04-Dec-2022 – ఆదివారము ఆరాధన – నీ దేవునిని పూర్ణ హృదయముతో అనుసరించు

Main Message | మెయిన్ మెసేజ్

దేవుని సన్నిధిలో ఆయన ప్రసన్నతను అనుభవించడము ఎంతో గొప్ప భాగ్యము. అందుకే ఉదయాన్నే దేవుని సన్నిధిలో మనము గడిపి మొదలుపెట్టినట్టయితే ఆ రోజంతా ఎంతో సంతోషముగా ఉండగలుగుతాము.

ఉదయమున నీ కృపతో మమ్మును తృప్తిపరచుము అప్పుడు మేము మా దినములన్నియు ఉత్సహించి సంతోషించెదము – కీర్తనలు 90:14.

నీ దేవునిని పూర్ణ హృదయముతో అనుసరించుట అనేది ప్రతీ క్రైస్తవుని జీవితములో అత్యంత ప్రాముఖ్యము కలిగిన సత్యము.

యెఫున్నె కుమారుడైన కాలేబు తప్ప మరి ఎవ డును చూడడు. అతడు పూర్ణమనస్సుతో యెహోవాను అనుసరించెను గనుక అతడు దానిని చూచును. అతడు అడుగుపెట్టిన దేశమును నేను అతనికిని అతని సంతాన మునకును ఇచ్చెదనని ప్రమాణముచేసెను. ద్వితీయోపదేశకాండము 1:36.

కాలేబు జీవితాన్ని మనము క్షుణ్ణముగా పరిశీలించి మనము సత్యమును అర్థము చేసుకుందాము. నీ పూర్ణాత్మతో నీ పూర్ణ హృదయముతో మరియు పూర్ణ మనస్సుతో వెంబడించాలి అనే వాక్యము గుర్తుంటుంది కానీ ఎలా ఆవిధముగా ఉండాలి అనే విషయము తెలియని వారిగా ఉంటున్నాము. బైబిలు గ్రంథములోని భక్తుల జీవితములు మనకు మాదిరిగా ఇవ్వబడ్డాయి కనుక మనము కాలేబు జీవితమును పరిశీలించి నేర్చుకుందాము.

సంఖ్యాకాండము 13 వ అధ్యాయములో చూస్తే, నేను ఇశ్రాయేలీయులకు ఇచ్చుచున్న కనానుదేశమును సంచరించి చూచుటకు నీవు మనుష్యులను పంపుము అని మోషేతో చెప్పాడు. అప్పుడు మోషే యెహోవా మాట విని, పారాను అరణ్యమునుండి వారిని పంపెను. ఇక్కడ “దేవుడు ఇచ్చుచున్న కానాను దేశము” అనే మాట ఎంతో ప్రాముఖ్యము. ఈ పంపబడిన మనుష్యుల గుంపులో కాలేబు కూడా ఉన్నాడు.

మోషే కనానుదేశమును సంచరించి చూచుటకు వారిని పంపి నప్పుడు వారితో ఇట్లనెనుమీరు ధైర్యము తెచ్చుకొని దాని దక్షిణదిక్కున ప్రవేశించి ఆ కొండ యెక్కి ఆ దేశము ఎట్టిదో దానిలో నివసించు జనము బలముగలదో బలములేనిదో, కొంచెమైనదో విస్తారమైనదో వారు నివసించు భూమి యెట్టిదో అది మంచిదో చెడ్డదో, వారు నివసించు పట్టణములు ఎట్టివో, వారు గుడారము లలో నివసించుదురో, కోటలలో నివసించుదురో, ఆ భూమి సారమైనదో నిస్సారమైనదో, దానిలో చెట్లు న్నవో లేవో కనిపెట్టవలెను. మరియు మీరు ఆ దేశపు పండ్లలో కొన్ని తీసికొనిరండని చెప్పెను. అది ద్రాక్షల ప్రథమ పక్వకాలము – సంఖ్యాకాండము 13: 17-20

ఈరోజు ఎవరైతే క్రీస్తునందు ఉన్నారో వారు నూతన సృష్టి (2 కొరింథీ 5:17). మనకు కూడా నూతమైన జీవితము ఆరంభించబడింది. అది ఎలా కొనసాగించబడుతుంది అనే విషయము మనము అర్థము చేసుకుందాము.

క్రీస్తు మీ హృదయములలో విశ్వాసముద్వారా నివసించునట్లుగాను, తన మహిమైశ్వర్యముచొప్పున మీకు దయచేయవలెననియు, మీరు దేవుని సంపూర్ణతయందు పూర్ణులగునట్లుగా, ప్రేమయందు వేరు పారి స్థిరపడి, సమస్త పరిశుద్ధులతో కూడ దాని వెడల్పు పొడుగు లోతు ఎత్తు ఎంతో గ్రహించుకొనుటకును, జ్ఞానమునకు మించిన క్రీస్తు ప్రేమను తెలిసికొనుటకును తగిన శక్తిగలవారు కావలెననియు ప్రార్థించుచున్నాను – ఎఫెసీ 3: 16-19

ఎవరికైతే వాక్యము అందించబడుతుందో వారు దీవించబడినవారు. వాక్యములోని సత్యము అందించబడిన వారు దీవించబడినవారు.

నా కుమారుడా, నా మాటలను ఆలకింపుము నా వాక్యములకు నీ చెవి యొగ్గుము. నీ కన్నుల యెదుటనుండి వాటిని తొలగిపోనియ్య కుము నీ హృదయమందు వాటిని భద్రముచేసికొనుము. దొరికినవారికి అవి జీవమును వారి సర్వశరీరమునకు ఆరోగ్యమును ఇచ్చును. సామెతలు 4:20-22.

మనము చదివినభాగములో కాలేబుకు దొరికిన అవకాశము నీకు కూడా ఇవ్వబడింది. కాలేబుకు యెహోవా ఇచ్చుచున్న కానాను ఎలా ఉంది అని చూడటానికి పంపబడ్డాడు. నీవు కూడా క్రీస్తును బట్టి నీకు ఇవ్వబడిన జీవితము కూడా ఎలా ఉంది అని నీవు పరిశీలించుకోగలుగులాగున నీకు కూడా అవకాశము ఇవ్వబడింది. నీవు దేవుని మీద ఎంత విశ్వాసము కలిగి ఉన్నావు? విశ్వాసము బట్టి నీతిమంతుడు జీవించును అని వాక్యము చెప్తుంది. అప్పుడు మన జీవితములో జీవముచేత ప్రతి దినము ముగించబడాలి మరి అలా నీ జీవితము ఉంటుందా? నీ జీవితములో క్రీస్తును బట్టి ఇవ్వబడిన విశ్వాసము, మహిమైశ్వర్యము, దేవుని సంపూర్ణత మరియు దేవుని ప్రేమలను నీవు గ్రహించగలుగుతున్నావా?

దేవుడు లోకమును ఎంతో ప్రేమించెను. కాగా ఆయన తన అద్వితీయకుమారునిగా పుట్టిన వానియందు విశ్వాసముంచు ప్రతివాడును నశింపక నిత్యజీవము పొందునట్లు ఆయనను అనుగ్రహించెను యోహాను 3:16.

దేవుడు మనలను ప్రేమించాడు కాబట్టి మనము నాశనము కాలేదు. కానానును వేగుచూడటానికి వెళ్ళిన పన్నెండుమంది కూడా ఆ ప్రదేశమును గూర్చి ఇచ్చిన సాక్ష్యమును జ్ఞాపకము చేసుకుంటే – “వారు అతనికి తెలియపరచినదేమనగానీవు మమ్మును పంపిన దేశమునకు వెళ్లితివిు; అది పాలు తేనెలు ప్రవ హించు దేశమే; దాని పండ్లు ఇవి – సంఖ్యాకాండము 13:27”. అలాగే మన జీవితములో క్రీస్తులో దేవుడు అనుగ్రహించిన నూతనమైన జీవితము దేవుడు చెప్పిన విధముగానే ఉంటుంది. అయితే ఆ పదిమంది కానానును అనుభవించలేనట్టు, మనకు ఇవ్వబడిన నూతనమైన జీవితమును అనుభవించలేకపోతున్నాము.

నిజానికి యేసును అంగీకరించినమనము నశించకూడదు. అయితే కొన్ని విషయాలు మన జీవితములో నశించిన స్థితిలో ఉంటున్నాయి దానికి కారణము ఏమిటి? దేవునిని పూర్ణా హృదయముతో అనుసరించలేకపోవడమే. “దేవుని సంపూర్ణతయందు పూర్ణులగునట్లుగా, ప్రేమయందు వేరు పారి స్థిరపడి, సమస్త పరిశుద్ధులతో కూడ దాని వెడల్పు పొడుగు లోతు ఎత్తు ఎంతో గ్రహించుకొనుటకును, జ్ఞానమునకు మించిన క్రీస్తు ప్రేమను తెలిసికొనుటకును…” వేగు చూడటానికి వెళ్ళిన వారితో కూడా ఇలాగే తెలిసికొని రమ్మని ప్రభువు చెప్పాడు. అయితే వారు ఏమి చూస్తున్నారు?

అయితే ఆ దేశ ములో నివసించు జనులు బలవంతులు; వారి పట్టణములు ప్రాకారముగలవి అవి మిక్కిలి గొప్పవి; మరియు అక్కడ అనాకీయులను చూచితివిు – సంఖ్యాకాండము 13:28.

ఆ పరిస్థితిలో ఈ పదిమంది వారిని చూసి భయపడి వారిని జయించలేము అని డీలాపడిపోయారు. అయితే కాలేబు ఏమి చెప్పాడు? “కాలేబు మోషే యెదుట జనులను నిమ్మళ పరచిమనము నిశ్చయముగా వెళ్లుదుము; దాని స్వాధీనపరచుకొందుము; దాని జయించుటకు మన శక్తి చాలుననెను – సంఖ్యాకాండము 13:29”. ఎందుకు అంటే? “దేవుడు ఇచ్చుచున్న కానాను దేశము” ఇది దేవుడు ఇచ్చు దేశము అని దేవునిని పూర్ణ హృదయముతో అనుసరించినవాడుగా ఉన్నాడు. అపొస్తలుడైన పౌలు కూడా “నన్ను బలపరచువానియందు నేను సమస్తము చేయగలను” అని చెప్పుచున్నాడు. అయితే నీ జీవితములో ఎన్నిసార్లు నిరుత్సాహముతో కృంగిపోయి ఉన్నావు?

క్రీస్తు ప్రేమనుండి మనలను ఎడబాపు వాడెవడు? శ్రమయైనను బాధయైనను హింసయైనను కరవైనను వస్త్రహీనతయైనను ఉపద్రవమైనను ఖడ్గమైనను మనలను ఎడబాపునా? – రోమా 8:35.

నీ జీవితములో నీ ముందు ఉన్న పరిస్థితులలో నీ ఆలోచన ఏమిటి? నీవు చెయ్యగలను అనుకుంటున్నావా? దాటగలను అనుకుంటున్నావా? లేక నిరుత్సాహపడుతున్నావా? నీ జీవితములో శ్రమ గానీ, బాధగానీ, హింస గానీ, కరువు గానీ, లేమి గానీ, ఉపద్రవములు గానీ చివరకి ఖడ్గమైన సరే క్రీస్తు ప్రేమనుండి ఎడబాపగలదా?

“దేవుడు ఇచ్చుచున్న కనాను” అంటే “దేవుడు ఇచ్చుచున్న నూతనమైన జీవితము” అని దేవుడు ప్రకటించిన సత్యము. ఒకవేళ అనాకీయులవంటి స్థితులు ఉన్నప్పటికీ అవి వెళ్ళగొట్టబడవలసినవే. నీ జీవితమును నీవు స్వతంత్రించుకోవలసినదే. అయితే ఆ పదిమంది వలే నీవున్నట్టయితే నీకిచ్చిన జీవితమును స్వతంత్రించుకోలేవు.

యెఫున్నె కుమారుడైన కాలేబు తప్ప మరిఎవడును చూడడు. అతడు పూర్ణమనస్సుతో యెహోవాను అనుసరించెను గనుక అతడు దానిని చూచును. అతడు అడుగుపెట్టిన దేశమును నేను అతనికిని అతని సంతాన మునకును ఇచ్చెదనని ప్రమాణముచేసెను – ద్వితీయోపదేశకాండము 1:36

అయితే కాలేబువలే నీవు ఉన్నట్టయితే నీవే కాక నీ తరువాత తరమును కూడా దేవుని ఆశీర్వాదములతో నింపినవాడివి అవుతావు. నీ జీవితములో కూడా ఎటువంటి నెగటివ్ ఆలోచన రానివ్వకుండా దేవుడు ఇచ్చుచున్న జీవితమును స్వతంత్రించుకో. నీ జీవితములో ఎటువంటి పరిస్థితులు ఉన్నాసరే కాలేబు వలే దేవుడు ఇచ్చిన మాటను బట్టి పూర్ణహృదయముతో అనుసరించి దేవుడు నీకిచ్చుచున్న నూతన జీవితము స్వతంత్రించుకుని నీవు సంతోషించి నీ దేవునిని సంతోషపరచు.