఎత్తిపట్టి ప్రార్థించు. నీవు స్వీకరించిన వాక్యము నెరవేర్పు కొరకు దానిని ఎత్తి పట్టి ప్రార్థించు. అప్పుడు నీవు ఆ వాక్యము గ్రహిస్తావు గనుక దుష్టుడు దానిని ఎత్తుకుపోలేడు. ఆ వాక్యము యొక్క ఫలింపు ఖచ్చితముగా నీ జీవితములో నెరవేరుతుంది. వాక్యము కలిగినవాడు అపవాదిని తరమ గలుగుతాడు.

ప్రార్థన మరొక విషయమును కూడా చేస్తుంది. అదేమిటో చూద్దాము.

నాకు మొఱ్ఱపెట్టుము నేను నీకు ఉత్తరమిచ్చెదను, నీవు గ్రహింపలేని గొప్ప సంగతులను గూఢమైన సంగతులను నీకు తెలియజేతును. యిర్మియా 33:3

ప్రార్థన అంటే అడగడమే అనుకుంటాము, అయితే నీవు ఇంతవరకు గ్రహించలేని గూఢమైన మర్మములు గొప్పవైన సంగతులు దేవుడు తెలియచేస్తాడు.

క్రీస్తు పాతాళములో విడువ బడలేదనియు, ఆయన శరీరము కుళ్లిపోలేదనియు దావీదు ముందుగా తెలిసికొని ఆయన పునరుత్థానమును గూర్చి చెప్పెను. అపొస్తలుల కార్యములు 2:31

దావీదు క్రీస్తు పుట్టకముందు అనేకమైన సంవత్సరాలకు పూర్వము ఉన్నవాడు. అయితే క్రీస్తు పాతాళములో విడువబడలేదు అని, ఆయన శరీరము కుళ్ళిపోలేదు అని ఎలా గ్రహించాడు? మరొక మాట చూద్దాము.

ఆయననుగూర్చి దావీదు ఇట్లనెను నేనెల్లప్పుడు నా యెదుట ప్రభువును చూచు చుంటిని ఆయన నా కుడిపార్శ్వమున నున్నాడు గనుక నేను కదల్చబడను. కావున నా హృదయము ఉల్లసించెను; నా నాలుక ఆనందించెను మరియు నా శరీరము కూడ నిరీక్షణ గలిగి నిలకడగా ఉండును. – అపొస్తలుల కార్యములు 2:25-26

ఈ సత్యమును గ్రహించాలి. దావీదు ఎల్లప్పుడు ఎలా ప్రభువును చూస్తున్నాడు? ప్రార్థనలో ఉంటున్నాడు అని దాని అర్థము. ఆ ప్రార్థనలో విడుదల అయిన మర్మము దావీదును సంతోషింపచేసింది. అందుకే ఎమంటున్నాడు?

నీవు నా ఆత్మను పాతాళములో విడిచిపెట్టవు – అపొస్తలుల కార్యములు 2:27.

క్రీస్తును గూర్చిన మర్మము తెలియపరచబడినాక దావీదు సత్యము గ్రహించి ప్రకటించాడు. క్రీస్తు పునరుత్థానుడయ్యాడు, నేను కూడా పునరుత్థానుడనవుతాను అని ప్రకటించాడు.

దావీదు ఎన్నిసార్లు ప్రార్థనలో ఉండేవాడు?

నీ న్యాయవిధులనుబట్టి దినమునకు ఏడు మారులు నేను నిన్ను స్తుతించు చున్నాను – కీర్తన 119:164

మనకు దేవుడు కూడా ఒక ప్రశ్న వేస్తున్నాడు. ఎన్నిసార్లు నీవు ఆయన సన్నిధికి వెళ్తున్నావు?

భౌతికముగా మనము చూసినట్టయితే, కాబట్టి యేసు కన్నులెత్తి బహు జనులు తనయొద్దకు వచ్చుట చూచివీరు భుజించుటకు ఎక్కడనుండి రొట్టెలు కొని తెప్పింతుమని ఫిలిప్పు నడిగెను గాని, యేమి చేయనై యుండెనో తానే యెరిగియుండి అతనిని పరీక్షించుటకు ఆలాగడిగెను. – యోహాను 6:5-6

ఇక్కడ యేసయ్యకు ఏమి చెయ్యాలి అని ఎలా తెలిసింది? ఫలాన రంగు ఇది అని మనకు ఎలా తెలిసింది? మనకు అలా నేర్పించబడింది గనుక మనము ఇప్పుడు గుర్తించగలము. యేసయ్య మనుష్య కుమారుడుగా భూమి మీదకు వచ్చాడు. “కాబట్టి యేసు వారికి ఇట్లు ప్రత్యుత్తరమిచ్చెను తండ్రి యేది చేయుట కుమారుడు చూచునో, అదే కాని తనంతట తాను ఏదియు చేయనేరడు; ఆయన వేటిని చేయునో, వాటినే కుమారుడును ఆలాగే చేయును – యోహాను 5:19”. అయితె యేసయ్య ఎక్కడికి వెళ్ళి, ఎలా చూసాడు? “నాకు మొఱ్ఱపెట్టుము నేను నీకు ఉత్తరమిచ్చెదను, నీవు గ్రహింపలేని గొప్ప సంగతులను గూఢమైన సంగతులను నీకు తెలియజేతును” అని వాక్యము చెప్తుంది కదా?

తండ్రి, కుమారుని ప్రేమించుచు, తాను చేయువాటి నెల్లను ఆయనకు అగపరచుచున్నాడని మీతో నిశ్చయముగా చెప్పుచున్నాను. మరియు మీరు ఆశ్చర్య పడునట్లు వీటికంటె గొప్ప కార్యములను ఆయనకు అగపరచును – యోహాను 5:20.
అలాగే, “నా అంతట నేనే ఏమియు చేయలేను; నేను విను నట్లుగా తీర్పు తీర్చుచున్నాను. నన్ను పంపిన వాని చిత్తప్రకారమే చేయగోరుదును గాని నా యిష్ట ప్రకారము చేయగోరను గనుక నా తీర్పు న్యాయమైనది- యోహాను 5:30”.

అయితే ఎలా కనపరచబడింది? పగలు, రాత్రి దేవుని సన్నిధిలో గడపడమును బట్టి, దేవుని చిత్తము ఆయనకు బయలుపరచబడింది. యేసయ్య దేవుని సన్నిధిలో ఏమి అడిగి ఉంటాడు? “నాకు వేరే ఆహారము కలదు, అది నన్ను పంపిన నా తండ్రి చిత్తము నెరవేర్చుట” అని యేసయ్య చెప్తున్నాడు. ఆయన చేసే పరిచర్య కొరకైన మాటలే యేసయ్య దేవుని సన్నిధిలో అడుగుతున్నాడు.

తండ్రి యేలాగు తనంతట తానే జీవముగలవాడై యున్నాడో ఆలాగే కుమారుడును తనంతట తానే జీవముగలవాడై యుండుటకు కుమారునికి అధికారము అనుగ్రహించెను – యోహాను 5:26.

దేవునికి మాత్రామే సృష్టించే అధికారము ఉంది. ఆ అధికారము యేసయ్యకు కూడా ఇవ్వబడింది. యేసయ్యకు ఈ మర్మమైన సత్యము గ్రహించిన యేసయ్య అనేకులకు భోజనము పెట్టగలిగాడు. నీవు కూడా దేవుని సన్నిధిలో ప్రార్థనలో గడిపినప్పుడు అనేకమైన మర్మములు తెలుసుకుంటావు. అంతే కాక, గ్రహించిన సత్యమును బట్టి అద్భుతములు జరిగేవిగా ఉన్నాయి. ఆ అద్భుతమును బట్టి దేవుడు మహిమపరచబడతాడు.

అందుకే నీ జీవితములో ప్రార్థన ఒక భాగము అవ్వాలి. యేసయ్య మనకు మాదిరిగా ఉంచిన ప్రకారముగా ప్రార్థనా జీవితమును మార్చుకుందాము.