01-12-2024 – ఆదివారం మొదటి ఆరాధన

వారము కొరకైన వాక్యము

అపవాది ఎప్పుడు మ్రింగుదునా అని అవకాశము కొరకు ఎదురుచూస్తుంది. అంతే కాక, నీ జీవితము గూర్చి, దేవునికి అపవాదికి ఎల్లప్పుడు వైరము ఉంటుంది.

దేవుని సన్నిధిలో నేను దేవుని కుమారుడిని, దేవుని కుమార్తెను అని ప్రకటిస్తున్నపుడు, అపవాది సిగ్గుపరచబడతాడు, వాడు ఓడిపోతాడు. మనము స్తుతించినపుడు ఏమి జరుగుతుంది అంటే, నీవు దేవునికి చెందినవాడివి అనే ఆ సత్యము బలముగా ప్రకటించబడుతుంది. అపవాది ఖచ్చితముగా సిగ్గుపరచబడతాడు.

సౌలును ఇశ్రాయేలీయులును కూడివచ్చి ఏలా లోయలో దిగి ఫిలిష్తీయుల కెదురుగ యుద్ధపంక్తులు తీర్చిరి.౹ -1 సమూయేలు 17:2
గాతువాడైన గొల్యాతు అను శూరుడొకడు ఫిలిష్తీయుల దండులోనుండి బయలుదేరు చుండెను. అతడు ఆరుమూళ్లజేనెడు ఎత్తుమనిషి.౹ -1 సమూయేలు 17:4
అతడు నాతో పోట్లాడి నన్ను చంపగలిగినయెడల మేము మీకు దాసుల మగుదుము; నేనతని జయించి చంపినయెడల మీరు మాకు దాసులై మాకు దాస్యము చేయుదురు.౹ ఈ దినమున నేను ఇశ్రాయేలీయుల సైన్యములను తిరస్కరించుచున్నాను. ఒకని నియమించినయెడలవాడును నేనును పోట్లాడుదుమని ఆ ఫిలిష్తీయుడు చెప్పుచువచ్చెను.౹ సౌలును ఇశ్రాయేలీయులందరును ఆ ఫిలిష్తీయుని మాటలు వినినప్పుడు బహు భీతులైరి. -1 సమూయేలు 17:9-11

కొన్ని శ్రమలు, పోరాటాలు అపవాది మనలను నాశనము చేయడానికి అయితే, కొన్ని శ్రమలు దేవుని మహిమ కొరకు దేవుడు అనుమతిస్తాడు. అన్నిటికంటే గొప్ప ఉదాహరణ, క్రీస్తు శ్రమపడకపోతే, అసలు మనకు ఈ జీవితమే లేదు. శిష్యులు శ్రమపడకపోతే, ఈరోజు సువార్త అనేదే లేదు. క్రీస్తుకొరకు పడే శ్రమలో విజయముంది, ప్రభువు యొక్క మహిమ ఉంది.

మనము చదివిన వాక్యభాగములో ఫిలిష్తీయులు ఇశ్రాయేలు ప్రజలపైకి యుద్ధానికి వచ్చి 40 రోజులు వారిని హేళన మాటలతో భయపెడుతూ ఉండగా, దావీదు అక్కడకు రావడము జరిగింది. దావీదు వచ్చేవరకు అక్కడ పరిస్థితి భయకంపితముగా ఉంది. అయితే దావీదు వచ్చినతరువాత పరిస్థితి మారింది. ఎందుకు అని ఆలోచిస్తే,

అంతట యెహోవా సమూయేలుతో ఈలాగు సెలవిచ్చెను – ఇశ్రాయేలీయులమీద రాజుగా ఉండకుండ నేను విసర్జించిన సౌలునుగూర్చి నీ వెంతకాలము దుఃఖింతువు? నీ కొమ్మును తైలముతో నింపుము, బేత్లెహేమీయుడైన యెష్షయియొద్దకు నిన్ను పంపుచున్నాను, అతని కుమారులలో ఒకని నేను రాజుగా నియమించుదును.౹ -1 సమూయేలు 16:1

సౌలును విసర్జించి ఆ స్థానములో దావీదుని దేవుడు ఏర్పరచుకున్నాడు గనుక, సౌలు స్థానములో దావీదు రాజుగా వచ్చునట్లుగా, ఆ శ్రమను ప్రభువు అనుమతించాడు. ఏర్పాటుచేయబడిన వాడు వచ్చేవరకు వారు భయముతో ఉన్నారు గానీ, ఓడిపోలేదు. మన జీవితములో కూడా, ఆశీర్వాదము కొరకు దేవుడు ఏర్పాటు చేయబడిన పరిస్థితి కలుగుటకు, శ్రమ అనుమతించబడుతుంది. దేవుడు ఏర్పాటు ప్రకారామే మన పోరాటములలో విజయము గానీ, మన స్వంత బలము, జ్ఞానము ప్రకారము మనము ఏమి జయించలేము. అపవాదిని జయించే శక్తి మనకు లేదు గానీ మన శక్తి మన దేవుడే.

ఇశ్రాయేలు ప్రజల పరిస్థితిలో దావీదు అక్కడకు నడిపించబడ్డాడు గానీ తనంతట తాను అక్కడికి వెళ్ళలేదు. దావీదు అక్కడకు వచ్చినది ఒకపని నిమిత్తము అయితే అతడు చేస్తున్నది వేరేపని. మన జీవితములో కూడా మనమున్న పోరాటములో సొల్యూషన్ ఉంది. ఏ పరిస్థితికి అయినా నీ జీవితమును నాశనము చేసే అధికారములేదు. అయితే ఒకే కండిషన్ ఏమిటి అంటే, నీవు ఇశ్రాయేలీయుడవై ఉండాలి అనగా దేవునికి చెందినవాడివిగా ఉండాలి.

ఇశ్రాయేలీయులలో ఒకడు –వచ్చుచున్న ఆ మనిషిని చూచితిరే; నిజముగా ఇశ్రాయేలీయులను తిరస్కరించుటకై వాడు బయలుదేరు చున్నాడు, వానిని చంపినవానికి రాజు బహుగ ఐశ్వర్యము కలుగజేసి తన కుమార్తెనిచ్చి పెండ్లిచేసి వాని తండ్రి ఇంటి వారిని ఇశ్రాయేలీయులలో స్వతంత్రులుగాచేయు ననగా దావీదు–జీవముగల దేవుని సైన్యములను తిరస్కరించుటకు ఈ సున్నతి లేని ఫిలిష్తీయుడు ఎంతటి వాడు? వాని చంపి ఇశ్రాయేలీయులనుండి యీ నింద తొలగించిన వానికి బహుమతి యేమని తనయొద్ద నిలిచినవారి నడుగగా -1 సమూయేలు 17:25-26

జీవముగల దేవుని సైన్యములను తిరస్కరించుటకు ఈ సున్నతి లేని ఫిలిష్తీయుడు ఎంతటి వాడు? అనే మాట దావీదు ఉపయోగించాడు. ఇక్కడ రెండు గుంపులు ఉన్నాయి. ఒకటి జీవము గల దేవుని సైన్యము, మరొకటి సున్నతిలేని సైన్యము.

దావీదు చెప్పుచున్న మాటలు, ఏమిటి అంటే- మనము దేవునికి చెందినవారము, ఆయన సొత్తైనవారము. అటువంటి వారి జీవితములో వచ్చిన పరిస్థితి ఏ పాటిది? అనే ఆలోచన మనము కలిగి ఉండాలి. దావీదు అభిషేకించబడినవాడు గనుక, వచ్చిన పరిస్థితిలో భయమును పారద్రోలే మనసు మనము కలిగి ఉండాలి. దేనిని బట్టి మనము అలా నిలబడగలము? దేవుని గూర్చిన సత్యమును బట్టియే!

సౌలు–ఈ ఫిలిష్తీయుని ఎదుర్కొని వానితో పోట్లాడుటకు నీకు బలము చాలదు; నీవు బాలుడవు, వాడు బాల్యమునుండి యుద్ధాభ్యాసము చేసినవాడని దావీదుతో అనెను.౹ అందుకు దావీదు సౌలుతో ఇట్లనెను–మీ దాసుడనైన నేను నా తండ్రియొక్క గొఱ్ఱెలను కాయుచుండ సింహమును ఎలుగుబంటియును వచ్చి మందలోనుండి ఒక గొఱ్ఱెపిల్లను ఎత్తికొని పోవుచుండగ నేను దానిని తరిమి చంపి దాని నోటనుండి ఆ గొఱ్ఱెను విడిపించితిని; అది నా మీదికి రాగా దాని గడ్డము పట్టుకొని దానిని కొట్టి చంపితిని.౹ మీ దాసుడనైన నేను ఆ సింహమును ఎలుగు బంటిని చంపితినే, జీవముగల దేవుని సైన్యములను తిరస్క రించిన యీ సున్నతిలేని ఫిలిష్తీయుడు వాటిలో ఒకదాని వలె అగుననియు,౹ సింహముయొక్క బలమునుండియు, ఎలుగుబంటియొక్క బలమునుండియు నన్ను రక్షించిన యెహోవా ఈ ఫిలిష్తీయుని చేతిలోనుండికూడను నన్ను విడిపించుననియు చెప్పెను. అందుకు సౌలు–పొమ్ము; యెహోవా నీకు తోడుగానుండునుగాక అని దావీదుతో అనెను. -1 సమూయేలు 17:33-37

దావీదు మొదట నిలబడినపుడు కృంగదీసే మాటలు వచ్చాయి. నీవు బాలుడవు, పైగా యుద్ధముచేయడము తెలియని వాడవు అని సౌలు చెప్పగా, దావీదు మాత్రము తాను నమ్మిన దేవుని గూర్చిన సత్యము పై మాత్రమే నిలబడుతున్నాదు. సింహమునుండి, ఎలుగుబంటి నుండి తప్పించిన దేవుడైన యెహోవా ఈ దినమున కూడా నన్ను తప్పిస్తాడు. శత్రువుగా ఎవరు నిలబడినా సరే, ఆ సింహము, ఎలుగుబంటివలె అగుదురు అని చెప్పగలుగుతున్నాడు.

ఫిలిప్తీయుడు–కఱ్ఱ తీసికొని నీవు నా మీదికి వచ్చుచున్నావే, నేను కుక్కనా? అని దావీదుతో చెప్పి తన దేవతల పేరట దావీదును శపించెను.౹ -1 సమూయేలు 17:43

ఇక్కడ దావీదు చిన్న కర్రపట్టుకుని గొల్యాతును ఎదుర్కోవడానికి వెళుతున్నాడు. దానిని చూసిన గొల్యాతు తమ దేవతల పేరట దావీదును శపిస్తున్నాడు. అయితే దావీదు ఎలా ఉన్నాడు?

దావీదు–నీవు కత్తియు ఈటెయు బల్లెమును ధరించుకొని నా మీదికి వచ్చుచున్నావు అయితే నీవు తిరస్కరించిన ఇశ్రాయేలీయుల సైన్యములకధిపతియగు యెహోవా పేరట నేను నీమీదికి వచ్చుచున్నాను.౹ -1 సమూయేలు 17:45

గొల్యాతు అపవాది పేరట నిలబడుతున్నాడు, దావీదు దేవుని పేరట నిలబడుతున్నాడు. దేవుని పేరట నిలబడే మనకే విజయము అదే ఖచ్చితం. గనుక మన మనసును సిద్ధపరచుకుందాము, మన దేవుని పేరట నిలబడదాము, విజయము పొందుకుందాము. దావీదు అయిదు రాళ్ళు తీసుకొన్నాడు గాని, మొదటి రాయితోనే గెలిచినవాడుగా ఉన్నాడు. అదే విశ్వాస పరిమాణము మనము కూడా కనపరుద్దాము.