03-12-2023 – ఆదివారం రెండవ ఆరాధన

వారము కొరకైన వాక్యము

ఈరోజు “నిన్ను నడిపించే దేవుడు” గురించి ధ్యానిద్దాము. నిన్ను నడిపించాలి అనేది ఆయన కొరిక కూడా. మన తల్లిదండ్రులను జ్ఞాపకము చేసుకుంటే, మన చిన్నప్పుడు మన చెయ్యి పట్టుకుని నడిపించేవాడుగా మన తండ్రి ఉన్నాడు. మనము నడవగలిగినప్పటికీ, చెయ్యి పట్టుకుని నడిపించాలి అనే ఆశ తండ్రి కలిగి ఉంటాడు. అలాగే మన దేవుడు మనలను నడిపించుచుండగా, మనకు తోడుగా ఉండగా మనము భయపడవలసిన సందర్భమే ఉండదు.

నీ విమోచకుడును ఇశ్రాయేలు పరిశుద్ధదేవుడునైన యెహోవా ఈలాగు సెలవిచ్చుచున్నాడు –నీకు ప్రయోజనము కలుగునట్లు నీ దేవుడనైన యెహోవానగు నేనే నీకు ఉపదేశము చేయుదును నీవు నడవవలసిన త్రోవను నిన్ను నడిపించుదును. -యెషయా 48:17

నీ దేవుడు గా ఆయన ఉన్నాడు అని నీవు నమ్మితే, ఈ వాక్యము నీ కొరకే. మన పితరులు అయిన ఇశ్రాయేలు ప్రజలు దేవుడు గాక వేరే రాజు నడిపించాలి అని కోరుకున్నారు. అయితే ఈరోజు మనము అలా ఉండకూడదు.

ఒకవేళ నీ నడక అనగా నీ జీవిత ప్రయాణము సరిగా లేదేమో, ప్రభువు కోరుకున్నట్టుగా లేదేమో, అయితే నీ ప్రభువు నీతో చెప్పుచున్నాడు, ఆయనే నడిపిస్తాను అని చెప్పుచున్నాడు. ఎంత భాగ్యమో కదా! ఈ విషయము దావీదుకు అర్థము అయ్యింది గనుకనే –

యెహోవా నా కాపరి నాకు లేమి కలుగదు. పచ్చికగల చోట్లను ఆయన నన్ను పరుండజేయు చున్నాడు శాంతికరమైన జలములయొద్ద నన్ను నడిపించుచున్నాడు. నా ప్రాణమునకు ఆయన సేదదీర్చుచున్నాడు తన నామమునుబట్టి నీతిమార్గములలో నన్ను నడిపించు చున్నాడు. -కీర్తనలు 23:1-3

అనగా నడిపించేవాడు ఎండిన స్థితిలోనికి నడిపించడు గానీ సమృద్ధి గల చోటకే నడిపిస్తాడు. ఈ సత్యము దావీదు వలే నీవు నేను గ్రహిస్తే, నిశ్చింతగా ఉంటాము.

తన నామమును బట్టి నీతి మార్గములో నన్ను నడిపించుచున్నాడు. అనగా, నీతి మార్గములో మరణమే లేదు. అనగా ఇకనుండి మన మార్గము జీవమార్గము అని అర్థము. అంటే ఇంతవరకు ఎక్కడో ఒకచోట మరణకరమైన మార్గములు ఉన్నాయి అని అర్థము. తన చిత్తము తానే నెరవేర్చుకునే దేవుడు, ఇప్పుడు మన జీవితములను తనకు మహిమకరములుగా చేసుకొనుటకు ఇష్టపడుతున్నాడు. గనుక ఆయన చిత్తము మనజీవితములో నెరవేరబడునట్లు ఏర్పాటు చేసిన మార్గములో మనలను నడిపించడానికి ఇష్టపడుతున్నాడు. గనుక నీతి మార్గము అనగా, దేవుని చేత ఏర్పాటు చేయబడిన మార్గము అన్నమాట.

అయినను మన ప్రభువైన యేసుక్రీస్తు మూలముగా మనకు జయము అనుగ్రహించుచున్న దేవునికి స్తోత్రము కలుగును గాక.౹ -1 కొరింథీయులకు 15:57

జయము అనుగ్రహించేది దేవుడు. ఇంతవరకు మన జీవితములో అపజయములు వచ్చాయి. అయితే ఇప్పటినుండి మనలను నడిపించాలి అని ప్రభువు కోరుకుంటున్నాడు. ఆయన నడిపించే మార్గములో మనకు విజయమే. ప్రభువు నడిపింపు కొరకు ఒక వాక్యము చూద్దాము.

రాజైన హేరోదు దినములయందు యూదయదేశపు బేత్లెహేములో యేసు పుట్టిన పిమ్మట ఇదిగో తూర్పు దేశపు జ్ఞానులు యెరూషలేమునకు వచ్చి –యూదుల రాజుగా పుట్టినవాడెక్కడ నున్నాడు? తూర్పుదిక్కున మేము ఆయన నక్షత్రము చూచి, ఆయనను పూజింప వచ్చితిమని చెప్పిరి -మత్తయి 2:1-2

ఈ జ్ఞానులు నక్షత్రము కనబడగానే, యూదుల రాజు పుట్టాడు అని గ్రహించారు. అయితే వీరు యేసయ్య దగ్గరికి వెళ్ళకుండా హేరోదు దగ్గరకు వెళ్ళారు. వీళ్ళు మార్గము తప్పి హేరోదువద్దకు వెళ్ళినప్పటికీ, వీరి ఆశను బట్టి, దేవుడు వారిని సరైన మార్గములో నడిపించాడు.

వారు రాజు మాట విని బయలుదేరి పోవుచుండగా, ఇదిగో తూర్పుదేశమునవారు చూచిన నక్షత్రము ఆ శిశువు ఉండిన చోటికి మీదుగా వచ్చి నిలుచువరకు వారికి ముందుగా నడిచెను. -మత్తయి 2:9

అనగా మనము కూడా దేవుడు నడిపించాలి అనే ఆశ కలిగి ఉంటే ఖచ్చితముగా నడిపించేవాడుగా ఉంటాడు. ఆయన నడిపింపులో అపజయము అనేదే లేదు. జ్ఞానులు యేసయ్య వద్దకు నడిపించాడు. యేసయ్య వెలుగు మరియు జీవము అయి ఉన్నాడు గనుక, మనలను ఆ వెలుగు వైపు, జీవము వైపు నడిపిస్తాడు.

మరొక సందర్భములో చూస్తే –

ఆమె భర్తయైన యోసేపు నీతిమంతుడై యుండి ఆమెను అవమానపరచనొల్లక రహస్యముగా ఆమెను విడనాడ ఉద్దేశించెను. అతడు ఈ సంగతులనుగూర్చి ఆలోచించుకొనుచుండగా, ఇదిగో ప్రభువు దూత స్వప్నమందు అతనికి ప్రత్యక్షమై –దావీదు కుమారుడవైన యోసేపూ, నీ భార్యయైన మరియను చేర్చు కొనుటకు భయపడకుము, ఆమె గర్భము ధరించినది పరిశుద్ధాత్మవలన కలిగినది; ఆమె యొక కుమారుని కనును; తన ప్రజలను వారి పాపములనుండి ఆయనే రక్షించును గనుక ఆయనకు యేసు అను పేరు పెట్టుదువనెను. -మత్తయి 1:19-21

యోసేపు మరియను విడిచిపెట్టాలి అనే ఆలోచన మరియ ధరించిన గర్భమును బట్టి కలిగింది. ఆ గర్భములో ఉన్నది యేసయ్య. ఎప్పుడైతే విడిచిపెట్టలి అనుకున్నాడో, వెంటనే దూత వచ్చి ఆ గర్భము ఎలా కలిగిందో చెప్పింది. అప్పటివరకు ఆలోచనలు ఎలా ఉన్నప్పటికీ, దూత చెప్పగానే తన ఆలోచన విధానము మారిపోఇంది.

యోసేపు నిద్రమేలుకొని ప్రభువు దూత తనకు ఆజ్ఞాపించిన ప్రకారముచేసి, తన భార్యను చేర్చుకొని ఆమె కుమారుని కనువరకు ఆమెను ఎరుగకుండెను; అతడు ఆ కుమారునికి యేసు అను పేరు పెట్టెను. -మత్తయి 1:24-25

అనగా సత్యము ఎరగని స్థితిలో యోసేపు మరియను విడిచిపెట్టాలి అనే ఆలోచన కలగగానే, దూత చేత సత్యము తెలియచేయబడి వెంటనే సరైన మార్గములోనికి నడిపించబడ్డాడు. యేసయ్యకు వ్యతిరేకమైన మార్గమునుండి యోసేపు తప్పించబడ్డాడు.

యేసయ్య పుట్టాక కూడా రాజు పుట్టిన బిడ్డను చంపడానికి ప్రయత్నము చేస్తున్నాడు. అప్పుడు చూస్తే –

వారు వెళ్లినతరువాత ఇదిగో ప్రభువు దూత స్వప్నమందు యోసేపునకు ప్రత్యక్షమై–హేరోదు ఆ శిశువును సంహరింపవలెనని ఆయనను వెదకబోవుచున్నాడు గనుక నీవు లేచి ఆ శిశువును ఆయన తల్లిని వెంటబెట్టుకొని ఐగుప్తునకు పారిపోయి, నేను నీతో తెలియజెప్పువరకు అక్కడనే యుండుమని అతనితో చెప్పెను. -మత్తయి 2:13

ఇక్కడ యేసయ్యకు వ్యతిరేకమైన ఆలోచననుండి తప్పించడానికి మరలా యోసేపును నడిపించాడు. మరలా హేరోదు చనిపోయిన తరువాత మరలా నడిపించాడు.

–నీవు లేచి, శిశువును తల్లిని తోడుకొని, ఇశ్రాయేలుదేశమునకు వెళ్లుము; శిశువు ప్రాణము తీయజూచు చుండినవారు చనిపోయిరని చెప్పెను. అప్పుడతడు లేచి, శిశువును తల్లిని తోడుకొని ఇశ్రాయేలుదేశమునకు వచ్చెను. -మత్తయి 2:20-21

ఈ మొత్తము వాక్యములలో యోసేపును దేవుడు నడిపిస్తున్నాడు అనే సంగతిని మనము అర్థము చేసుకోగలము. ఇక్కడ యేసయ్యను ఆత్మీయ జీవితముగా చూస్తే, మనము ఆత్మీయ ఎదగాలి అనే ఆశ కలిగి ఉన్నప్పుడు, జ్ఞానులను నడిపించిన విధముగానే మనలను నడిపించేవాడుగా నీ దేవుడు ఉన్నాడు. ఒకవేళ నీ ఆత్మీయ జీవితమును చంపివేసే ప్రతి ప్రయత్నమునుండి తప్పించబడునట్లు నిన్ను నడిపిస్తాడు. చివరికి యేసయ్య దేవుని చిత్తమును జరిగించినవాడుగా ఉన్నాడు. అలాగే మన జీవితములో దేవుని మార్గములో మనము నడిపించబడుచుండగా, దేవుని చిత్తము జరిగించబడుతుంది, దేవునికి మహిమ కలుగుతుంది.

నీ విమోచకుడును ఇశ్రాయేలు పరిశుద్ధదేవుడునైన యెహోవా ఈలాగు సెలవిచ్చుచున్నాడు –నీకు ప్రయోజనము కలుగునట్లు నీ దేవుడనైన యెహోవానగు నేనే నీకు ఉపదేశము చేయుదును నీవు నడవవలసిన త్రోవను నిన్ను నడిపించుదును. -యెషయా 48:17

యోసేపుకు ఉపదేశము చేసి నడిపించాడు, జ్ఞానులను త్రోవలో నడిపించాడు. అదే దేవుడు నిన్ను నన్ను నడిపించాలి అని ఆశ కలిగిఉన్నాడు గనుక ఈరోజే ఆయన చేతికి నీ జీవితమును సమర్పించు.