04-06-2023 – ఆదివారం రెండవ ఆరాధన – యేసు వైపు చూస్తూ

మెయిన్ మెసేజ్

“యేసు వైపు చూచుచూ” అనే అంశము గూర్చి మనము ధ్యానిద్దాము.

యేసయ్య ఈ లోకములో జీవించినప్పుడు సమస్తములో మనకు మాదిరిగా జీవించాడు. అందుకే ఆయన వైపు చూస్తూ మనము ఈలోకములో జీవించాలి.

మనము కూడ ప్రతిభారమును, సుళువుగా చిక్కులబెట్టు పాపమును విడిచిపెట్టి, విశ్వాసమునకు కర్తయు దానిని కొనసాగించువాడునైన యేసువైపు చూచుచు, మన యెదుట ఉంచబడిన పందెములో ఓపికతో పరుగెత్తుదము. ఆయన తనయెదుట ఉంచబడిన ఆనందముకొరకై అవమానమును నిర్లక్ష్యపెట్టి, సిలువను సహించి, దేవుని సింహాసనముయొక్క కుడి పార్శ్వమున ఆసీనుడైయున్నాడు.౹ -హెబ్రీయులకు 12:2

“విశ్వాసమునకు కర్తయు దానిని కొనసాగించువాడునైన యేసు” అనే దానిని గూర్చి మనము ఈరోజు నేర్చుకుంటాము. మన ఎదుట ఉంచబడిన పందెము అంటే మన జీవితము. అయితే ఎందుకు మనము యేసువైపు చూడాలి అంటే? నీతిమంతుడు విశ్వాసము మూలమున జీవిస్తాడు. అయితే ఈ విశ్వాసమునకు కర్త ఎవరు అని చూస్తే అది యేసుప్రభువే. మన జీవితాలను ముందుకు కొనసాగించాలి అంటే, విజయకరమైన జీవితముగా మనము కొనసగించాలి అంటే యేసయ్యవైపే చూడాలి.

విశ్వాసమునకు కర్త అంటే, నీవు విశ్వసించునట్లుగా మూలమును సృష్టించువాడు ఆయనే. అంతే కాకా అలా సృష్టించినదానిని కొనసాగించువాడు కూడా ఆయనే.

వాడు వెళ్లి, యేసు తనకు చేసిన వన్నియు దెకపొలిలో ప్రకటింప నారంభింపగా అందరు ఆశ్చర్యపడిరి. -మార్కు 5:20

అక్కడ యేసు ఒక విడుదల కార్యము చేసినాడు. ఎవరూ విడిపించలేని వాడిని యేసయ్య విడుదల చేసాడు. ఈ కార్యము ఆ పట్టణము అంతా ప్రకటించబడింది.

యేసు మరల దోనె యెక్కి అద్దరికి వెళ్లినప్పుడు బహుజనసమూహము ఆయనయొద్దకు కూడివచ్చెను. ఆయన సముద్రతీరమున నుండగా సమాజమందిరపు అధికారులలో యాయీరను నొకడు వచ్చి, ఆయనను చూచి ఆయన పాదములమీదపడి –నా చిన్నకుమార్తె చావనై యున్నది; అది బాగుపడి బ్రదుకునట్లు నీవు వచ్చి దానిమీద నీచేతులుంచవలెనని ఆయనను మిగుల బతిమాలుకొనగా ఆయన అతనితోకూడ వెళ్లెను; బహుజనసమూహమును ఆయనను వెంబడించి ఆయన మీద పడుచుండిరి. -మార్కు 5:21-24

ఈ సమాజమందిరపు అధికారి యేసయ్య దగ్గరకు వెళ్ళడానికి కారణము ఏమిటి? యేసయ్య చావనై ఉన్న తన కుమార్తెను రక్షించగలిగిన సమర్థుడు అని నమ్మడానికి కారణము ఏమిటి? అని చూస్తే, గెరాసేనీయుల దేశములో యేసయ్య చేసిన విడుదల కార్యము యాయీరు హృదయములో విశ్వాసమును పుట్టించింది. అనగా మనలో విశ్వాసము కలుగునట్లుగా దేవుడు తన కార్యములు జరిగించువాడుగా ఉన్నాడు. ఆ కార్యములద్వారా మనలో విశ్వాసము కలుగుతుంది.

ఆయన దోనెయెక్కినప్పుడు, దయ్యములు పెట్టినవాడు ఆయనయొద్ద తన్నుండనిమ్మని ఆయనను బతిమాలుకొనెను గాని ఆయన వానికి సెలవియ్యక–నీవు నీ యింటివారియొద్దకు వెళ్లి, ప్రభువు నీయందు కనికరపడి, నీకు చేసిన కార్యములన్నిటిని వారికి తెలియజెప్పుమనెను. వాడు వెళ్లి, యేసు తనకు చేసిన వన్నియు దెకపొలిలో ప్రకటింప నారంభింపగా అందరు ఆశ్చర్యపడిరి. -మార్కు 5:18-20

ఇక్కడ యేసయ్య చేసిన కార్యమును ప్రకటించమని ఆ స్వస్థపరచబడిన వ్యక్తితో చెప్పాడు. దానికి కారణము ఏమిటి అంటే, మరొకరు ఆ వార్తను విని రక్షించబడుట కొరకే. అందుకే మన వద్దకు దేవుని కార్యములను గూర్చిన వార్త రాగానే మనము కూడా ఇది దేనికొరకు మనవద్దకు వచ్చిందో అనే విషయము గూర్చి ఆలోచించి సిద్ధపడి స్వీకరించాలి.

మనము అనేకమైన పరిస్థితులలో దేవుని యందు విశ్వాసము ఉంచుతాము. అయితే కొన్ని సార్లు ఆ విశ్వాసముండి తొలగిపోయే పరిస్థితులు కలుగుతాయి. యాయీరు జీవితములో కూడా ఈ పరిస్థితి కలిగింది –

ఆయన ఇంకను మాటలాడుచుండగా, సమాజమందిరపు అధికారి యింటనుండి కొందరు వచ్చి–నీ కుమార్తె చనిపోయినది; నీవిక బోధకుని ఎందుకు శ్రమ పెట్టుదు వనిరి. యేసు వారు చెప్పినమాట లక్ష్యపెట్టక–భయపడకుము, నమ్మిక మాత్రముంచుమని సమాజమందిరపు అధికారితో చెప్పి -మార్కు 5:35-36

యాయీరు జీవితములో విశ్వాసమును పుట్టించిందే యేసయ్య. దానిని కొనసాగించే బాధ్యత కూడా యేసయ్యే తీసుకున్నారు. ఇంకా సమాజమందిరపు అధికారి మాటలాడక మునుపే యేసయ్య సమాధానము చెపుతున్నాడు. అందుకే యేసు వైపు నీవు చూసినప్పుడు, నీలో విశ్వాసమును పుట్టించిన యేసయ్య ఆ కార్యము ముగించేవరకు నీలో విశ్వాసమును కొనసాగించేవాడుగా ఉన్నాడు.

ఎందుకనగా ఈ నిరీక్షణ మనలను సిగ్గుపరచదు రోమా 5:5

అందుకే మన చూపంతా కూడా యేసయ్యవైపే ఉండాలి. ఈ భూలోకములో మనకు మాదిరిగా జీవించాడు.

ఆయన తనయెదుట ఉంచబడిన ఆనందముకొరకై అవమానమును నిర్లక్ష్యపెట్టి, సిలువను సహించి, దేవుని సింహాసనముయొక్క కుడి పార్శ్వమున ఆసీనుడైయున్నాడు – హెబ్రీయులకు 12:2

తనయెదుట ఉంచబడిన ఆనందముకొరకై అవమానమును నిర్లక్ష్యపెట్టుట అంటే, ఏ విషయము కొరకైతే నీలో విశ్వాసమును కలిగించాడో, ఆ విషయము యొక్క నెరవేర్పు కొరకు, ప్రతీ నెగటివ్ పరిస్థితిని నిర్లక్ష్యము చేసి, అదే విశ్వాసముపై నిలబడి ముందుకు సాగాలి. కొన్ని సార్లు నెగటివ్ పరిస్థితి యొక్క ప్రభావము మనలను గాయపరుస్తుందేమో అయినప్పటికీ, సహించి నిలబడాలి.

సహించుట అనేది భూలోకములో జరిగింది. సింహాసనము పరలోకములో ఉంది. మనము భూలోకములో సహిస్తే, మనకొరకు ఆశీర్వాదము పరలోకమునుండి దిగి వస్తుంది. విశ్వాసము పరలోకముండి అధికారమును విడుదల చేసేదిగా ఉంది. యేసు వైపు చూసినప్పుడు నీ విశ్వాసము నిలకడగా ఉంటుంది.

మరొక సందర్భములో సమరయ స్త్రీలో విశ్వాసము కలుగునట్లుగా తాను కార్యము జరిగించినాడు. ఎవరూ నశించిపోకూడదు అని నిన్ను నన్ను కూడ వెతుకున్నవాడుగా యేసయ్య ఉన్నాడు. సమరయ స్త్రీ యేసయ్య ఎవరో ఎరగని స్థితిలో, ఆమె గ్రహించునట్లుగా అనేకమైన ప్రయత్నాలు చేసినతరువాత, ఆమె ప్రవక్త అని గ్రహించిది. అలా విశ్వాసము కలిగించిన తరువాత దానిని ఎలా కొనసాగిస్తున్నాడో చూద్దాము.

ఆ స్త్రీ ఆయనతో–క్రీస్తనబడిన మెస్సీయ వచ్చునని నేనెరుగుదును; ఆయన వచ్చినప్పుడు మాకు సమస్తమును తెలియజేయునని చెప్పగా౹ యేసు–నీతో మాటలాడుచున్ననేనే ఆయననని ఆమెతో చెప్పెను. -యోహాను 4:25-26

యాయీరు జీవితములో ఒక సందర్భము, సమరయ స్త్రీ జీవితములో మరొక సందర్భము. ఈ రెండు సందర్భములూ మన జీవితాల గూర్చియే. అనేక సందర్భాలలో మనము ఏమి చేయాలో ఎరగని స్థితిలో ఉన్నప్పుడు మనము గ్రహించునట్లుగా ఆయన తన ప్రయత్నాలు చేస్తూనే ఉన్నాడు. ఎందుకు అంటే మనము దేవుని ఉద్దేశములో ఉన్నవారము. మనము నమ్మడానికి అవకాశము ఉన్నా, అవకాశము లేకపోయినా, మనలను ఆయా పరిస్థితులగుండా మనలను నడిపించడానికి ఆయన సిద్ధముగా ఉన్నవాడు. అంతే కాదుగానీ ముగించువాడు కూడా ఆయనే! ఏ విషయములో నీలో విశ్వాసము కలిగించబడిందో, ఆ విషయము నీకొరకు ఖచ్చితముగా నెరవేర్చబడుతుంది.