02-04-2023 ఆదివారం మొదటి ఆరాధన – మట్టల ఆదివారము

ఆరాధన వర్తమానము

మన దేవుడు ఆపత్కాలములో నమ్ముకొనదగిన సహాయకుడు. ఆయన మనకు తోడుగా ఉన్నట్టయితే దేనికీ కూడా మన మీద అధికారము లేదు. అయితే ఈ సత్యము నీవు ఎరిగినప్పుడు నీవు దేనికీ భయపడవు. మన దేవుడు చేయి విడువని దేవుడు.

దహనబలులుగా గొఱ్ఱెమేకల పిల్లలను నాయొద్దకు తేలేదు నీ బలులచేత నన్ను ఘనపరచలేదు నైవేద్యములు చేయవలెనని నేను నిన్ను బలవంత పెట్టలేదు ధూపము వేయవలెనని నేను నిన్ను విసికింపలేదు. నా నిమిత్తము సువాసనగల లవంగపు చెక్కను నీవు రూకలిచ్చి కొనలేదు నీ బలి పశువుల క్రొవ్వుచేత నన్ను తృప్తిపరచలేదు సరే గదా. నీ పాపములచేత నీవు నన్ను విసికించితివి నీ దోషములచేత నన్ను ఆయాసపెట్టితివి. -యెషయా 43:23-24

మన వ్యక్తిగతమైన జీవితాలు ఆయనకు మహిమకరముగా లేనప్పటికీ, ఆయను తృప్తిపరచే విధానములో లేనప్పటికీ, ఆయన ప్రేమ ఎలా ఉందో మనము తెలుసుకోవాలి. మన జీవితాలు పాపములతో ఆయనను ఆయాసపెట్టినప్పటికీ, ఆయన మంచితనము మన పట్ల ఎలా ఉందో చూస్తే,

నేను నేనే నా చిత్తానుసారముగా నీ యతిక్రమము లను తుడిచివేయుచున్నాను నేను నీ పాపములను జ్ఞాపకము చేసికొనను. -యెషయా 43:25.

మనము ఒక పందికి స్నానము చేసి అలంకరించినా సరే ఎలా అయితే అది తిరిగి మురికి గుంటలవైపే వెళుతుందో, అలాగే మనముకూడా పాపపు గుంటలవైపే వెళ్ళే జీవితము కలవారమైనప్పటికీ, మన అతిక్రమములను తుడిచివేసే ప్రేమ కలిగినవాడు మన దేవుడు.

దేవుడు గనుక మన పాపములను జ్ఞాపకము చేసుకుంటే మన జీవితము ఆయన ఉగ్రతలో నశించిపోయేవారమే. ఆయన ప్రేమను రుచిచూసిన తరువాత కూడా ఆయనను విడిచిపెట్టి పాత పాపముల వైపే వెళ్ళిపొయినప్పటికీ ఆయన మనము ప్రేమించుట మానలేదు.

–నీవును ఈ నీ దినమందైనను సమాధానసంబంధమైన సంగతులను తెలిసికొనినయెడల నీకెంతో మేలు; గాని యిప్పుడవి నీ కన్నులకు మరుగు చేయబడియున్నవి. -లూకా 19:42

ప్రభువు నిన్ను ప్రేమిస్తున్నాడు అనే సత్యము ఈరోజైనను నీవు తెలుసుకొంటే, అది నీకెంతో మేలు. “నేను నేనే నా చిత్తప్రకారము” అని ఆయన అంటున్నాదు అంటే, ఆయన చిత్తములో నీవున్నావు.

ఎందుకనగా తన కుమారుడు అనేక సహోదరులలో జ్యేష్ఠుడగునట్లు, దేవుడెవరిని ముందు ఎరిగెనో, వారు తన కుమారునితో సారూప్యము గలవారవుటకు వారిని ముందుగా నిర్ణయించెను.౹ -రోమా 8:29

క్రీస్తు మాత్రమే దేవునిని తృప్తిపరచాడు. మనము దేవుని సంతోషపెట్టాలి అంటే మనము కూడా క్రీస్తు వలే మారిపోవాలి. క్రీస్తు యొక్క సారూప్యత మనము ధరించుకున్నప్పుడు మాత్రమే దేవునిని మనము తృప్తిపరచేవారిగా అవుతాము. మనము ఎన్నిక చేయబడ్డాము. అందుకే నీవెంటే ఆయన వస్తున్నాడు. అనాదికాలములోనే నీవు నిర్ణయించబడ్డావు. ఎప్పుడైతే క్రీస్తు సారూప్యతను ధరించుకున్నప్పుడు దేవుని పని నిమిత్తము నీ జీవితములో ఆయన చిత్తము నెరవేరుతుంది.

రక్షింపనేరక యుండునట్లు యెహోవా హస్తము కురుచకాలేదు విననేరక యుండునట్లు ఆయన చెవులు మందము కాలేదు మీ దోషములు మీకును మీ దేవునికిని అడ్డముగా వచ్చెను మీ పాపములు ఆయన ముఖమును మీకు మరుగు పరచెను గనుక ఆయన ఆలకింపకున్నాడు. -యెషయా 59:1-2

రక్షణ యెహోవాది ఆయన ఆశీర్వాదము నీది. క్రీస్తు సారూప్యత ధరించుకొనుట మనుష్యులకు అసాధ్యమే కానీ దేవునికి సమస్తమును సాధ్యమే. నీ చుట్టూ ఉన్న సమస్త పరిస్థితులనూ మార్చగలగిన శక్తి నీ దేవునికి ఉన్నప్పుడు, నిన్ను మార్చగలిగిన శక్తి నీ దేవునికి లేదా? దీన దరిద్రులు నీళ్ళకొరకు వెతుకుతున్నారు అయితే వారికొరకు నదులనే పారచేసేవాడుగా మన దేవుడు ఉన్నాడు.

రండి నమస్కారము చేసి సాగిలపడుదము మనలను సృజించిన యెహోవా సన్నిధిని మోకరించుదము నేడు మీరు ఆయన మాట నంగీకరించినయెడల ఎంత మేలు. -కీర్తనలు 95:7

నా జీవితము నీకు మహిమకరముగా లేనప్పటికీ, నీ చిత్తము నా జీవితములో జరిగించడానికి ఇష్టపడుతున్నావు. కనుక నా జీవితమును మార్చగల సమర్థుడవని నేను మనస్పూర్తిగా నమ్ముతున్నాను అని నీవు చెప్పగలిగితే, ఈరోజు మనస్పూర్థిగా ఆయనను ఆరాధించు.

ఆరాధన గీతము

నీవే నా రక్షణ – నీవే నిరీక్షణ
నీవే నా దీవెన – నీవే క్షమాపణ (2)
యేసయ్యా యేసయ్యా ఎంత మంచివాడవయ్యా
యేసయ్యా యేసయ్యా ఎంత మంచి మనసయ్యా (2)|
|నీవే నా||

గతమును మన్నించి గుణవంతునిగా చేసి
నన్ను మలచి నన్నే మరిపించి (2)
మనిషిగా మార్చినావు
నీ మనసు నాకిచ్చినావు (2)
||యేసయ్యా||

కన్నీరు తుడచి కష్టాలు తీర్చి
అండగ నిలిచి అడ్డులన్ని తొలగించి (2)
మనిషిగా మార్చినావు
మాదిరిగ చేసినావు (2)
||యేసయ్యా||

నీవే నా రక్షణ – నీవే నిరీక్షణ
నీవే నా దీవెన – నీవే సమస్తము (2)
యేసయ్యా యేసయ్యా ఎంత మంచివాడవయ్యా
యేసయ్యా యేసయ్యా ఎంత మంచి మనసయ్యా (2)|
|నీవే నా||