01-03-2026 – ఆదివారము మొదటి ఆరాధన

ఆరాధన వర్తమానము

హల్లెలూయ. ప్రైస్ గాడ్. దేవుని నామానికి మహిమ కలుగును గాక. ప్రియమైన దేవుని బిడ్డలారా, మీ అందరికీ కూడా ఆ ప్రభువైన యేసుక్రీస్తు నామములో శుభములు తెలియజేస్తున్నాను. ఈరోజు మనల్ని అందరిని కూడా ఆయన సన్నిధిలో నిలబెట్టిన దేవ దేవునికి సమస్త మహిమ, ఘనత, ప్రభావములు ఆయనకు మాత్రమే చెల్లిస్తున్నాను. ఆమెన్. హల్లెలూయ.

ఈరోజు మనందరం కూడా దేవుని సన్నిధికి నడిపించబడ్డాము. దేవుని చేత ఆకర్షించబడ్డాము. ఇది మనకు చాలా ధన్యకరమైనది. ఎందుకంటే ఈ లోకంలో ప్రతి ఒక్కరు కూడా సంతోషంగా ఉండడానికే ప్రయత్నాలు చేస్తుంటారు. ప్రతి ఒక్కరు కూడా సంతోషాన్ని బయట వెతుకుతుంటారు. కానీ దేవుణ్ణి స్తుతించినప్పుడు మన హృదయంలో ఒక నిజమైన ఆనందం పుడుతుంది. దేవుని మహిమ పరిచినప్పుడు మన అంతరంగంలో ఆనందం ఉబికి వస్తుంది. అటువంటి అనుభవంలోకి మనందరం రావాలి.

మనం దినదినము దేవునిలో కట్టబడుతున్న సందర్భంలో ఈ విషయాలు మనకు గ్రహించబడతాయి. అలవాటుగా ఆదివారం చర్చికి వచ్చి, పాటలు పాడి, కొంతసేపు ఉండి వెళ్ళిపోతే, దాని వల్ల జీవితం మారదు. కానీ ఎప్పుడైతే నువ్వు దేవునిలో ఎదుగుతున్నావో, యేసుక్రీస్తు ప్రభువు యొక్క అడుగుజాడల్లో నడుస్తున్నావో, అప్పుడు నువ్వు దినదినము ఆత్మీయంగా వృద్ధి చెందుతావు.

చాలా మంది “మా కోసం ప్రార్థన చేయండి, మేము ఆత్మీయంగా ఎదగాలి” అంటారు. ప్రార్థన ద్వారా ఆత్మీయ జీవితం వృద్ధి చెందదు. ఆత్మీయత అనేది దేవుని అనుసరించడాన్ని బట్టి వృద్ధిలోనికి వస్తుంది. ఎప్పుడైతే నువ్వు ఆయన వాక్య ప్రకారంగా నీ జీవితాన్ని సిద్ధపరుచుకుంటావో, నీ జీవితం ఆటోమేటిక్‌గా ఆత్మలో వృద్ధి పొందుతుంది.

నువ్వు దినదినము దేవునికి దగ్గర అవుతున్నప్పుడు క్రీస్తు యొక్క స్వభావము నీలో ధరింపబడుతుంది. క్రీస్తు తండ్రిని మహిమపరచకుండా ఉండలేడు. తండ్రి నుండి వేరుపడలేడు. ఆ క్రీస్తు స్వభావం నీలోకి వచ్చినప్పుడు నీవు కూడా తండ్రిని మహిమపరచే వాడవుతావు.

మన దేవుని బట్టి సంతోషించినప్పుడు మన హృదయం అంతరంగం నుండి ఆనందం ఉప్పొంగుతుంది. ఈ లోకంలో ఒక క్రికెటర్ బాగా ఆడితే మనకు సంతోషం కలుగుతుంది. కానీ మన జీవితంలో ఏ మార్పూ రాదు. కానీ దేవుని బట్టి సంతోషించినప్పుడు, ఆయన ఎటువంటి వాడో గ్రహించినప్పుడు, ఆయన నీ కొరకు సమస్తమును అనుకూలపరచే వాడని తెలిసినప్పుడు, నీ హృదయం ఉప్పొంగిపోతుంది.

ఆయన నీ పక్షముగా నిలబడే వాడు. నీ కొరకు సమస్తమును నెరవేర్చే వాడు. ఈ సత్యం నీకు తెలియజేయబడినప్పుడు నువ్వు సంతోషించే వాడవుతావు.

యెహోవా మా ప్రభువా. యేశువా మా రక్షక.

ఆయన నిజంగా నీకు రక్షకుడై ఉన్నాడని నువ్వు గ్రహించగలిగితే, ఆయనను స్తుతించినప్పుడు నీ హృదయం ఉప్పొంగిపోతుంది.

1 పేతురు 2:9 లో ఇలా చెప్పబడుతుంది:

“మీరు చీకటిలో నుండి తన ఆశ్చర్యకరమైన వెలుగులోనికి మిమ్మును పిలిచిన వాని గుణాతిశయములను ప్రచురము చేయుటకై ఏర్పరచబడిన వంశమును, రాజులైన యాజక సమూహమును, పరిశుద్ధ జనమును, దేవుని సొత్తైన ప్రజలై యున్నారు.”

మనము చీకటిలో నుండి ఆయన ఆశ్చర్యకరమైన తన వెలుగులోనికి పిలవబడ్డాము. ఒకసారి మన జీవితాన్ని పరిశీలించాలి. ఎటువంటి చీకటి స్థితిలో నుండి ఆయన మనల్ని రక్షించాడో మనం ఎప్పుడూ మర్చిపోకూడదు. నువ్వు మొదటి స్థితిని మర్చిపోతే నీ జీవితం దిగజారుతుంది.

చీకటి అంటే జీవం లేని స్థితి. నాశనం. కానీ ఆయన నాశనకరమైన స్థితి నుండి మనలను తీసుకుని వెలుగులో పెట్టాడు. వెలుగులో జీవం ఉంది. ఆశ ఉంది. ఉద్దేశం ఉంది.

ఆయన గుణాలను ప్రచురించుటకై మనలను ఎన్నిక చేసుకున్నాడు. ఆయన కరుణామయుడు. ప్రేమామయుడు. శక్తిమంతుడు. లేని దాన్ని ఉన్నట్టుగా చేయగలిగిన వాడు. మృతమైన దాన్ని సజీవం చేయగలిగిన వాడు. ఆ శక్తి మన ద్వారా కనపరచబడాలి.

మన జీవితంలో మృతమైనది ఏదైనా ఉంటే, ఆయన శక్తి దానిని సజీవం చేస్తుంది. ఇదే దేవుని ఉద్దేశం.

మత్తయి 16:16-18 లో ఇలా చెప్పబడుతుంది:

“సీమోను పేతురు ఉత్తరమిచ్చి — నీవు సజీవుడగు దేవుని కుమారుడవైన క్రీస్తు అనెను. అప్పుడు యేసు అతనితో — సీమోను బర్యోనా, నీవు ధన్యుడవు; పరలోకమందున్న నా తండ్రి నీకు ఈ సంగతి బయలుపరచెను గాని, నరులు కాదు. మరియు నీవు పేతురువు; ఈ బండమీద నా సంఘమును కట్టుదును; పాతాళలోకపు ద్వారములు దాని ఎదుట నిలువనేరవు.”

ఏలియా, యిర్మియా, యోహాను ప్రవక్తలు. వారు దేవుని విషయాలను ప్రకటించారు. కానీ క్రీస్తులో ఆ గుణాలు సమగ్రంగా కనపరచబడ్డాయి.

యోహాను 1:12 లో ఇలా చెప్పబడుతుంది:

“తనను ఎందరు అంగీకరించిరో వారికి, అనగా తన నామమునందు విశ్వాసముంచిన వారికి, దేవుని పిల్లలగుటకు అధికారము ఇచ్చెను.”

నువ్వు ఆయనను అంగీకరించినప్పుడు నీవు దేవుని కుమారుడవుతావు. ఆయన గుణాలు నీలో కనపరచబడాలి. ఏలియా చేసిన అద్భుతం, యోహాను ప్రకటించిన సువార్త, ప్రవక్తల ధైర్యం – ఇవన్నీ నీలో కనపరచబడాలి.

బైబిల్ దేవుని వాక్యము. వాక్యము లేకపోతే జీవం లేదు. ఆత్మ జీవింపజేయబడేది వాక్యముచేతనే. ఎంత బిజీ అయినా దేవుని వాక్యాన్ని నిర్లక్ష్యపరచకూడదు.

మనము రాజులైన యాజక సమూహము. పరిశుద్ధ జనము. దేవుని సొత్తైన ప్రజలు. లేవి గోత్రానికి దేవుడే స్వాస్త్యమైనట్లు, మనకు దేవుడే స్వాస్త్యము. ఇది అత్యున్నత ధన్యత.

ఇశ్రాయేలు గోత్రాలకు భూమి పంచబడింది. కానీ లేవికి దేవుడే స్వాస్త్యము అని చెప్పబడింది. దేవుడే స్వాస్త్యమైతే, అది సుపర్‌నాచురల్ ధన్యత. మనము కూడా యాజకులము. ఆయన సన్నిధిలో నిలబడగలుగుతున్నాము.

యోహాను 4:23-24 లో ఇలా చెప్పబడుతుంది:

“ఆత్మతోను సత్యముతోను తండ్రిని ఆరాధించువారు కావలెను; ఎందుకనగా తండ్రి అటువంటి వారినే కోరుచున్నాడు. దేవుడు ఆత్మయే; ఆయనను ఆరాధించువారు ఆత్మతోను సత్యముతోను ఆరాధింపవలెను.”

సత్యం ఏంటంటే — ఆయన నాకు రక్షకుడు.

మనము ఆయన సొత్తైన ప్రజలు. మనము ఆయన కుమారులు. అపవాది ఈ కుమారత్వాన్ని తీసివేయాలని ప్రయత్నిస్తాడు. కానీ మనము డిక్లరేషన్‌తో నిలబడాలి.

యెహోవా మా ప్రభువా. యేశువా మా రక్షక.

రక్షణ, స్తోత్రం, బలము, ప్రభావము, శక్తి, ఐశ్వర్యము ప్రభువు యేసువే.

ఈరోజు మనము సత్యాన్ని బట్టి దేవుని స్తుతిద్దాం. అపవాది సిగ్గుపడిపోవాలి. మనము లేచి నిలబడి దేవుని స్తుతించడానికి సిద్ధపడదాం. హల్లెలూయ.