03-03-2024 – ఆదివారం రెండవ ఆరాధన – దేవుని చిత్తము తెలుసుకోవడానికి

వారము కొరకైన వాక్యము

ఈరోజు దేవుని చిత్తాన్ని ఎలా తెలుసుకోవాలి అనే అంశము గూర్చి నేర్చుకుందాము. సాధారణముగా మన నోటినుండి దేవుని చిత్తము గూర్చిన అనేకమైన మాటలు మాట్లాడతాము.

అందుచేత ఈ సంగతి వినిననాటనుండి మేమును మీ నిమిత్తము ప్రార్థన చేయుట మానక, మీరు సంపూర్ణ జ్ఞానమును ఆత్మ సంబంధమైన వివేకమునుగలవారును, ఆయన చిత్తమును పూర్ణముగా గ్రహించినవారునై, ప్రతి సత్కార్యములో సఫలులగుచు, దేవుని విషయమైన జ్ఞానమందు అభివృద్ధి పొందుచు, అన్ని విషయములలో ప్రభువును సంతోషపెట్టునట్లు, ఆయనకు తగినట్టుగా నడుచుకొనవలెననియు, ఆనందముతోకూడిన పూర్ణమైన ఓర్పును దీర్ఘశాంతమును కనుపరచునట్లు ఆయన మహిమ శక్తినిబట్టి సంపూర్ణ బలముతో బలపరచబడవలెననియు, తేజోవాసులైన పరిశుద్ధుల స్వాస్థ్యములో పాలివారమగుటకు మనలను పాత్రులనుగాచేసిన తండ్రికి మీరు కృతజ్ఞతాస్తుతులు చెల్లింపవలెననియు దేవుని బతిమాలు చున్నాము.౹ -కొలొస్సయులకు 1:9

పై వాక్యములో సంఘముగా ఏమి కలిగి ఉండాలో అని అనేకమైన విషయములు వ్రాయబడ్డాయి. అయితే అందులో ఒకటి – ఆయన చిత్తమును పూర్ణముగా గ్రహించాలి.

మనుష్యులను సంతోషపెట్టువారు చేయునట్లు, కంటికి కనబడుటకే కాక, క్రీస్తు దాసులమని యెరిగి, దేవుని చిత్తమును మనఃపూర్వకముగా జరిగించుచు,౹ మనుష్యులకు చేసినట్టుకాక ప్రభువునకు చేసినట్టే యిష్టపూర్వకముగా సేవచేయుడి.౹ -ఎఫెసీయులకు 6:6-7

దేవుని చిత్తమును గ్రహించడమే కాక, దేవుని చిత్తమును మనఃపూర్వకముగా జరిగించాలి. అయితే ఎలా ఆయన చిత్తము తెలుసుకోవాలి?

మీరు ఈ లోక మర్యాదను అనుసరింపక, ఉత్తమమును, అనుకూలమును, సంపూర్ణమునై యున్న దేవుని చిత్తమేదో పరీక్షించి తెలిసికొనునట్లు మీ మనస్సు మారి నూతనమగుటవలన రూపాంతరము పొందుడి. -రోమా 12:2

మొట్టమొదట దేవుని చిత్తము జరిగించబడాలి అంటే మనస్సు మారి నూతనమగుటవలన రూపాంతరము పొందవలసి ఉన్నది.

ఒక స్త్రీ గర్భము ధరించింది, అయితే రక్తస్రావము అయినప్పుడు ఆ గర్భము నిలువదు. ఈ లోకములో ఆలాగుననే జరుగుతుంది. అయితే ఆ లోకము యొక్క మర్యాదను అనుసరించక, అనగా లోకములో సాధారణముగా ఏమి జరుగుతుందో దానిమీద మనసు పెట్టక, ఉత్తమము అనుకూలమైన దేవుని చిత్తము ఏమిటో అనేది మనము తెలుసుకోవాలి అంటే మొదట మన మనసులో ఆ ఆలోచన మారవలసి ఉన్నది.

దేవుని చిత్తమును చూస్తే, గర్భఫలము ఆయన దానము. కుమారులు గల తల్లిగా సంతోషము ధరింపచేయువాడు దేవుడే. అయితే అననుకూల సమయములలో మన హృదయము ఈ లోకములో జరిగే విధముగా ఆలోచించకూడదు.

దైవజనునికి క్యాన్సర్ వచ్చినప్పుడు ఈలోకములో ఆ వ్యాధి వచ్చిన వారు ఎలా ఉంటారో అనే పరిశోధన చేస్తున్నప్పుడు, నీకు ఉన్న విశ్వాసమును బట్టి ఆ క్యాన్సర్ నిన్ను ప్రభావము చేస్తుంది. లోకములో ఉన్న ప్రకారము నీకు జరగడానికి నీకు లేదు అనే సత్యము ప్రభువు జ్ఞాపకము చేసి బలపరచి నిలబెట్టారు.

మనము కూడా దేవుని చిత్తము జరిగించాలి అంటే మొదట మన హృదయము సిద్ధపరచబడాలి. లోకములో ఉన్న ప్రకారము మన ఆలోచనలు ఉంటే, దేవుని చిత్తము జరిగించలేము.

దేవుని చిత్తము రెండు రకములుగా తెలియచేయబడుతుంది. ఒక విధముగా దేవుడే తన చిత్తమును తెలియచేసేవాడుగా ఉంటాడు. ఆదిమ దినములలో ప్రవక్తల ద్వారా, దేవదూతల ద్వారా అలాగే కలల ద్వారా కూడా తన చిత్తమును తెలియచేసారు.

ఈ మూడు విషయములలో మన ప్రమేయము ఏమీ ఉండదు. ప్రత్యేకముగా దేవుడు తన చిత్తమును బయలుపరచినవాడుగా ఉన్నాడు అంటే? ఎన్నిక చేయబడినవారికి. అయితే మన అందరము కూడా ఎన్నిక చేయబడినవారమే!

రెండవదిగా మనకు మనము కూడా దేవుని చిత్తమును తెలుసుకోవచ్చు. ఈ విధానములో మన ప్రమేయము ఉంటుంది.

ఇప్పుడేలాగైనను ఆటంకములేకుండ మీ యొద్దకు వచ్చుటకు దేవుని చిత్తమువలన నాకు వీలుకలుగు నేమో అని, నా ప్రార్థనలయందు ఎల్లప్పుడు ఆయనను బతిమాలుకొనుచు, మిమ్మునుగూర్చి యెడతెగక జ్ఞాపకము చేసికొనుచున్నాను -రోమా 1:9

ఇక్కడ పేతురు, పౌలు ప్రార్థన వలన దేవుని చిత్తము కనుగొనుటకు ప్రయత్నము చేస్తున్నారు. మనము కూడా ప్రార్థనల ద్వారా దేవుని చిత్తమును కనుగొనగలుతాము.

మీలో ఒకడును క్రీస్తుయేసు దాసుడునైన ఎపఫ్రా మీకు వందనములు చెప్పుచున్నాడు; మీరు సంపూర్ణులును, ప్రతి విషయములో దేవుని చిత్తమునుగూర్చి సంపూర్ణాత్మ నిశ్చయతగలవారునై నిలుకడగా ఉండవలెనని యితడెల్లప్పుడును మీకొరకు తన ప్రార్థనలలో పోరాడుచున్నాడు.౹ -కొలొస్సయులకు 4:12

ఎపఫ్రా తన సంఘము దేవుని చిత్తమును సంపూర్ణముగా తెలుసుకోవాలి అని ప్రార్థన చేస్తున్నాడు.

మరునాడు వారు ప్రయాణమైపోయి పట్టణమునకు సమీపించినప్పుడు పగలు ఇంచుమించు పండ్రెండు గంట లకు పేతురు ప్రార్థనచేయుటకు మిద్దెమీది కెక్కెను.౹ అతడు మిక్కిలి ఆకలిగొని భోజనము చేయగోరెను; ఇంటివారు సిద్ధముచేయుచుండగా అతడు పరవశుడై౹ ఆకాశము తెరవబడుటయు, నాలుగు చెంగులుపెట్టి దింప బడిన పెద్ద దుప్పటివంటి యొకవిధమైన పాత్ర భూమి మీదికి దిగివచ్చుటయు చూచెను.౹ -అపొస్తలుల కార్యములు 10:9-11

పేతురు ప్రార్థన చేయుచుండగా కలిగిన దర్శనమును ద్వారా దేవుని చిత్తము బయలుపరుస్తున్నాడు. మనము కూడా ప్రార్థన ద్వారా దేవుని చిత్తము తెలియచేయబడుతుంది అనే సత్యము తెలిసినవారమైతే, మనము కనిపెట్టేవారముగా ఉంటాము.

అందులో భూమియందుండు సకల విధములైన చతుష్పాద జంతువులును, ప్రాకుపురుగులును, ఆకాశపక్షులును ఉండెను.౹ అప్పుడు –పేతురూ, నీవు లేచి చంపుకొని తినుమని ఒక శబ్దమత నికి వినబడెను.౹ అయితే పేతురు–వద్దు ప్రభువా, నిషిద్ధమైనది అపవిత్రమైనది ఏదైనను నేనెన్నడును తినలేదని చెప్పగా౹ –దేవుడు పవిత్రము చేసినవాటిని నీవు నిషిద్ధమైన వాటినిగా ఎంచవద్దని మరల రెండవ మారు ఆ శబ్దము అతనికి వినబడెను.౹ ఈలాగు ముమ్మారు జరిగెను. వెంటనే ఆ పాత్ర ఆకాశమునకెత్తబడెను. -అపొస్తలుల కార్యములు 10:12-16

పేతురుకు మొదట ఆ దర్శనము యొక్క భావము అర్థము కాలేదు. అయినప్పటికీ, పేతురు గ్రహించేంతవరకు ఆయన చిత్తమును తెలియచేస్తూనే ఉంటారు. మనము ప్రార్థన చేయడానికి సిద్ధపడితే, తన చిత్తము తెలియచేయడానికి ఆయన సిద్ధమే.

దేవుని సన్నిధిలో ప్రార్థన చేస్తున్నప్పుడు, దేవుడు తన చిత్తమును బయలుపరచడానికి సిద్ధపడినప్పుడు, మన ఆత్మీయ వాతావరణము మార్పు చెందుతుంది, మన ఆత్మ సిద్ధపరచబడుతుంది.

పేతురు తనకు కలిగిన దర్శనమేమై యుండునో అని తనలో తనకు ఎటుతోచక యుండగా, కొర్నేలి పంపిన మనుష్యులు సీమోను ఇల్లు ఏదని విచారించి తెలిసికొని, వాకిట నిలిచి యింటివారిని పిలిచి౹ -అపొస్తలుల కార్యములు 10:17

పేతురుకు ఇవ్వబడిన దర్శనము ఏమిటో అర్థము కాలేదు అయినప్పటికీ, ఆ దేవుని చిత్తము పేతురు కళ్ళముందే ప్రత్యక్షపరచబడింది.

–దేవుడు పక్షపాతి కాడని నిజముగా గ్రహించియున్నాను.౹ ప్రతి జనములోను ఆయనకు భయపడి నీతిగా నడుచుకొనువానిని ఆయన అంగీకరించును.౹ -అపొస్తలుల కార్యములు 10:34-35

ఇప్పుడు పేతురు మాటలలో – దేవుని చిత్తమును నిజముగా గ్రహించాడు అని ఒప్పుకుంటున్నాడు.

యేసుయొక్క ఆత్మ వారిని వెళ్లనియ్యలేదు. అంతటవారు ముసియను దాటిపోయి త్రోయకు వచ్చిరి. అప్పుడు మాసిదోనియ దేశస్థుడొకడు నిలిచి–నీవు మాసిదోనియకు వచ్చి మాకు సహాయము చేయుమని తనను వేడుకొనుచున్నట్టు రాత్రి వేళ పౌలునకు దర్శనము కలిగెను.అతనికి ఆ దర్శనము కలిగినప్పుడు వారికి సువార్త ప్రకటించుటకు దేవుడు మమ్మును పిలిచియున్నాడని మేము నిశ్చయించుకొని వెంటనే మాసిదోనియకు బయలుదేరుటకు యత్నము చేసితిమి. -అపొస్తలుల కార్యములు 16:7-10

ఇక్కడ పౌలుకు కూడా దర్శనము కలిగింది. అలా తెలుసుకున్న చిత్తము ప్రకారము చేయడానికి ఆయన సిద్ధపడ్డాడు. దీనినిబట్టి ప్రార్థన ద్వారా దేవుని చిత్తమును తెలుసుకోవచ్చు అని మనము గ్రహించగలము.

ప్రభువగు యెహోవా ఆత్మ నా మీదికి వచ్చియున్నది దీనులకు సువర్తమానము ప్రకటించుటకు యెహోవా నన్ను అభిషేకించెను నలిగిన హృదయముగలవారిని దృఢపరచుటకును చెరలోనున్నవారికి విడుదలను బంధింపబడినవారికి విముక్తిని ప్రకటించుటకును యెహోవా హితవత్సరమును మన దేవుని ప్రతి దండన దినమును ప్రకటించుటకును దుఃఖాక్రాంతులందరిని ఓదార్చుటకును సీయోనులో దుఃఖించువారికి ఉల్లాస వస్త్రములు ధరింపజేయుటకును బూడిదెకు ప్రతిగా పూదండను దుఃఖమునకు ప్రతిగా ఆనందతైలమును భారభరితమైన ఆత్మకు ప్రతిగా స్తుతివస్త్రమునువారికిచ్చుటకును ఆయన నన్ను పంపియున్నాడు – యెషయా 61:1-3
ప్రవక్తయైన యెషయా గ్రంథము ఆయన చేతి కియ్యబడెను; ఆయన గ్రంథము విప్పగా – –ప్రభువు ఆత్మ నామీద ఉన్నది బీదలకు సువార్త ప్రకటించుటకై ఆయన నన్ను అభిషేకించెను చెరలోనున్న వారికి విడుదలను, గ్రుడ్డివారికి చూపును, (కలుగునని) ప్రకటించుటకును నలిగినవారిని విడిపించుటకును ప్రభువు హితవత్సరము ప్రకటించుటకును ఆయన నన్ను పంపియున్నాడు అని వ్రాయబడిన చోటు ఆయనకు దొరకెను. ఆయన గ్రంథము చుట్టి పరిచారకునికిచ్చి కూర్చుండెను. సమాజమందిరములోనున్నవారందరు ఆయనను తేరిచూడగా, ఆయన–నేడు మీ వినికిడిలో ఈ లేఖనము నెరవేరినదని వారితో చెప్పసాగెను. -లూకా 4:17-20

దేవుని చిత్తము ఆయన లేఖనముల ద్వారా వెల్లడిపరచబడుతుంది. యెషయా ద్వారా తెలియచేయబడిన చిత్తము, యేసయ్యకు ఆ లేఖనముల ద్వారా తెలియచేయబడింది. గనుక మనము కూడా మనము దేవుని చిత్తమును తెలుసుకోవచ్చు.

మనము దేవుని చిత్తము కొరకు ప్రార్థన చేసి, వాక్యము ధ్యానము చేసినప్పుడు ఆయన చిత్తమును మనము ఖచ్చితముగా కనుగొనగలుగుతాము.