04-02-2024 – ఆదివారం రెండవ ఆరాధన

వారము కొరకైన వాక్యము

మన దేవుడు నిజముగా ప్రేమిస్తున్నాడు కాబట్టే ఆయన మన యెడల మంచి కోరిక కలిగి ఉన్నాడు. అయితే ఏమిటి ఆయన కోరిక? నీవు నేను పరిపూర్ణులుగా కనపరచబడాలి అనేదే ఆయన కోరిక. దేవునివాక్యము జీవమై ఉంది గనుక ఆ వాక్యమును స్వీకరించేవారిగా ఉండాలి. అప్పుడు ఆ జీవము మనలో స్థిరపరచబడుతుంది.

ప్రతిసారీ మంచిగానే మన జీవితములో జరగాలి అనేది లేదు. కొన్ని సార్లు మన విశ్వాసము పరీక్షించబడునట్లు కొన్ని వ్యతిరేకమైన పరిస్థితులు జరుగుతాయి. అయితే ఆ సందర్భములో మనము దుఃఖముతో నిండి ఉన్నప్పుడు, మనకు తండ్రిగా ఉన్న ఆ దేవ దేవుడు చూస్తూ ఉంటాడు కదా! నిన్ను చూచుచున్న దేవుడు అలాగే ఊరుకుంటాడా? ఏమైనా చేస్తాడా? ఒక్కోసారి అయితే అసలు ప్రభువా నీవున్నావా? అనే ప్రశ్న కూడ మనలో వస్తుంది.

యెహోవా, భక్తిహీనులు ఎంతవరకు ఉత్సహించుదురు? భక్తిహీనులు ఎంతవరకు ఉత్సహించుదురు? వారు వదరుచు కఠోరమైన మాటలు పలుకుచున్నారు దోషము చేయువారందరు బింకములాడుచున్నారు. –యెహోవా చూచుటలేదు యాకోబు దేవుడు విచారించుటలేదు అనుకొని యెహోవా, వారు నీ ప్రజలను నలుగగొట్టుచున్నారు నీ స్వాస్థ్యమును బాధించుచున్నారు విధవరాండ్రను పరదేశులను చంపుచున్నారు తండ్రిలేనివారిని హతముచేయుచున్నారు. -కీర్తనలు 94:3-7

ఇక్కడ కూడ, కీర్తనకారుడు దేవుడు చూడటములేదు అనుకొని భక్తిహీనులు దేవుని ప్రజలను బాధిస్తున్నారు అని చెప్పుచూ ఒక సత్యము తెలియచేస్తున్నాడు.

జనులలో పశుప్రాయులారా దీనిని ఆలోచించుడి బుద్ధిహీనులారా, మీరెప్పుడు బుద్ధిమంతులవుదురు? చెవులను కలుగచేసినవాడు వినకుండునా? కంటిని నిర్మించినవాడు కానకుండునా? అన్యజనులను శిక్షించువాడు మనుష్యులకు తెలివి నేర్పువాడు దండింపకమానునా? -కీర్తనలు 94:8-10

అందుకే దేవుడు చూడటములేదు అనుకొనే వారికి ఈరోజు నీ సమాధానం, నా దేవుడు చూచువాడు. నీవు ఏ కఠినమైన మాటలు అనుభవిస్తున్నావో, నీ జీవితము గూర్చి అనేకులు ఏమి మాట్లాడుకుంటున్నాసరే, వాటిని నీ దేవుడు కూడ వింటున్నాడు.

ఒకవేళ దేవుని అంగీకరించి నలిగిపోతున్న స్థితిలో ఉంటే, అది మాటల చేత అయినా సరే, క్రియల చేత అయినా సరే నీ దేవుడు చూచేవాడుగా ఉన్నాడు. చూసిన దేవుడు క్రియలు జరిగించేవాడుగా ఉన్నాడు. న్యాయము జరుగులాగున యుక్త కాలమున తన క్రియలు జరిగించువాడుగా ఉన్నాడు. అసలు వాక్కు బయలుదేరింది అంటేనే కార్యము ముగించబడటానికి బయలుదేరుతుంది. ఆ వాక్కు బయలుదేరిన సమయమే యుక్త సమయము.

విధవరాలు అంటే ఆధారము, సహాయము లేని వారు. పరదేశులు అంటే స్వంతవారు కాని వారిగా ఎంచబడిన పరిస్థితి. చంపివేయబడుట అంటే ఇంక ఎదగకుండ, తప్పించబడు మార్గము లేకుండా బంధించబడి ఉంటుట.

అక్కడ ముప్పది యెనిమిది ఏండ్లనుండి వ్యాధిగల యొక మనుష్యుడుండెను.౹ యేసు, వాడు పడియుండుట చూచి, వాడప్పటికి బహుకాలమునుండి ఆ స్థితిలోనున్నాడని యెరిగి–స్వస్థపడ గోరుచున్నావా అని వానినడుగగా౹ -యోహాను 5:5-6

ఇక్కడ యేసయ్య మొదట చూచినవాడుగా ఉన్నాడు, తరువాత స్థితిని ఎరిగినవాడుగా ఉన్నాడు చివరికి స్పందించినవాడుగా ఉన్నాడు. ఆ వ్యక్తికి స్వస్థపరచబడే మార్గము ఎదురుగా ఉంది కానీ, ఆ మార్గములోనికి నడిపించే ఆధారము లేనివాడుగా ఉన్నాడు. ఆ కారణము చేత 38 సంవత్సరములు అక్కడే ఉండిపోయాడు. మన జీవితములలో కూడా ఆధారము లేని కారణాన మనము పోగొట్టుకున్న దానిని తిరిగి ఇచ్చేవాడుగా మన దేవుడు ఉన్నాడు.

–మీ తండ్రి కటాక్షము నిన్న మొన్న నామీద ఉండినట్లు ఇప్పుడు నామీద నుండలేదని నాకు కనబడుచున్నది; అయితే నా తండ్రియొక్క దేవుడు నాకు తోడై యున్నాడు;౹ -ఆదికాండము 31:5

యాకోబు జీవితములో కూడా ఇటువంటి పరిస్థితి వచ్చింది. యాకోబుకు లాబాను ఆధారముగా ఉండేవాడు. అయితే ఇప్పుడు ఆ ఆధారము దొరకట్లేదు. పరిస్థితి మారిపోయింది. ఉద్యోగములలో కూడా ఇటువంటి పరిస్థితి ఉంటుంది. ఇంతవరకు కటాక్షము ఉండి ఇప్పుడు లేని పరిస్థితి ఉంటే, నీ దేవుడు నీకే తోడై ఉన్నాడు. మనము కూడా ఇదే ఆలోచన దృక్పథము కలిగి ఉండాలి.

మీ తండ్రి నన్ను మోసపుచ్చి పది మార్లు నా జీతము మార్చెను; అయినను–దేవుడు అతని నాకు హానిచేయ నియ్యలేదు.౹ -ఆదికాండము 31:7

“అయినను” అనేది ఎంతో ప్రాముఖ్యమైనది. జీవితములో జరిగే పరిస్థితి ఎంత నష్టకరమైనా, కష్టకరమైనా హాని జరగనివ్వడు నీ దేవుడు.

నీ తండ్రి అయిన దేవుడు నిన్ను చూసే వాడు, చూసిన వాడైన నీ దేవుడు ఏ నష్టము జరగనివ్వడు. అంటే మరి ఏమి చేస్తాడు?

ఆ నెగటివ్ పరిస్థితినుండి తప్పించడానికి దేవుడు తన మార్గములను తెరుస్తాడు, నడిపిస్తాడు. యాకోబు జీవితములో కూడా అనేకసార్లు జరిగిన ప్రయత్నములలో తప్పించబడే మార్గము తెరిగి తప్పించాడు.

లాబాను కటాక్షము ఉన్నప్పుడే నష్టపరచాలి అనే ఆలోచనలను తప్పించాడు. అటువంటిది ఆ కటాక్షము లేని పరిస్థితిలో మరి ఇంకెంతగా ఆ హానినుండి, నష్టము నుండి ఖచ్చితముగా తప్పిస్తాడు?

నా తండ్రి దేవుడు, అబ్రాహాము దేవుడు, ఇస్సాకు భయపడిన దేవుడు నాకు తోడైయుండనియెడల నిశ్చయముగా నీవు నన్ను వట్టి చేతులతోనే పంపివేసి యుందువు. దేవుడు నా ప్రయాసమును నా చేతుల కష్టమును చూచి, పోయిన రాత్రి నిన్ను గద్దించెనని లాబానుతో చెప్పెను.౹ -ఆదికాండము 31:42

మన దేవుడు చూచేవాడు. ఆ చూచినవాడు స్పందించేవాడుగా ఉన్నాడు. కోనేరు వద్ద వేచి ఉన్నా వాడిని కూడా చూచినవాడైన దేవుడు, స్పందించిన వాడుగ ఉన్నాడు.

తండ్రిలేనివారిని హతముచేయుచున్నారు. అంటే ఉద్యోగములో చూస్తే, మన బాస్ మనకు సహాయకరముగా ఉంటే, మన తరపున మాట్లాడేవాడుగా తను ఉంటాడు. అటువంటి పరిస్థితి లేనప్పుడు, సహాయము చేసేవారు లేని స్థితిని ప్రభువు చూసి స్పందించేవాడుగా ఉన్నాడు.

యాకోబును అడ్డుకోవడానికి లాబాను వచ్చినవాడుగా ఉన్నాడు. నీ ప్రమోషన్ ను అడ్డుకోవడానికి ఎవరు వచ్చినా సరే, నీ ఆశీర్వాదమును అడ్డుకోవడానికి ఏది అడ్డుకున్నా సరే అది నీ దగ్గరకు రాకుండానే అది గద్దించబడుతుంది.

యెహోవా నాకు సహాయము చేసియుండని యెడల నా ప్రాణము శీఘ్రముగా మౌనమందు నివసించి యుండును. -కీర్తనలు 94:17

అనగా నీకు సహాయము చేసేవాడు దేవుడు తప్ప మరొకడు లేడు అని అర్థము. ఇప్పుడు దేవుని వైపు మాత్రమే నీ హృదయమును సిద్ధపరచుకోవాలి అని దేవుడు నీకు జ్ఞాపకము చేస్తున్నాడు. నీ ఆశీర్వాదమును దొంగిలించేది ఎవరైనా ఏ పరిస్థితి అయినా సరే, దానిని అడ్డుకోగలిగేది నీ దేవుడు మాత్రమే.

–నాకాలు జారెనని నేననుకొనగా యెహోవా, నీ కృప నన్ను బలపరచుచున్నది. నా అంతరంగమందు విచారములు హెచ్చగా నీ గొప్ప ఆదరణ నా ప్రాణమునకు నెమ్మది కలుగ జేయుచున్నది. -కీర్తనలు 94:18-19

ఇంతకు ముందు ఫలానాది జరుగుతుంది అని అనుకున్నప్పుడు, అది జరగకపోవడము కాలు జారిన పరిస్థితి. దానిని బట్టి విచారము హెచ్చినప్పుడు, గొప్ప ఆదరణ ప్రాణమునకు నెమ్మది కలుగ జేయుచున్నది. ఆదరణ ఎల్లప్పుడు మాటలను బట్టే కలుగుతుంది. అయితే మన దేవుని మాటలు క్రియలతో కూడినవిగా ఉన్నాయి. ఈరోజున దేవుని మాటలు నీ పరిస్థితిలో ఆదరణ కలిగిస్తుంటె, ఇది నీ సమయము. చూచుచున్న దేవుడు స్పందించేవాడు. స్పందించే దేవుడు నిన్ను తృప్తి పరచేవాడు.

అందుకే నీ ఎదురుగా ఉన్న పరిస్థితి ఎలా ఉన్నాసరే, ఒకవేళ నీ ప్రమోషన్ అడ్డుకోవడానికి ఇతరులు వారి వారి రికమండేషన్స్ తో వచ్చినా సరే, నీ దేవుడు రాత్రికి రాత్రే ఆ పరిస్థితి మార్చేవాడుగా ఉన్నాడు.

మీకు హాని చేయుటకు నా చేతనవును; అయితే పోయిన రాత్రి మీ తండ్రియొక్క దేవుడు–నీవు యాకోబుతో మంచిగాని చెడ్డగాని పలుక కుము జాగ్రత్త సుమీ అని నాతో చెప్పెను.౹ -ఆదికాండము 31:29

అనగా ఎవరు ఎన్ని ప్రయత్నములు చేసినా సరే వాడి ప్రయత్నములు సఫలము కావు. ఈ వాక్యమును మనసులో పెట్టుకుని, జరగబోయే మంచి, మహాత్మ్యము ఎలా జరుగుతుంది అని గమనించు. దేవునికి సాక్షిగా సిద్ధపడు.